Popular Bible Verses from Hlɔ̌manu 3

Share

Đó gbɛtɔ́ lɛ́ɛ bǐ wɛ hu hwɛ bɔ susu e Mawu nɔ́ ná mɛ ɔ́, yě ɖó ɖě ɖ'é mɛ ǎ. Amɔ̌, Mawu ɔ́, ɖo xomɛnyínyɔ́ tɔn mɛ ɔ́, é sɔ́ yě mɛ e ɖi nǔ nú Klísu Jezu lɛ́ɛ bǐ dó húzú hwɛjijɔnɔ ná vɔ̌nu ɖo nukún tɔn mɛ gbɔn Klísu Jezu e nɔ ɖe yě sín hwɛ mɛ ɔ́ jí.

Mawu nɔ́ sɔ́ gbɛtɔ́ lɛ́ɛ dó húzú hwɛjijɔnɔ ná ɖo nukún tɔn mɛ, gbɔn nǔ e yě ɖi nú Jezu Klísu é jí. É nɔ wa mɔ̌ nú mɛ e nɔ ɖi nǔ nú Klísu lɛ́ɛ bǐ, ɖó ɖo Mawu gɔ́n ɔ́, vogbingbɔn ɖěbǔ ɖo yě mɛ ǎ.

Mawu sɔ́ Klísu ɖó te nú vɔ̌sísá, bónú gbɔn hun tɔn gbla mɛ ɔ́, Klísu ná mɔ hwɛ sɔ́ kɛ mɛ yí nú mɛ e ɖi nǔ n'i lɛ́ɛ é. Lě e Mawu nyí hwɛjijɔnɔ gbɔn é wɛ é jló ná ɖe xlɛ́ gbɔn mɔ̌. Đ'ayǐ ɔ́, Mawu ɖó suúlu, bó nɔ́ ɖo nǔ wa wɛ gbɛtɔ́ lɛ́ɛ kún hu hwɛ ó ɖɔhun. Amɔ̌, din ɔ́, é ɖe lě e é nɔ́ sɔ́ gbɛtɔ́ lɛ́ɛ dó húzú hwɛjijɔnɔ ɖo nukún tɔn mɛ gbɔn ɔ́ xlɛ́, ɖó é nyí hwɛjijɔnɔ, bó ná lɛ́ sɔ́ mɛ e ɖi nǔ nú Jezu lɛ́ɛ lɔmɔ̌ dó húzú hwɛjijɔnɔ.

Đó mɛ ɖěbǔ ná nyí hwɛjijɔnɔ ɖo Mawu nukún mɛ, ɖó é wa nǔ e sɛ́n lɛ́ɛ zɔ́n lɛ́ɛ wútu ǎ; ɖó nǔ e sɛ́n ɔ́ wa kpowun ɔ́ wɛ nyí ɖɔ é nɔ́ bló bɔ gbɛtɔ́ lɛ́ɛ nɔ tunwun ɖɔ émí hu hwɛ.

Mawuxówéma ɔ́ ɖɔ mɔ̌; Mawuxówéma ɔ́ ɖɔ: “Gbɛtɔ́ ɖěbǔ tíin, bó nyí hwɛjijɔnɔ ɖo Mawu nukún mɛ ǎ. Mɛ ɖokpó géé lě tíin ǎ. Mɛɖěbǔ tíin, bó mɔ nukúnnú jɛ nǔ e sɔgbe ɔ́ mɛ ǎ; mɛ ɖěbǔ ɖo Mawu ba wɛ ǎ. Gbɛtɔ́ lɛ́ɛ bǐ wɛ gosín ali ɖagbe ɔ́ jí; yě bǐ gosín ali ɖagbe ɔ́ jí ɖó kpɔ́, bó sɔ́ nyí nǔɖéwanú nú Mawu ǎ. Mɛɖěbǔ tíin bó nɔ́ wa ɖagbe ǎ; mɛ ɖokpó géé lě tíin ǎ.

Đó mǐ mɔ ɖɔ nǔ e gbɛtɔ́ ɖi nú Klísu ɔ́ wɛ nɔ zɔ́n bɔ Mawu nɔ́ sɔ́ ɛ dó húzú hwɛjijɔnɔ ná ɖo nukún tɔn mɛ; é nyí é nɔ bló nǔ e sɛ́n lɛ́ɛ zɔ́n ɔ́ wútu wɛ ǎ.

Gbeɖé kpɔ́n! Mi ɖó ná tunwun ɖɔ ényí gbɛtɔ́ lɛ́ɛ bǐ ná bo ɖo adingban ɖó wɛ ɔ́, Mawu ɔ́, nǔgbó wɛ é nyí, lě e Mawuxówéma ɔ́ ɖɔ gbɔn é; Mawuxówéma ɔ́ ɖɔ: “Xó ɖiɖɔ towe lɛ́ɛ mɛ ɔ́, è ɖǒ ná nɔ́ mɔ ɖɔ xó towe sɔgbe, bɔ è ɖɔ hwɛ xá we ɔ́, a ɖǒ ná nɔ́ ɖu ɖ'é jí.”