Popular Bible Verses from Eblée 11

Share

Nǔɖiɖi ɖíɖó wɛ nyí è nǐ ɖeji dó nǔ e ɖó nukún wɛ è ɖe ɔ́ wú; è nǐ gán jɛ nǔ e è ma mɔ ǎ é wú ɖɔ é tíin. Nǔ e gbɛtɔ́ xóxó hwenu tɔn lɛ́ɛ ɖi ɔ́ wɛ zɔ́n bɔ Mawu ɖe kúnnu ɖagbe nú yě.

Nǔgbó ɔ́, nú mɛɖé ma ɖó nǔɖiɖi ǎ ɔ́, nǔ tɔn sixú nyɔ́ Mawu nukún mɛ ǎ; ɖó mɛ e sɛkpɔ́ Mawu ɔ́ ɖó ná ɖi nǔ ɖɔ Mawu tíin, bó nɔ ná ajɔ mɛ e ɖo biba ɛ wɛ lɛ́ɛ.

Nǔɖiɖi wɛ zɔ́n bɔ mǐ mɔ nukúnnú jɛ wú ɖɔ Mawu ɔ́, xó tɔn wɛ é dó bló wɛ̌kɛ́ ɔ́ ná; nǔ e è ma sixú mɔ ǎ ɔ́ wɛ é dó bló nǔ e mɔ wɛ è ɖe ɔ́ ná.

Nǔɖiɖi e Ablaxámu ɖó ɔ́ wɛ zɔ́n bɔ hwenu e Mawu ylɔ̌ ɛ ɔ́, é se tónú n'i, bó ɖidó to e ná ná ɛ wɛ Mawu ɖe, bɔ é ná nyí étɔn ɔ́ mɛ. É gosín to é ɖésúnɔ tɔn mɛ, bó ɖidó, ma tunwun fí e é xwe é. Nǔɖiɖi e Ablaxámu ɖó ɔ́ wɛ zɔ́n bɔ é yi nɔ to e sín akpá Mawu dó n'i ɔ́ mɛ jǒnɔ ɖɔhun; goxɔ mɛ wɛ é nɔ; mɔ̌ ɖokpó ɔ́, Izáki kpó Jakɔ́bu kpó e Mawu dó akpá ɖokpó ɔ́ ná lɛ́ɛ nɔ goxɔ mɛ é ɖɔhun.

Nǔɖiɖi e Nɔwée ɖó ɔ́ wɛ zɔ́n bɔ nǔ e ɖo nǎ jɛ wɛ, bɔ Mawu ɖɔ n'i, bɔ mɛɖé ma ka ɖo mimɔ wɛ ǎ lɛ́ɛ ɔ́, é sɔ́ dó ylɔ́ nǔjɔnǔ. É se tónú nú Mawu, bó bló tɔjíhún ɖokpó, bɔ é kpódó xwédo tɔn kpó byɔ́ mɛ bó gán. Énɛ́ ɔ́, é ɖó hwɛ nú gbɛ ɔ́, bɔ Mawu sɔ́ ɛ dó mɔ hwɛjijɔnɔ gbɔn nǔɖiɖi e é ɖó ɔ́ gbla mɛ.

Nǔɖiɖi e Henɔci ɖó ɔ́ wɛ zɔ́n bɔ é ma kú ǎ. È sɔ́ ɛ yi jǐxwé, bɔ mɛɖé sɔ́ mɔ ɛ ǎ; ɖó Mawu wɛ sɔ́ ɛ yi. Mawuxówéma ɔ́ ɖɔ: cóbónú Mawu ná sɔ́ ɛ yi jǐxwé ɔ́, nǔ tɔn ko nyɔ́ nukún tɔn mɛ.

Nǔɖiɖi e Abɛ́li ɖó ɔ́ wɛ zɔ́n bɔ é sá vɔ̌ e nyɔ́ hú Kanyɛ́ɛ tɔn é nú Mawu. Nǔɖiɖi ɔ́ wɛ zɔ́n bɔ Mawu sɔ́ ɛ dó mɔ hwɛjijɔnɔ ná, ɖó Mawu ɖe kúnnu ɖagbe ɖɔ nǔ e é xwlé émí lɛ́ɛ nyɔ́. Abɛ́li ko kú cóbɔ nǔ e é wa ɔ́ ka kpo ɖo xó ɖɔ wɛ gbɔn nǔɖiɖi e é ɖó ɔ́ gbla mɛ.

Nǔɖiɖi e Sala ɖésú ɖó ɔ́ wɛ zɔ́n bɔ è nǎ ɛ hlɔ̌nhlɔ́n bɔ é mɔ xo, có é ka ko kpo bǐ, ɖó é ɖó nǔɖiɖi ɖɔ Mawu e dó akpá ɔ́ ɖo gbejí.

Đó Ablaxámu ɖo te kpɔ́n toxo ɖaxó e ɖó dodó syɛ́nsyɛ́n , bɔ Mawu ɖésú ɖe wě tɔn bó bló é.

Nǔɖiɖi e Mɔyízi ɖó ɔ́ wɛ zɔ́n bɔ hwenu e é su ɔ́, é gbɛ́ ɖɔ è nǐ ma ylɔ́ émí ɖɔ Ejípu xɔ́sú ɔ́ sín vǐ nyɔ̌nu sín vǐ ó. É yí gbe ɖɔ è nǐ dó ya nú émí kpó togun Mawu tɔn kpó; énɛ́ ɔ́ nyɔ́ n'i hú é ní mɔ vǐví e ɖo hwɛhuhu mɛ ɔ́ nú hwenu kpɛɖé. É tunwun ɖɔ nú mɛ lɛ́ɛ gbɛ́ wǎn nú émí lě e yě gbɛ́ wǎn nú Klísu gbɔn ɔ́, é kpé akwɛ́ nú émí hú dɔkun Ejípu tɔn lɛ́ɛ; ɖó nukún tɔn ɖo ajɔ e jǎwe sɔ gúdo ɔ́ wú. Nǔɖiɖi e Mɔyízi ɖó ɔ́ wɛ zɔ́n bɔ é gosín Ejípu ma ɖi xɛsi nú xomɛsin axɔ́sú ɔ́ tɔn. É kpán akɔ́n, ɖi é ɖo éyɛ́ Mawu e è ma nɔ mɔ ǎ é mɔ wɛ ɖɔhun.

Nǔɖiɖi e Ablaxámu ɖó ɔ́ wɛ zɔ́n bɔ hwenu e Mawu dó e kpɔ́n ɔ́, é sɔ́ vǐ tɔn Izáki bó ná dó sá vɔ̌ nú Mawu. Ablaxámu wɛ nyí mɛ e Mawu dó akpá ɔ́ ná é; có é ka ɖo gbesisɔ mɛ bó ná sɔ́ vǐ ɖokpónɔ tɔn dó sá vɔ̌ nú Mawu.

Nǔɖiɖi e Hlaxábu nyɔ̌nu agalɛtɔ́ ɔ́ ɖó ɔ́ wɛ zɔ́n bɔ hwenu e mɛ e ma se tónú nú Mawu ǎ lɛ́ɛ kú ɔ́, éyɛ́ kú ɖě ǎ, ɖó é yí dobanúnǔtɔ́ e Izlayɛ́li ví lɛ́ɛ sɛ́ dó ɔ́, kpódó xomɛnyínyɔ́ kpó.

Nǔɖiɖi e Izlayɛ́li ví lɛ́ɛ ɖó ɔ́ wɛ zɔ́n bɔ yě gbɔn Xu Vɔvɔ ɔ́ mɛ dín, ayǐkúngban xúxú jí gbɔn wɛ yě ɖe ɖɔhun. Lo ɔ́, ée Ejípunu lɛ́ɛ tɛ́nkpɔ́n bó ná bló nǔ ɖokpó ɔ́ é ɔ́, yě kú tɔ.

Nǔɖiɖi e Izlayɛ́li ví lɛ́ɛ ɖó ɔ́ wɛ zɔ́n bɔ hwenu e yě ɖi zɔnlin, bó lɛ́ lɛ̌ dó ahohó Jeliko tɔn xɔ azǎn tɛ́nwe ɔ́, ahohó ɔ́ mu.

Nǔɖiɖi e Mɔyízi ɖó ɔ́ wɛ zɔ́n bɔ é ɖó Dǐndínwáyi sín xwe ɔ́ ayǐ, bó ná gbe ɖɔ è nǐ mì hun dó hɔn lɛ́ɛ wú, bónú wɛnsagun e nɔ hu mɛ ɔ́ ma hu nukɔngbéví Izlayɛ́li ví lɛ́ɛ tɔn ó.

Nǔɖiɖi e Jozɛ́fu ɖó ɔ́ wɛ zɔ́n bɔ ée é kpo kpɛɖé bɔ é ná kú ɔ́, é ɖɔ xó dó hwenu e Izlayɛ́li ví lɛ́ɛ ná gosín Ejípu é wú, bó ɖɔ lě e è nǎ wa xú tɔn lɛ́ɛ sín nǔ gbɔn é.

Nǔɖiɖi e Jakɔ́bu ɖó ɔ́ wɛ zɔ́n bɔ hwenu e é kpo kpɛɖé bɔ é ná kú ɔ́, é xo ɖɛ dó Jozɛ́fu ví lɛ́ɛ ɖokpó ɖokpó jí; kpogɛ tɔn jí wɛ é gán jɛ bó sɛn Mawu.

Nǔɖiɖi e Izáki ɖó ɔ́ wɛ zɔ́n bɔ é tún acɛ dó Jakɔ́bu kpó Esawu kpó jí, bó ɖɔ lě e nǔ ná nɔ gbɔn nú yě sɔ gúdo ɔ́ nú yě.