Popular Bible Verses from Efɛ́zinu 4

Share

Mi nyɔ́ xomɛ dó miɖée wú, bó nɔ́ sɔ́ hwɛ kɛ miɖée, lě e Mawu sɔ́ hwɛ kɛ mi ɖo Klísu mɛ gbɔn é.

Mi nɔ sɔ́ miɖée hwe hwebǐnu; mi nɔ ɖó xomɛfífá, bó nɔ́ ɖó suúlu. Mi nɔ mɔ miɖée gbɔ ɖo wǎn yíyí mɛ.

Xó nyanya ɖěbǔ má nɔ tɔ́n sín nu mitɔn mɛ ó. Xó ɖagbe e ná dó alɔ mɛ nǔgbomɛ hwenu é, xó e ná wa ɖagbe nú mɛ e ɖo tó ɖó mi wɛ lɛ́ɛ kɛ́ɖɛ́ wɛ ná nɔ́ tɔ́n sín nu mitɔn mɛ.

Mi jó akpɔmimɔ dó; mi jó aɖi ɖíɖó dó, bó jó xomɛsin dó; mi jó jlɛɖiɖɔ dó, bó jó mɛnúɖiɖɔ dó. Mi jó adǎkaxixo bǐ dó.

Ényí mi sin xomɛ hǔn, mi cɔ́ miɖée bó ma jɛ hwɛ mɛ ó; hwe ma yi xɔ dó xomɛsin mitɔn ó. Mi ma ná tɛn awǒvi bónú é tɛ́n mi kpɔ́n ó.

Hǔn mi ɖó ná ɖe mɛ e mi nyí ɖ'ayǐ xóxó ɔ́ nyi ayǐ. Mɛ e mi nyí ɖ'ayǐ xóxó ɔ́ wɛ nɔ sɔ́ lě e mi nɔ zán gbɛ mitɔn gbɔn ɖ'ayǐ ɔ́ dó ayi mɛ nú mi. É wɛ jlǒ tɔn e nɔ blɛ́ mɛ lɛ́ɛ nɔ hɛn bú. Ayixa mitɔn kpódó linlin mitɔn kpó ɖó ná húzú bǐ kpéte. Mi sɔ́ mɛ yɔ̌yɔ́ e Mawu bló, bɔ é cí é ɖésúnɔ ɖɔhun ɔ́ dó. Mɛ yɔ̌yɔ́ énɛ́ nɔ́ ɖe éɖée xlɛ́ ɖo gbɛ jlɔ́jlɔ́, gbɛ mímɛ́ e nǔgbó ɔ́ nɔ sɔ́ dó ayi mɛ nú mɛ ɔ́ mɛ.

Mi dó gǎn, bó sɔ́ fífá e dɔn mi cá, bɔ mi nyí ɖokpó ɔ́ dó hɛn bǔteninɔ e Yɛsinsɛn ná mi ɔ́ ɖó te.

É wɛ ná nǔníná vovo gbɛtɔ́ lɛ́ɛ. É ná, bɔ mɛɖé lɛ́ɛ nyí mɛsɛ́dó, bɔ mɛɖé lɛ́ɛ nyí gbeyíɖɔ Mawu tɔn, mɛɖé lɛ́ɛ nyí Mawuxójlátɔ́, bɔ mɛɖé lɛ́ɛ nyí nukɔntɔ́, bó nyí nǔkplɔ́nmɛtɔ́. É bló mɔ̌, bó ná bló mɛɖeɖóvo Mawu tɔn lɛ́ɛ ɖó, bɔ yě ná sixú wa azɔ̌ e nyí klísusɛntɔ́ tɔn é; é ná bló bɔ agun e nyí agbaza Klísu tɔn ɔ́ ná yi nukɔn ɖo nǔɖiɖi mɛ, káká bɔ mǐ ná nɔ bǔ ɖo nǔɖiɖi mɛ, bó ná nɔ bǔ ɖo nukúnnú mɔ jɛ Mawu ví ɔ́ wú mɛ; mǐ ná nyí mɛxó ɖo nǔɖiɖi mɛ, bó ná mɔ hlɔ̌nhlɔ́n, lobo ná sɔ ga Klísu, bɔ nǔ bǐ ná vɔ ɖ'é wú.

Énɛ́ ɔ́, mǐ sɔ́ ná cí yɔkpɔ́vú lɛ́ɛ ɖɔhun, bɔ mɛblɛ́ɖutɔ́ lɛ́ɛ ná sɔ́ nǔkplɔ́nmɛ yětɔn lɛ́ɛ dó gba ayi dó nú mǐ, bɔ mǐ ná nɔ xo yi aɖisí, bó ná nɔ́ xo yi amyɔ, lě e aslɔkɛ́ kpó jɔhɔn kpó nɔ́ dó ya nú tɔjíhún gbɔn ɖo tɔjí é ɖɔhun ǎ. Đó mɛblɛ́ɖutɔ́ lɛ́ɛ ɔ́, nǔ e yě sɔ́ sísɛ́ yětɔn dó wa é wɛ yě nɔ́ zé dó dɔn mɛ dó nǔ nyanya mɛ. Lo ɔ́, mǐ ɖo nǔgbó ɔ́ jlá wɛ kpódó wǎn yíyí kpó ɔ́, mǐ ná ɖo nukɔn yi wɛ ɖo nǔ bǐ mɛ, bó ná ɖo sisɛkpɔ́ Klísu e nyí ta ɔ́ wɛ.