Popular Bible Verses from 1 Timɔtée 2

Share

Đó Mawu ɖokpó géé wɛ tíin; ɖɛ̌mɛnu ɖokpó géé wɛ tíin ɖo Mawu kpódó gbɛtɔ́ lɛ́ɛ kpán tɛ́ntin. Đɛ̌mɛnu ɔ́ wɛ nyí Klísu Jezu e nyí gbɛtɔ́ é. Klísu Jezu énɛ́ ɔ́ wɛ sɔ́ éɖée jó, bó dó xɔ gbɛ nú mɛ bǐ. Ée hwenu e Mawu ɖó ɔ́ wá su ɔ́, lě e é ɖe xlɛ́ ɖɔ Mawu jló ɖɔ gbɛtɔ́ lɛ́ɛ bǐ ní mɔ hwlɛngán gbɔn é nɛ́.

Nǔ nukɔntɔn e zɔ́n mi wɛ un ɖe ɔ́ wɛ nyí ɖɔ mi ní nɔ sa vo nú Mawu; mi nɔ xo ɖɛ; mi nɔ byɔ́ nǔ Mawu; mi nɔ dó kú n'i; mi ná nɔ bló nǔ énɛ́ lɛ́ɛ, ɖó gbɛtɔ́ lɛ́ɛ bǐ tamɛ. Mi xo ɖɛ nú axɔ́sú lɛ́ɛ kpódó mɛ e sín alɔ mɛ acɛkpikpa ɖe lɛ́ɛ bǐ kpán, bónú mǐ ná sixú mɔ vivo kpódó fífá kpó, ɖo sísí titewungbe ɖó nú Mawu kpódó jijɔ ɖagbe zínzán kpó mɛ.

Un jló ɖɔ súnnu lɛ́ɛ ɖo fí ɖěbǔ hǔn, yě ní nɔ xo ɖɛ, yě ní nɔ zé alɔ dó jǐ, bó nɔ xo ɖɛ kpódó ayi mímɛ́ kpó; yě ní ma nɔ sin xomɛ ó, yě ma ka nɔ ɖɔ jlɛ ó. Un lɛ́ jló ɖɔ nyɔ̌nu lɛ́ɛ ní nɔ́ sɔ́nǔ lě e é jɛ xá gbɔn é, ɖo yɛ̌yi mɛ, ɖo jlɛ̌ jí. Nǔ e nyɔ̌nu lɛ́ɛ ná dó ba acɔ́ ná ɔ́ wɛ nyí ɖa gɛ́dɛ́gɛ́dɛ́ blóbló ǎ; sikánúdídó, jɛ̌dídó abǐ avɔ xɔ akwɛ́ gbígbá ǎ; lo ɔ́, nǔ e yě ná nɔ dó ba acɔ́ ná ɔ́ wɛ nyí nǔ ɖagbe wiwa, lě e é jɛ xá ɖɔ nyɔ̌nu e nɔ sí Mawu lɛ́ɛ ní nɔ bló gbɔn é.