Popular Bible Verses from 1 Jǎan 4

Share

Xɛsi ɖo wǎn yíyí mɛ ǎ; wǎn yíyí e sɔgbe bɔ nǔ bǐ vɔ ɖ'é wú ɔ́ nɔ nya xɛsi tɔ́n. Tódɔnnúmɛ wɛ nɔ dɔn xɛsi wá; ɖó mɛ e ɖo xɛsi ɖi wɛ ɔ́, mɛ énɛ́ ɔ́ ɖó wǎn yíyí bɔ nǔ bǐ vɔ ɖ'é wú ǎ.

Vǐ ce lɛ́ɛ mi, midɛɛ lɛ́ɛ ɔ́, Mawu tɔn wɛ mi nyí, bó ka ko ɖu ɖo gbeyíɖɔmawutɔn-nyíjɛtɔ́ lɛ́ɛ jí, ɖó Yɛ e ɖo midɛɛ lɛ́ɛ mɛ ɔ́ hú gǎn ée ɖo azɔ̌ wa wɛ ɖo mɛ e nyí gbɛ ɔ́ tɔn lɛ́ɛ mɛ é.

Mǐdɛɛ lɛ́ɛ ɔ́, mǐ yí wǎn nú Mawu, ɖó é wɛ yí wǎn nú mǐ jɛ nukɔn.

Mɛvívɛ́ná ce lɛ́ɛ mi, mi nú mǐ ná yí wǎn nú mǐɖée, ɖó wǎn yíyí ɔ́, Mawu gɔ́n wɛ é gosín. Mɛ ɖěbǔ ɖó wǎn yíyí nú mɛ hǔn, Mawu ví wɛ é nyí, bó tunwun Mawu.

Mɛ e ma yí wǎn nú mɛ ǎ ɔ́ tunwun Mawu ǎ, ɖó Mawu ɔ́, wǎn yíyí wɛ é nyí.

Wǎn yíyí énɛ́ ɔ́, nǔ e ɖ'é mɛ é ɖíe: ényí mǐdɛɛ lɛ́ɛ wɛ yí wǎn nú Mawu jɛ nukɔn ǎ; éyɛ́ wɛ yí wǎn nú mǐ jɛ nukɔn, bó sɛ́ vǐ tɔn dó, bɔ é sɔ́ éɖée dó sá vɔ̌, bónú Mawu ná sɔ́ hwɛ mǐtɔn lɛ́ɛ kɛ mǐ.

Mɛvívɛ́ná ce lɛ́ɛ mi, ée Mawu yí wǎn nú mǐ gbɔn mɔ̌ ɔ́, mǐ lɔ ɖó ná yí wǎn nú mǐɖée.

Lě e Mawu ɖe wǎn yíyí e é ɖó nú mǐ ɔ́ xlɛ́ mǐ gbɔn ɔ́ ɖíe: é sɛ́ vǐɖokpónɔ tɔn dó gbɛ ɔ́ mɛ, bónú mǐ ná nɔ gbɛ gbɔn jǐ tɔn.

Ényí mɛɖé ka ɖɔ émí yí wǎn nú Mawu, bó ka gbɛ́ wǎn nú nɔví tɔn hǔn, adingbannɔ wɛ é nyí; ɖó mɛ e ma yí wǎn nú nɔví tɔn e mɔ wɛ é ɖe ɔ́ ǎ ɔ́, nɛ̌ é ka na sixú yí wǎn nú Mawu e mɔ wɛ é ma ɖe ǎ é gbɔn?

Mɛ e ɖɔ Jezu nyí Mawu ví ɔ́, Mawu ɖo mɛ énɛ́ mɛ, bɔ mɛ ɔ́ lɔ ɖo Mawu mɛ.

Hǔn sɛ́n e Mawu ná mǐ ɔ́ ɖíe: mɛ e yí wǎn nú Mawu ɔ́ ɖó ná yí wǎn nú nɔví tɔn lɔmɔ̌.

Mɛvívɛ́ná ce lɛ́ɛ mi, mi ma nɔ ɖi nǔ nú mɛ e ɖɔ émí ɖó Yɛ Mawu tɔn lɛ́ɛ é bǐ ó, mi nɔ to dó yě kpɔ́n hwɛ̌, bó ná kpɔ́n ɖɔ Yɛ Mawu tɔn ɔ́ jɛ́n ɖo yě mɛ nǔgbó ají; ɖó gbeyíɖɔmawutɔn-nyíjɛtɔ́ gěgé ko gba kpé gbɛ ɔ́ mɛ din. Lě e mi ná tunwun mɛ e ɖó Yɛ Mawu tɔn lɛ́ɛ gbɔn ɔ́ ɖíe: mɛ ɖěbǔ ɖɔ Jezu Klísu zɔn agbaza mɛ bo wá hǔn, mɛ énɛ́ ɖó Yɛ Mawu tɔn.

Mɛ ɖěbǔ ma ka yí gbe ɖɔ Jezu Klísu zɔn agbaza mɛ wá ǎ hǔn, mɛ énɛ́ ɖó Yɛ Mawu tɔn ǎ; Kɛntɔ́ Mawu tɔn ɔ́ sín yɛ wɛ é ɖó. Mi ko se ɖɔ yɛ énɛ́ ná wá, bɔ é ka ko ɖo gbɛ ɔ́ mɛ din.