Popular Bible Verses from Isaias 41

Share

Dikay agbuteng—addaak kadakayo! Siak ti Diosyo— diyo ipalubos nga adda mangbutbuteng kadakayo. Papigsaen ken tulongankayo; salakniban ken isalakankayo.

Siak ni Yahweh a Diosyo; Papigsaenkayo ket kunak kadakayo, ‘Dikay agbuteng, tulongankayo.’”

“Dagiti gumurgura kadakayo, maparmekdanto ket ammodanto ti rikna ti pannakaibabainda. Matayto dagiti manggubat kadakayo, ket mapukawdanto iti rabaw ti daga.

Innalakayo kadagiti pungto ti daga; inayabankayo kadagiti kaadayoan a sulina, ket kinunak kadakayo, ‘Dakayo ti adipenko.’ Saankayo a linaksid no di ket pinilikayo.

Birokenyonto dagiti kabusoryo ngem diyonto masarakan ida. Dagiti manggubat kadakayo awanto ti kapaypay-anda.

Kuna ni Yahweh, “Israel, uray no bassit ken nakapuyka, saanka nga agbuteng ta tulonganka. Siak a Nasantoan a Dios ti Israel, siak ti mannubbotmo.

“Ngem sika, Israel nga adipenko, sika, Jacob a pinilik, dagiti kaputotan ni Abraham a gayyemko.

Pagayusekto't karkarayan kadagiti turod a natikag; pataudekto dagiti ubbog nga agayus kadagiti tanap. Pagbalinekto a libtong ti let-ang, ket pagayusekto a kas ubbog ti namaga a daga.

“Inton agbirok dagiti tattaok iti danum gapu iti rigatda, inton mamagaan ti karabukobda iti wawda, siak, ni Yahweh, ipangagkonto ti kararagda; siak a Dios ti Israel, diakto baybay-an ida.

Siasino ti akin-aramid iti daytoy? Siasino ti nangikeddeng iti pannagna ti historia? Siak, ni Yahweh, addaak idi punganay, wen, addaakto iti kamaudianan.

Iti let-ang, pagtuboekto dagiti sedro, kasta met dagiti akasia, arrayan ken olibo. Agbalinto a kabakiran ti natikag a daga, kabakiran a pagtuboan ti saleng, aruo ken parwa. Makitanto daytoy dagiti tattao ket maammoanda a siak, ni Yahweh, ti akin-aramid. Maawatanda a ti Nasantoan a Dios ti Israel ti nangaramid iti daytoy.”