Popular Bible Verses from Songs 143

Share

Teach me how fo do Wat you like me fo do, Cuz you da God fo me. I like fo yoa good Spirit show me How fo walk strait so I no jam up. Jalike I stay walk on top flat groun.

Ery day, morning time, I like hear from you Bout how you stay tight wit me, Cuz I stay trus you fo eryting inside. Let me know da way I suppose to go, Cuz you da One fo me talk to.

Da One In Charge, get me outa trouble From da peopo dat stay agains me. I come to you fo you hide me.

Da One In Charge, keep me alive, Fo me show peopo wat kine god you! You do da right ting erytime, So get me outa trouble!

Eh! You Da One In Charge! Try lissen wen I pray to you. Cuz I stay beg you fo help me, Lissen up! Do someting fo help me, Cuz I know I can trus you An I know you do Da right ting erytime.

Try do someting fo me real quick, Da One In Charge! Cuz I desperate! No look da odda way Fo me no see yoa face! Cuz if I no stay tight wit you, I goin come jalike da odda guys Dat go down da Deep Dark Hole.

I no foget how was, Long time befo time. I tink plenny Bout all da tings you stay do, An da tings you wen do befo time.