Popular Bible Verses from Smart Guys 22

Share

Help yoa kids start fo go da right way wen dey small. Den, even wen dey come ol, Dey no goin go da odda way.

Wen you make um so you come jalike you notting, An you feel jalike you sked Wen you come in front Da One In Charge, Den you goin get plenny stuffs, An peopo goin show you respeck, An you goin live long time.

Mo betta get good name from da peopo, Den own plenny kine stuffs. If peopo tink you one good guy, Az mo betta den silva an gold.

No come frenz wit da kine guys Dat get mad bout eryting. No hang out wit da kine guys Dat come huhu weneva someting happen.

Whoeva like do good tings fo peopo, God goin do good tings fo dem, Cuz dey give some a dea food To da peopo dat no mo notting.

Da akamai kine peopo see Someting bad goin happen, An dey go hide. But da peopo dat donno notting An easy fo bulai dem, Dey keep going, An bumbye, dey pay da price.

Da rich guys tell da guys dat no mo notting Wat dey gotta do. Same ting, da guys dat borrow money, Dey jalike one slave dat gotta do Wateva da guy tell um fo do Dat lend um da money.

Da rich peopo an da peopo dat no mo notting, Dey same same. Da One In Charge Him da One make all dem.

No go bus up one guy dat need plenny An rip off his stuffs, Jus cuz you know you can. No go bring one guy dat no can pay notting, In front da judge guys fo sue um, Cuz Da One In Charge, him goin be da One Dat goin help dose guys in front da judge. An fo da ones dat take away stuff from dem, He goin take away dea life!