Popular Bible Verses from Smart Guys 13

Share

Hang out wit smart kine guys, You come smart jalike dem. But if you good frenz wit stupid peopo, You goin come jalike dem, an suffa.

Da peopo dat watch how dey talk, Dey stay alive long time cuz a dat. Da peopo dat no kea how dey talk, Dey come wipe out cuz a dea big mout.

Da peopo dat no do notting Wen dea kids do someting bad, Dat mean, dey tink da kid no good. Da peopo dat get plenny love an aloha fo dea kids, Dey make shua dey teach um da right way Wen dey still yet small kid.

Wen you wait long time fo someting good, An no get um, Make you lose fight an come sick. But wen you wait long time fo someting good, Den you get um, You feel alive inside!

Wen get peopo do da right ting, Dey make shua fo do stuff da right way all da time. Wen get bad kine peopo, Dey all jam up, cuz dey do bad kine stuff.

Wen you no do notting fo da stuff you get, Bumbye no moa. Da kine guy dat work fo get stuff, Bumbye he goin get plenny.

Da kine guys dat tink dey so smart, Dey ony like make argue all da time. Da kine guys dat lissen smart peopo Fo tink out wat da bestes ting fo do, Dey da ones dat know wat fo do erytime.

Da good kine peopo, dey save till dey mahke Fo da kids an da grankids get plenny from dem. Da peopo dat do bad kine stuff, dey save plenny stuff, But da whole ting go to da peopo dat do da right ting.

You get somebody dat know wat fo do erytime, Dat mean dea faddah make dem learn. But da buggahs dat no mo respeck fo nobody Cuz dey tink dey so smart, Dass why dey no lissen, neva mind you scold dem.

Da kine peopo dat no lissen Even wen dey tell um fo learn wass right, Dey goin come shame, Cuz dey no mo notting. But da kine peopo dat lissen good Wen you tell dem dat dey wen jam up, Bumbye, dey goin get plenny respeck.