Popular Bible Verses from Fa‘ata‘oto 13

O lē latou te feoa‘i ma tagata popoto, e poto lava ia; a o le uō a ē vālelea, e leaga ai lava ia.

O lē na te leoleo i lona gutu, e tausia e ia lona agaga; a o lē fa‘amaga ona laugutu, e ‘iā te ia le malaia.

O lē ‘ua tu‘una lana sasa, ‘ua ‘ino‘ino o ia i lona atali‘i; a o lē ‘ua alofa ‘iā te ia, ‘ua sā‘ili le a‘oa‘iga mo ia.

O le fa‘amoemoe ‘ua tuai ‘ona taunu‘u e fa‘anoanoa ai le loto; a o le mana‘o ‘ua taunu‘u, o le la‘au o le ola lea.

O lē amiotonu e leoleoina ai lē ‘ua sa‘o lana amio; a o lē amio leaga e lafotūina ai lē ‘ua agasala.

E fa‘aitiitia le ‘oloa i lē fai mea fa‘atauva‘a; a o lē fa‘aputu mea i galuega, e fa‘ateleina ana mea.

Na o le fa‘amaualuga lava e tupu ai le misa; a o ē filifili, e popoto i latou.

O le tagata lelei na te tofia ana mea i le fānau a lana fānau; a o le ‘oloa o le tagata agasala, e teua lea mo lē amiotonu.

E fa‘alogo le atali‘i poto i le a‘oa‘o atu a lona tamā; a o lē fa‘atauemu, e lē fa‘alogo ia i le a‘oa‘iga.

O le mativa ma le fa‘amāina, e i ai ia i lē na te te‘ena mea e a‘oa‘oina; a o lē ‘ua usiusita‘i i le a‘oa‘iga, e mamalu lava ia.