Popular Bible Verses from Isaia 41

Share

‘Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.

Auā o a‘u o le ALI‘I lou Atua, o lē ‘ua tāofi lou lima taumatau; O lē ‘ua fai atu ‘iā te oe, “‘Aua ‘e te fefe, o a‘u, ‘ou te fesoasoani ‘iā te oe.”

Fa‘auta, e mamā ma māsiasi i latou uma o ē ita ‘iā te oe; e ‘avea i latou e peiseaī ‘ua leai; e fano fo‘i i latou o ē finau atu ‘iā te oe.

O oe lē na ‘ou ‘aumaia i tulu‘iga o le lalolagi, na a‘u vala‘auina fo‘i oe i ona itū mamao, na ‘ou fai atu fo‘i ‘iā te oe. “O oe o la‘u ‘au‘auna, o lē na ‘ou filifilia, ‘ou te le‘i lafoa‘iina oe.”

‘E te sā‘ilia i latou, a ‘e te lē maua i latou o ē fai oe mo latou fili. E ‘avea i latou peiseaī ‘ua leai, e peiseaī ‘ua matuā leai lava e na tau ma oe.

‘Aua ‘e te fefe, le anufe Iakopo e, ma tagata o Isaraelu; o a‘u, ‘ou te fesoasoani ‘iā te oe. ‘Ua fetalai mai ai le ALI‘I, o lē na fa‘atauina oe, le Pa‘ia o Isaraelu.

A o oe Isaraelu e la‘u ‘au‘auna, o oe Iakopo e, lē na ‘ou filifilia, o le fānau a Aperaamo la‘u uō.

‘Ou te su‘ena vaitafe i luga o mauga tula, ma vaipuna i vanu. ‘Ou te faia le vao lafulafuā ma vailepa, ‘ou te faia fo‘i le lau‘ele‘ele naumati ma vaipuna.

O ē ‘ua tigāina ma ē matitiva o lo‘o latou sā‘ili i se vai, a ‘ua leai; ‘ua matūtū o latou laulaufaiva i le fia inu. O a‘u o le ALI‘I, ‘ou te tali atu ‘iā te i latou, o a‘u o le Atua o Isaraelu, ‘ou te lē tu‘ulafoa‘iina i latou.

O ai ‘ea ‘ua ia saunia ma na faia, o lē vala‘au i tupulaga talu mai le amataga? O a‘u o le ALI‘I, o lē muamua e fa‘atasi fo‘i ma lē mulimuli, o a‘u lava ia.

‘Ou te avatu i le lau‘ele‘ele lafulafuā le arasi, ma le setima, ma le atasi, ma le la‘au e maua ai le suāu‘u. ‘Ou te tu‘uina atu fo‘i i le toafa o le perosi, o le titara, fa‘atasi ma le tasura. ‘Ina ‘ia latou va‘ai, ma latou iloa, ma mafaufau ma fa‘autauta fa‘atasi. O le ‘a‘ao lava o le ALI‘I na faia ai lea mea, o le Pa‘ia o Isaraelu ‘ua na faia lava.