Popular Bible Verses from Isaia 42

Share

O a‘u o le ALI‘I, na ‘ou vala‘auina oe i le amiotonu; ‘ou te tāofimauina lou lima ma a‘u leoleo ‘iā te oe. ‘Ou te avatua fo‘i oe e fai ma feagaiga a le nu‘u, o le malamalama o nu‘u ‘ese. E fa‘apupula i mata o ē tauaso, e ‘aumaia i fafo nai le fale puipui lē ‘ua fusifusia, ‘atoa ma ē ‘ua nonofo i le pogisā ‘ia ‘aumaia i latou nai le fale ‘ua tāofiina ai.

O a‘u o le ALI‘I, o lo‘u igoa lea; o lo‘u mamalu fo‘i ‘ou te lē avatua lea i se tasi ma lo‘u vi‘iga ‘ou te lē avatua i tupua ‘ua ta.

‘Ua fetalai mai le ALI‘I: Fa‘auta i la‘u ‘au‘auna, ‘ou te tāofia o ia i luga; o lē na a‘u filifilia ‘ua fiafia i ai lo‘u loto. ‘Ua ‘ou tu‘uina atu lo‘u Agaga i ona luga; na te avatua le fa‘amasinoga mo nu‘u ‘ese.

O le u gapēpē na te lē gausia; o le vavae ‘ua mū itiiti na te lē tineia; o le fa‘amaoni na te avatu ai le fa‘amasinoga. E lē mū itiiti o ia, e le gapēpē fo‘i o ia, se‘ia na fa‘atūina le fa‘amasinoga i le lalolagi; e fa‘atalitali fo‘i nu‘u tu matāfaga i lana tulafono.

‘Ou te ta‘ita‘iina ē ‘ua tauaso i le ala sa latou lē iloa; ‘ou te ‘aumaia i latou i magāala sa latou lē iloa. ‘Ou te liua le pouliuli i le malamalama i o latou luma, ma ala pi‘opi‘o e fai ma ala sa‘o. O mea lava ia ‘ou te faia ‘iā te i latou, ‘ou te lē lafoa‘iina fo‘i i latou.

O mea muamua, fa‘auta, ‘ua o‘o mai ia; o mea fou fo‘i o lo‘o ‘ou te ta‘uina atu; ‘ua ‘ou fa‘ailoa atu ‘iā te ‘outou, a o le‘i tutupu mai.