Popular Bible Verses from Isaia 40

Share

Na te avatua le malosi i ē ‘ua vaivai; a o ē ‘ua leai se malosi, na te fa‘atuputele i ai le malosi.

E vaivai ma tigāina tama matutua; o taulele‘a fo‘i, e pa‘u‘ū lava i latou. A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.

‘E te lē iloa ‘ea? ‘E te le‘i fa‘alogo ai ‘ea? O le Atua o le vavau, o le ALI‘I o lē na faia tulu‘iga o le lalolagi. E lē vaivai o ia, e le tigāina fo‘i, e lē masu‘esu‘eina lona mafaufau.

O le leo o lē ‘ua ‘alaga i le vao: “‘Inā teuteu ia ‘outou le ala o le ALI‘I; ‘ia ‘outou fa‘alauleleia le ala tele i le vao lafulafuā mo lo tatou Atua.

E magumagu le mutia, e to‘ulu le fuga; a o le afioga a lo tatou Atua, e tumau lea e fa‘avavau.

‘Ona fa‘aalia mai ai lea o le pupula o le ALI‘I, e va‘aia lava e tagata uma fa‘atasi; auā ‘ua fetalai mai ai le fofoga o le ALI‘I.”

O vanu uma e fa‘aeaina ia; o mauga uma ma mea maupu‘epu‘e e fa‘amaulaloina ia. O mea fa‘afatiatama‘i e fai ma mea fa‘alaugatasi ia, ma mea gaoā e fai ma mea laulelei.

Na te leoleoina lona lafu e pei o le leoleo mamoe; na te sapaia tama‘i mamoe i ona lima, ma tau‘ave i latou i lona fatafata; na te ta‘ita‘i filemū i mamoe ‘ua fānanau.

Se‘i tetepa a‘e i luga ma ‘outou va‘ai. Po o ai ‘ea ‘ua na faia nei mea? Na te ta‘ita‘iina mai a latou ‘au ‘ua faitauina; na te vala‘au ‘iā te i latou uma i o latou igoa; ‘ona o le tele o lona malosi ma lona mana tele; e leai so latou e lē iloa.

O ia lē ti‘eti‘e i luga o le fa‘ata‘ali‘oli‘o o le lalolagi, a o ē nonofo ai e tutusa i latou ma sē. O ia lē fofola le lagi e pei o se ‘ie manifinifi; na te fa‘amafolafolaina ai fo‘i e pei o se fale ‘ie e nofo ai.

‘Ia ‘outou fa‘amatalaloto ‘iā Ierusalema ma ‘outou ‘alalaga ‘iā te ia, ‘ua i‘u ona po o lona tigā, ‘ua tauia lana amioletonu. Auā, ‘ua na maua fa‘alua mai le lima o le ALI‘I le taui ‘ona o ana agasala uma.

‘Ua fai mai le leo, “‘Inā ‘alaga ia.” ‘Ona fai atu lea o ia, “Se a ‘ea se ‘upu ‘ou te ‘alagaina?” O tagata uma o le mutia i latou ma lo latou lelei uma, e tusa lea ma le fuga o le vao. E magumagu le mutia, e to‘ulu le fuga; auā o le mānava o le ALI‘I ‘ua agi mai i ai; e moni o le mutia lava le nu‘u.

Fa‘auta, e afio mai le Ali‘i le ATUA ma le malosi, e pule lona ‘a‘ao mo ia. Fa‘auta ‘ua ‘iā te ia lana taui, ‘ua i ona luma le totogi o lana galuega.

‘Ia ‘outou fa‘amafanafana, ‘inā fa‘amafanafana atu ia ‘outou i lo‘u nu‘u, ‘ua fetalai mai ai lo ‘outou Atua.

O ai ‘ea ‘ua na fuatia le sami i lona alofilima, ma na fuatia le lagi i le aga, ma na fuatia le ‘ele‘ele o le lalolagi i le fua fa‘a‘ofu‘ofu; ‘ua na fuatia mauga fo‘i i le fua, ma mauga iti i le fua fa‘atautau? O ai ‘ea ‘ua fuatia le atamai o le ALI‘I? O ai fo‘i se tagata e pulega fa‘atasi ma ia, ‘ua na a‘oa‘oina o ia? O ai ‘ea sē na la filifili fa‘atasi ma ia, ma na a‘oa‘o ‘iā te ia, ma na a‘oa‘o ‘iā te ia i le ala o le fa‘amasinoga; ma na a‘oa‘o ‘iā te ia ‘ia poto ai, ma na fa‘ailoa ‘iā te ia le ala o le fa‘autauta?