Popular Bible Verses from Efeso 5

Share

O lenei, ‘ia fa‘aa‘oa‘o ‘outou i le Atua, fa‘apei o le fānau pele; ma ‘ia sāvavali i le alofa, fa‘apei o Keriso fo‘i na ia alofa mai ‘iā i tatou, ‘ua na foa‘i mai fo‘i o ia lava mo i tatou, o le taulaga ma le togiola i le Atua o le mea manogi lea.

O lenei, ‘ia fa‘aeteete ‘outou ‘ina ‘ia ‘outou sāvavali ma le fa‘autauta, ‘aua ne‘i fa‘apei o ē vālelea, a ‘ia fa‘apei o ē popoto; ‘ia fa‘aaogāina e ‘outou aso o lenei olaga, auā o ona po nei ‘ua leaga.

‘Aua fo‘i ne‘i ‘onā ‘outou i le uaina, o le mea e ulavale ai; a ‘ia fa‘atumuina ‘outou i le Agaga. ‘Ia ‘outou fetautalatala‘i i salāmo, ma pese, ma siva fa‘aleagaga, ‘ia fa‘ane‘ene‘e atu ma pepese atu i le Ali‘i i o ‘outou loto. ‘Ia fa‘afetai pea lava ‘ona o mea uma i le Atua le Tamā, i le suafa o lo tatou Ali‘i o Iesu Keriso.

O lenei, ‘aua ne‘i fa‘avalea ‘outou, a ‘ia ‘outou iloa le finagalo o le Ali‘i.

O ‘outou tane, ‘ia ‘outou alolofa atu ‘iā ‘outou lava avā, fa‘apei o Keriso fo‘i ‘ona alofa mai i le ekalesia, ma foa‘iina mai o ia e ia e fai mōna sui.

auā sa ‘outou pouliuli anamua, a o lenei ‘ua ‘outou malamalama i le Ali‘i; ‘inā sāvavali ‘ia pei o ē ‘ua malamalama

‘Ia usiusita‘i le tasi i le tasi ma le mata‘u ‘iā Keriso.

O ‘outou fafine, ‘ia ‘outou usiusita‘i ‘iā ‘outou lava tane, fa‘apei ‘ona usiusita‘i i le Ali‘i.

A o ‘outou, ‘ia ta‘itasi ‘outou ma alofa i lana lava avā fa‘apei o ia lava ‘iā te ia; o le fafine fo‘i ‘ia āva o ia i lana tane.

“O le mea lea e tu‘ua ai e le tane o lona tamā ma lona tinā, ‘ae fa‘atasi ma lana avā, ‘ona ‘avea ai lea o i lā‘ua o le tino e tasi.”

‘Aua fo‘i tou te amio fa‘atasi ma galuega lē aogā a le pouliuli, ‘ae lelei ‘ona ‘outou ‘aumai ia mea i le malamalama.