Popular Bible Verses from Romanos 8

Share

Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

Yosë nosoromiatërinpoaꞌ. Nanpihuatëhuara, nosororinpoaꞌ. Chiminpatëhuantaꞌ, co patarinpoahuëꞌ. Anquëniroꞌsaꞌ, sopairoꞌsaꞌ, tanan huaꞌyanoꞌsaꞌ, inapita co nanitopihuëꞌ Yosë quëran osërëinpoasoꞌ. Ipora tahuëriꞌsaꞌ maꞌsha onpotopirinënpoahuëꞌ, co patarinpoahuëꞌ. Aꞌna tahuërintaꞌ maꞌsha onpotohuachinënpoaꞌ, co Yosë naniantarinpoahuëꞌ. Maꞌsha inápaquë yaꞌhuërinsopita, acoporoquë yaꞌhuërinsopita inapita co nanitopihuëꞌ Yosë quëran osërëinpoasoꞌ. ¡Co insontaꞌ nanitërinhuëꞌ Yosë ananiantinpoasoꞌ! Quisocristo huaꞌanëntërinpoaꞌ. Ina imarëhuaꞌ niꞌton, Yosë nosoromiatërinpoaꞌ.

Iporasoꞌ co chiníquën cancantopirëhuahuëꞌ, Ispirito Santo catahuarinpoaꞌ. Yosë nontohuatëhuara, co nitotërëhuahuëꞌ maꞌsona itacaso nipirinhuëꞌ, catahuarinpoaꞌ. Cancanënpoa quëran inari Yosë nontërin. Tarëtarinso pochin ninin. Canpoasoꞌ co natanpirëhuahuëꞌ, Yosërisoꞌ natanin.

Ina pochin Yosë yonquirinpoaꞌ niꞌquëhuarëꞌ, co insonta nanitërinhuë minsëinpoasoꞌ.

Napoaton iporasoꞌ Quisocristo imapatëhuaꞌ, co huachi anaꞌintinpoasoꞌ yaꞌhuërinhuëꞌ.

Co noyahuëꞌ nicacasoráchin paꞌyatohuatëhuara, chimipi pochin niconëhuaꞌ. Co Yosë nohuitërëhuahuëꞌ. Nipirinhuëꞌ, Ispirito Santo paꞌyatatëhuaꞌ natëhuatëhuaꞌ, Yosë nohuitatëhuaꞌ, nanpimiatarihuaꞌ. Noya yonquiatëhuaꞌ, sano cancantarihuaꞌ.

Ina nipirinhuëꞌ, Quisocristo nosororinpoaꞌ. Parisitapirëhuahuëꞌ, nani tahuëri catahuarinpoaꞌ sopai minsëcaso marëꞌ. Nóya cancantarëhuaꞌ.

Isoroꞌpaquë piꞌpian parisitarihuarahuëꞌ, ama ina yonquiaꞌahuasohuëꞌ. Ama ina marëꞌ sëtahuasohuëꞌ. Aꞌna tahuëri Yosëꞌpaꞌ noya noya yaꞌhuëcontarihuaꞌ. Ina yonquiatëhuaꞌ, nóya cancantahuaꞌ tënahuë.

Tëhuënchachin Quisocristo nosororinpoaꞌ. Co insontaꞌ nanitërinhuë ina quëran osërëinpoasoꞌ. Aꞌna tahuëri parisitërëhuaꞌ. Parisitatëhuaꞌ, co napion cancantërëhuaꞌ. Piyapiꞌsaꞌ aparisitërinënpoaꞌ. Cosharoꞌ, maꞌsha inapita pahuantërinpoaꞌ. Maꞌsha onpochináchin nisarëhuaꞌ. Yatëparinënpoaꞌ. Inapopirëhuahuëꞌ, ¡co inapita nanitapihuëꞌ Quisocristo quëran osërëinpoasoꞌ!

Yaꞌipi yonquirëhuasopita Yosë nitotërin. Ispirito Santori nontohuachina, natanin. Yosë nohuantërinso chachin nitotaton, canpoa marëꞌ noya nontërin.

Ispirito Santo nohuantërinsoꞌ natëhuatëhuaꞌ, Yosë huiꞌninpoa chachin nisarëhuaꞌ.

Co noyahuëꞌ yonquihuatëhuara, co noyahuëꞌ nicacasoáchin paꞌyatërëhuaꞌ. Nipirinhuëꞌ, Ispirito Santo natëhuatëhuaꞌ, Yosë nohuantërinsoáchin paꞌyatarëhuaꞌ.

Yosë chachin nosoroatonpoaꞌ co huiꞌnin tërantaꞌ apiratërinpoahuëꞌ. Isoroꞌpaquë aꞌpaimarin chiminacaso marëꞌ. Canpoa marëꞌ chiminin. Ipora chachintaꞌ nosoroatonpoaꞌ, catahuarinpoaꞌ. ¡Quisocristo imarëhuaꞌ niꞌton, co mantaꞌ pahuantarinpoahuëꞌ Yosë pochin cancantacaso marëꞌ! Nóya nichaꞌësarinpoaꞌ.

Ispirito Santo chachin cancanënpoa quëran anitotërinpoaꞌ. “Huiꞌninpita pochachin Yosë niꞌninquëmaꞌ,” itërinpoaꞌ. Huiꞌninpoaꞌ niꞌton, naꞌcon naꞌcon catahuarinpoaꞌ. Aꞌna tahuëri yaꞌhuërinꞌpaꞌ noya acoarinpoaꞌ. Quisocristo noya acorinso pochin acoarinpoaꞌ canpoantaꞌ. Ina imarëhuaso marëꞌ aparisitopirinënpoahuëꞌ, inapochachin inarëꞌquënpoaꞌ noya noya yaꞌhuëcontarihuaꞌ.

Co noyahuëꞌ nicacasoráchin paꞌyatohuatëhuaꞌ, Yosë inimicotarëhuaꞌ. Co Yosë pënëntërinsoꞌ natëcasoꞌ nohuantarëhuahuëꞌ. Co nanitarëhuahuëꞌ ina natëcasoꞌ.

Naporoꞌ Quisocristo imarëhuasopita noya noya yaꞌnoarihuaꞌ. Yaꞌipi maꞌsha isoroꞌpaquë yaꞌhuërinsopitantaꞌ ina tahuëri ninarapi.

Iráca quëran huarëꞌ maꞌsharoꞌsaꞌ parisitopi. Sharoꞌsantaꞌ papotopirinhuëꞌ, co noyatërinhuëꞌ, chiminin. Ipora huantaꞌ sanapi huaꞌhua iquitohuachina, iquitërinso pochin chiníquën parisitapi.