Popular Bible Verses from Colosenses 3

Share

Ama yaiꞌhuërëtocosohuëꞌ. Aꞌnapita noꞌhuihuachinquëmaꞌ, nanan anoyatocoꞌ. Maꞌsha onpotopirinquëmaontaꞌ, naniantocoꞌ. Sinioro oshanëmaꞌ nani inquitërinquëmaꞌ. Ina nonanatomaꞌ, canpitantaꞌ nanan anoyatocoꞌ.

Ama maꞌsharáchin yonquicosohuëꞌ. Yosëꞌpaꞌ yaꞌhuërinsopita yonquirácoꞌ.

Maꞌsona tërantaꞌ nipatamaꞌ, noya nicoꞌ. Co piyapi marëáchin sacatëramahuëꞌ. Yosë imaramaꞌ niꞌton, ina marëꞌ sacataramaso pochin cancantatomaꞌ, nóya sacatocoꞌ.

Yosë nosoroatonpoaꞌ, huayoninpoaꞌ noya nicacaso marëꞌ. Napoaton yaꞌipi piyapiꞌsaꞌ nosoroatomaꞌ, noya nontocoꞌ. Nasha aꞌmorëso pochin noyápiachin cancantocoꞌ. Ama nocantocosohuëꞌ. Nani tahuëriya yonquicoꞌ aꞌnapita catahuacaso marëꞌ. Sano nicatomaꞌ, noya nontocoꞌ. Maꞌsha onpoapomarahuëꞌ, ahuantocoꞌ.

Yaꞌipi Quisocristo nanamën yonquirácoꞌ. Naꞌcon ina yonquicoꞌ. Noya nitotatomaꞌ, niaꞌchintocoꞌ, nipënëncoꞌ. Yosë cantanën nisha nisha nininsopita cantacoꞌ. Sarmo quirica nontatomaꞌ, inantaꞌ cantacoꞌ. Canpitaora yonquinëma quëraontaꞌ ocoirahuatomaꞌ, cantacoꞌ: “Ma noyanquëncha Tata niꞌton, catahuarancoi paya,” itatomaꞌ, cancanëma quëran huarëꞌ cantacoꞌ. Maꞌsona tërantaꞌ yanipatamaꞌ, Sinioro Quisoso yonquiatomaꞌ, nicoꞌ. Ina yonquiatomaꞌ, noya noncoꞌ. Quisoso catahuarinquëmaꞌ niꞌton, “Yosparinquën,” Tata Yosë itocoꞌ.

Nóya ninosorocoꞌ. Ina naꞌcon naꞌcon Yosë nohuantërin. Noya ninosorohuatëhuaꞌ, noya noya nisarëhuaꞌ. Inapohuatëhuaꞌ, tëhuënchachin nóya cancantarihuaꞌ.

Quisocristo chiminpachina, Yosëri ananpitaantarin. Canpitantaꞌ imaramaꞌ niꞌton, anoyacancantërinquëmaꞌ noya noya yonquicamaso marëꞌ. Napoaton Quisocristo yonquirinso chachin nohuantocoꞌ. Nani tahuëri yonquirácoꞌ ina pochin cancantacamaso marëꞌ. Inasoꞌ inápaquë yaꞌhuërarin. Yosë inchinan quëran huënsëaton, ina pochachin chini chiníquën nanantarin.

Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

Niꞌcoꞌ. Chimipisoꞌ co huachi isoroꞌpaꞌ yonquirinhuëꞌ. Inapochachin canpitantaꞌ Quisocristorëꞌquëmaꞌ chiminamaso pochin cancantatomaꞌ, co maꞌsharáchin yonquiaramahuëꞌ. Aꞌna tahuëri huachi Quisocristorëꞌquënpoaꞌ Yosëꞌpaꞌ noya noya yaꞌhuëcontarihuaꞌ.

Iporaso nipirinhuëꞌ isopitantaꞌ co noyahuëꞌ cancantatomaꞌ naporamasopita aꞌpocoꞌ. Ama noꞌhuitocosohuëꞌ. Ama noꞌhuito canainquëmasohuëꞌ. Ama piyapi naponin yonquirapicosohuëꞌ. Ama yanpitocosohuëꞌ. Ama taparoꞌ noncosohuëꞌ.

Ama ninonpintocosohuëꞌ. Co noyahuëꞌ yonquiramasopita nani aꞌporamaꞌ niꞌton, co ina yonquicasoꞌ yaꞌhuërinhuëꞌ. Mocarinsoꞌ tëꞌyatërëso pochin iráca naporamasopita aꞌpoatomaꞌ, naniantomiatocoꞌ. Nasha aꞌmorëso pochin nasha cancan manamaꞌ. Yosë nininpoaꞌ niꞌton, nani tahuëriya catahuarinquëmaꞌ ina pochin cancantacamaso marëꞌ. Ina quëran noya noya ina nohuitaramaꞌ. Ina marëꞌ nasha cancan quëtërinquëmaꞌ.

Canpitantaꞌ iyaroꞌsaꞌ, saꞌamaꞌ nosorocoꞌ. Ama noꞌhuicosohuëꞌ. Sanoanan quëran nontocoꞌ.

Huaꞌhuaroꞌsantaꞌ paꞌpinaꞌ natëinaꞌ. Aꞌshinantaꞌ natëinaꞌ. Yaꞌipi pënënpisoꞌ natëinaꞌ. Inapohuachina, Siniorori noya niꞌsarin.

Canpitasoꞌ imoyaroꞌsaꞌ, soꞌyamaꞌ natëcoꞌ. Sinioro Quisocristo imaramaꞌ niꞌton, natëcasoꞌ yaꞌhuërin.