Popular Bible Verses from 1 Corintios 2

Share

Pero b'an cocha ch'ar tz'ijb'ab'ir tama uyojroner e Dios y che: Lo que ma tia' irna umen e winicob' y lo que ma tia' ub'na umen e winicob' y lo que ma tia' cay ub'ijnuob' e winicob' que erer anumuy, jax lo que e Dios cay uyustes tua' uyajc'u tin e war uyajta ut jaxir. B'an ch'ar tz'ijb'ab'ir tama uyojroner e Dios.

Pero tin e machi uch'ami Unawalir e Dios ma erer uch'ami lo que tua' Unawalir e Dios, porque tut inte' cocha era matuc'a uc'ampib'ir tunor era. Y machi uyub'i unata tunor era porque uc'ani utacarsiaj Unawalir e Dios tua' ac'otoy unata tuc'a tunor era.

Pero jax non xe' cay irsenon tunor era umen e Dios tacar Unawalir. Y jax Unawalir e Dios era xe' war uwira tunor lo que war anumuy tic taca tama tunor or e rum y tama tunor ut e q'uin ub'an. Y jax Unawalir e Dios era xe' war uwira tunor lo que ayan xe' intam tama Catata Dios ub'an.

Pero non machi cach'ami inte' mein lo que ayan tara tor e rum sino que jax Unawalir e Dios xe' eb'etb'ir tari umen Catata Dios xe' cach'ami non, y tamar era erer cac'otoy canata cob'a ajc'ub'iron umen Catata Dios.

Y conda cay incansiox machi inche tamar inte' ojroner b'an cocha uc'ampes ani inte' nuxi ajcanseyaj, sino que cay inchecsu uyojroner e Dios tama e Cristo taca e ojroner xe' ma intran tua' iyub'i. Porque nen war inc'ani tua' ich'ami niwojroner umen que war apatna Unawalir e Dios y umen que war achecta uc'otorer e Dios. Porque uc'ani tua' awawan ic'upesiaj tamar uc'otorer e Dios y majax tamar unatanyaj e winicob'.