Popular Bible Verses from KOLOSA 3

Share

dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua: me vaka sa sega ni cudruvi kemudou na Karisito, mo dou vaka talega kina.

Dou daunanuma na veika maicake, kakua ga na veika e vuravura.

ia na ka kecega dou sa cakava, kitaka mai na vu ni yalomudou me vaka vua na Turaga, me kakua ni vaka vei ira walega na tamata

O koya mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede

Me tiko vakalevu e na lomamudou na vosa i Karisito e na vuku kecega; dou veivakatavulici ka veivunauci vakai kemudou e na same kei na sere kei na meke vakayalo, dou sere tiko vua na Kalou ni sa tiko e na yalomudou na loloma. Ia na ka kecega dou sa kitaka, se dou vosa se dou cakacaka, me ia kece e na yaca ni Turaga ko Jisu, ko koya dou sa ia tiko kina na vakavinavinaka vua na Kalou na Tamada.

Ia me liu e na ka kecega oqo na dauloloma, o koya sai vau vinaka sara.

Ia kevaka dou sa vakaturi cake vata kei Karisito, mo dou vakasaqara na veika maicake, sa tiko kina na Karisito e na liga i matau ni Kalou.

Ia me lewa sara e na lomamudou na vakacegu i Karisito, ni dou sa kacivi ki na ka oqo, ni dou sa yago e dua bauga: ia mo dou ia tiko na vakavinavinaka.

O koya mo dou qai vakamatea na veitikimudou vakavuravura, a dauyalewa, nai valavala tawa-savasava, na garogaro ca, na dodomo ca, kei na kocokoco, o koya na dauqarava na kalou lasu

Ni dou sa mate ga, ia na nomudou bula sa vuni vata kei Karisito e na Kalou.

Ia oqo, mo dou luvata na ka kecega oqo, a daucudru, na daulesa, na lomaca, na vosa ca, na vosa dukadukali mai na gusumudou.

Kakua ni dauveilasuyaki, ni dou sa luvata tu na tamata makawa kei na nonai valavala; ka dou sa vakasuluma oqori sa vou, o koya sa vakavoui tiko e na vuku me vaka na yaloyalona ka buli koya

Oi kemudou na tagane vakawati, mo dou lomani ira na watimudou, ka kakua ni yaloca vei ira.

Oi kemudou na gone, mo dou talairawarawa vei ira na nomudou qase e na ka kecega: ni sa vinaka sara oqo vua na Turaga.

Oi kemudou na yalewa vakawati, mo dou talairawarawa vei ira na watimudou, me v aka sa dodonu vua na Turaga.