Popular Bible Verses from تَثْنِية 8

Share

فَكُّرُوا فِي اللّٰهْ إِلٰـهْكُو أَشَانْ هُو بَسْ الْأَنْطَاكُو الْقُدْرَةْ الْبَيْهَا لِقِيتُوا الْغُنَى دِي. وَ بَيْدَا، لَحَدِّي الْيَوْم هُو أَكَّدْ الْمُعَاهَدَةْ السَّوَّاهَا مَعَ أَبَّهَاتْكُو.

وَ اللّٰهْ ضَعَّفْكُو بِالْجُوعْ وَ بَعَدْ دَا، أَكَّلَاكُو الْمَنَّةْ وَ لَا إِنْتُو وَ لَا جُدُودْكُو مَا تَعَرْفُوهَا مِنْ أَوَّلْ. وَ دَا أَشَانْ يِعَرِّفْكُو كَدَرْ الْإِنْسَانْ مَا يِعِيشْ بِالْأَكِلْ وِحَيْدَهْ لَاكِنْ يِعِيشْ بِكُلِّ كِلْمَةْ الْيُقُولْهَا اللّٰهْ.

وَ فَكُّرُوا فِي الدَّرِبْ الْوَدَّاكُو فَوْقَهْ اللّٰهْ إِلٰـهْكُو فِي مُدَّةْ 40 سَنَةْ فِي الصَّحَرَاء لِيِضَعِّفْكُو. وَ دَا لِيِجَرِّبْكُو وَ يَعَرِفْ الْفِي قُلُوبْكُو وَ يِشِيفْ كَنْ تَحْفَضَوْا وَصِيَّاتَهْ وَلَّا لَا.

أَنْقَرْعُوا، مَا تُقُولُوا فِي قُلُوبْكُو: «بِجُهُدْنَا وَ قُدْرَةْ دُرَاعْنَا أَنِحْنَ لِقِينَا الْغُنَى دِي.»

أَحْفَضَوْا نُفُوسْكُو وَ مَا تَنْسَوْا اللّٰهْ إِلٰـهْكُو لَحَدِّي مَا تِطَبُّقُوا الْوَصَايَا وَ الْقَوَانِينْ وَ الشُّرُوطْ الْأَنَا مُوسَى نَنْطِيهُمْ لَيْكُو الْيَوْم.

وَ أَعَرْفُوا تَمَامْ وَ خُطُّوا فِي قُلُوبْكُو كَدَرْ اللّٰهْ إِلٰـهْكُو يِأَدِّبْكُو مِثِلْ نَادُمْ يِأَدِّبْ وِلَيْدَهْ.

وَ وَكِتْ تَاكُلُوا وَ تَشْبَعَوْا، تَحْمُدُوا اللّٰهْ إِلٰـهْكُو فِي شَانْ الْبَلَدْ الْعَدِيلَةْ الْأَنْطَاهَا لَيْكُو.

وَ أَحْفَضَوْا وَصَايَا اللّٰهْ إِلٰـهْكُو أَشَانْ تَمْشُوا فِي دَرْبَهْ وَ تَخَافَوْا مِنَّهْ.

وَ هُو أَكَّلَاكُو الْمَنَّةْ فِي الصَّحَرَاء الْأَبَداً جُدُودْكُو مَا عِرْفَوْهَا وَ بَتَّانْ جَابْ لَيْكُو الضُّعُفْ وَ جَرَّبَاكُو وَ فِي الأَخِيرْ، سَوَّى لَيْكُو الْخَيْر.

وَ دَا وَكِتْ تَاكُلُوا وَ تَشْبَعَوْا وَ وَكِتْ تَبْنُوا بُيُوتْ عَدِيلِينْ وَ تَسْكُنُوا فَوْقهُمْ. وَ دَا وَكِتْ يِكَتِّرْ لَيْكُو بَقَرْكُو وَ غَنَمْكُو وَ دَهَبْكُو وَ فُضِّتْكُو وَ كُلَّ شَيّءْ الْهَنَاكُو. فِي الْوَكِتْ دَا، أَنْقَرْعُوا! خَلِّي قُلُوبْكُو مَا يِسْتَكْبَرَوْا وَ تَنْسَوْا اللّٰهْ إِلٰـهْكُو الْمَرَقَاكُو مِنْ مَصِرْ بَلَدْ الْعُبُودِيَّةْ.

وَ بَيْدَا، اللّٰهْ إِلٰـهْكُو يِوَدِّيكُو فِي بَلَدْ عَدِيلَةْ الْعِنْدَهَا وُدْيَانْ وَ عُيُونْ أَلْمِي وَ أَلْمِي الْيَمْرُقْ مِنْ تِحِتْ الْأَرْض وَ يِسِيلْ فِي الْكَدَادَةْ وَ الْجِبَالْ. وَ دِي الْبَلَدْ الْعِنْدَهَا قَمَحْ أَبْيَضْ وَ قَمَحْ أَحْمَرْ وَ عِنَبْ وَ تِينْ وَ رُمَّانْ وَ دِهِنْ زَيْتُونْ وَ عَسَلْ. وَ فِي الْبَلَدْ دِي، تَاكُلُوا خُبْزَةْ بَلَا تَعَبْ وَ شَيّءْ يِقَصِّرْ لَيْكُو كُلَ مَا فِيهْ. وَ حُجَارْ الْبَلَدْ دِي عِنْدُهُمْ حَدِيدْ وَ مِنْ جِبَالْهَا، تَمُرْقُوا نَحَاسْ.

وَ مُوسَى قَالْ: هَسَّعْ دَا، كُلَّ الْوَصَايَا النَّامُرْكُو بَيْهُمْ الْيَوْم، أَحْفَضَوْهُمْ وَ طَبُّقُوهُمْ. وَ دَا أَشَانْ تَحْيَوْا وَ تَبْقَوْا كَتِيرِينْ وَ اللّٰهْ يِوَدِّيكُو وَ تِشِيلُوا وَرَثَةْ الْبَلَدْ الْهُو حَلَفْ يَنْطِيهَا لِجُدُودْكُو.

وَ فِي مُدَّةْ الْأَرْبَعِينْ سَنَةْ دَوْل، خُلْقَانْكُو مَا قِدْمَوْا لَيْكُو فِي جِلِدْكُو وَ رِجْلَيْكُو كُلَ مَا وِرْمَوْا.

وَ هُو الْوَدَّاكُو فِي الصَّحَرَاء الْوَسِيعَةْ وَ الْمُخِيفَةْ، الْعِنْدَهَا دَبِيبْ نِيرَانِي وَ عَقَارِبْ. وَ دِي بَلَدْ الْعَطَشْ الْمَا يَلْقَوْا فَوْقهَا أَلْمِي. وَ لَاكِنْ هُو مَرَقْ لَيْكُو أَلْمِي مِنْ الْحَجَرْ الْقَوِي.