Popular Bible Verses from Azaya 40

Share

Diai dí káa fôai, a wála-wala laa tɛ̀ɛ dí pɔ́. Diai dífe wála-wala níi, a díkponôi kpànaŋ.

Diai kpîŋ díkaa a ǹúu-tɔɔ-ŋai dífii a kpɛ̂ɛ, dífôa. Ǹyaŋkpa-ŋai dífii a kpɛ̂ɛ máŋ. Kɛ́lɛ, diai da díkili tɔ̀ɔ Yâwɛɛ ma kpɔŋ-mâ mɛni mai, díwala-wala laai su a pâi kpananîi. Da pâi tɛ̂i ŋ̀elei su yɛ̂ɛ da kɛ̀ kuɛ koôŋ pôlu. Dí máŋ kîrɛ siɣe, dífe pâi fôai. Dí máŋ sía, dífii fé pâi kpɛɛ̂i.

Ífe niî gɔ́lɔŋ ní? Ífe niî m̀ɛni ní a gɛ́ɛ Yâwɛɛ ƃa ŋ̀wɔ́lɔ-wɔlɔ Ɣalai? Ǹyaa ƃé ŋ̀éniɛi kpɛ̀tɛ. Víi fa kpɛ̂ɛ kpaa máŋ é fôa. Núu da fa târe ŋɔkili-ŋa sîai su.

Núu-wòo è kɛ̀ tɛ̂i vɛ̃ɛ-kpâlaŋ su ǹyɛɛi, “Ka Yâwɛɛ ŋɔperei kpɛtɛ vɛ̃ɛ-kpâlaŋ su! Ka berei su-sã́a Kúɣâlai mɛ̂ni ma.

Kala a kpâla, wúru-poa kɛ́ fɔ̃ya, kɛ́lɛ Ɣâla ŋɔwóoi káa nɔ́ dɔɔ̂i wɔ́lɔ-wɔlɔ.”

À kɛ̀ tí, Yâwɛɛ ŋɔfólo-laai a pâi lɛ̂i, ǹyaŋ núu kélee a pâi gâai. Yâwɛɛ ǹyaa kpîŋ ƃé m̀o tí.”

Ka botolo-wolo-ŋai láa fɛ́ɛ. Ka ǹyée kpaya-kpayai wólo, ká bɛlɛ-pɛlɛɛi wólo, ǹaa é kɛ́ a nɛ̃́ɣɛ ŋá. Ƃɛ́i-ŋai kélee kame-ŋa díkaa naai, ka m̀aa kame-ŋai wólo ǹaa é kɛ́ a tiŋ-tiŋ-ŋa su.

A pâi ŋɔƃála-ŋai ŋá kɔnîi yɛ̂ɛ ƃála mɛi káa-nuu. A pâi ŋɔƃála lônii ŋá tɛ́i gîe m̀a ǹyée-tɔ̃ɔi, é lí a dîa. A pâi tɔ̂ɔi dílee-ni túɛ é lí a dia a gɔlɔ-saá m̀a.

Íŋɛi tɛ́ ŋ̀elei su í ǹaa káa. Gbɛ̂ɛ ƃé bɛ́mɛlɛ̂ŋ-koa-ŋai kpɛ̂tɛi? Ǹyaa ƃa ǹúui nyii a tɔ̂ɔ díŋɛi túɛ yɛ̂ɛ kɔkuluƃai. È berei kɔ́lɔŋ dítâmaai lai ǹyaŋ è díkelee dílaa kɔ́lɔŋ tɛi-tɛi. Ŋɔwála-wala laai sú kɛ̂tɛi. M̀ɛni ma dɔnɔ kpîŋ fé niî láŋ ní.

Ǹyaa ƃa ǹúui gáa seê-ni ŋɔkâloŋ sèe sɛŋ ŋá ǹɔii mɛi pere gɛ̀ ƃò ŋ̀ele-kɔlɔŋ mɛi perei, diai díkaa ǹaa m̀u perei, díkaa nɔ́ yɛ̂ɛ pumu pɛlɛɛ-pɛlɛɛ ŋa. A ŋ̀ele-kɔ̂lɔŋ fùlomo nɔ́ yɛ̂ɛ wôna-la seɣe, yɛ̂ɛ berei tí da sua-kɔ̂lɔ seɣe nyii da pɛ́rɛ tɔ̀ɔ lai, fûloŋ la núu kɛ́ nyìi m̀ui.

Ka Zerusâlɛŋ-ƃelai kíli kúla. Ka m̀ó dîa a gɛ́ɛ da mɔ̃́lɛ a zu kôyaa. Ŋa dísu-mɛni lɛɛ dísɔnyɔ̂ŋ-ŋai mɛ̂ni ma. Ŋá díkula maa kɛ̂ é seri góyaŋ ma zɔnyɔ̂ŋ-ŋai dí gɛ̀i mɛ̂ni ma.”

Ŋá wóo da mɛ̀ni ǹyɛɛ ḿâi, “Ye ŋ̀orɛ̂-wooi ŋí ƃó!” Ŋá m̀arê kɛ̀ ńyɛɛ mai, “Ŋorɛ̂-wooi ƃa lé?” Ǹyɛɛ ḿâi, “M̀ó a gɛ́ɛ núu-kpune kélee káa nɔ́ yɛ̂ɛ kala. Dílɛ̂lɛɛi nɔ́ yɛ̂ɛ wúru-poa. Kala a kpâla, wúru-poa kɛ́ fɔ̃ya a tãi Yâwɛɛ a pâi fãa tɛɛ̂i la é dí fɛ́ɛi. Nûa dífulu-laai su kpuâi nɔ́ yɛ̂ɛ kala.

Ǹuu-namui Yâwɛɛi a pâi pâi é ŋɔnûai mɛi káa a wála-wala laa. Diai è díŋuŋ mâ ƃòi, a pâi dia.

Kúɣâlai a m̀ôi ǹyɛɛi, “Ka ŋánuâi ŋánɛnɛ. Ka díŋa-nɛnɛ!

Gbɛ̂ɛ ƃa pɔ̂ri ǹyuoi kɔ̂ɔni ǹyée-ŋá, kpaa é ŋ̀ele-kɔ̂lɔŋ kɔ̂ɔŋ a ǹyée? Núu da a pɔ̂ri ǹɔii kpɛtɛ pɔ̂rɔi kɔ̂ɔnii kpele kɔɛɛ su, kpaa máŋ é ǹyée kpaya-kpayai da ǹyée pɛlɛɛ-pɛlɛɛi díwiɛ kɔ̂ɔŋ a sɛŋ-kɔ̂ɔŋ-sãa? Núu da a pɔ̂ri Yâwɛɛ táre tɔɔ̂i? Gbɛ̂ɛ ƃa pɔ̂ri sɛŋ lɛ̂i m̀a kpaa máŋ é ǹia-wôo ƃoi? Gbɛ̂ɛ ƃé Ɣâla a ŋuŋ mâ pîlaŋ la, é lɛ́ɛ pâi sɛŋ da kɔlɔnîi kpaa é mɛni-ŋa káa, a gɛ́ɛ é sɛŋ da kpɛtɛ-pere maa kɔ̂ri?