Popular Bible Verses from Isa 43

Share

Re' hin ak' chik taqe naa nub'anam, eh jumehq'iil taq naa awilom. Eh naa nutehem i b'eeh chi keh i nutinamiit chupaam i ye'aab' chiq yuuq', naa nutz'uhkrisam taqe i nim ha' chupaam i ye'aab' ma' xta nelik chuwach.

Eh noq naa taq awik'iik chinaah i palaw, noq naa taq awik'iik chinaah taqe nim ha' ma' naa ta taq ajihq'iik, ruum re' hin naa nuwihiik taq awuuk'. Noq naa taq awik'iik pan q'aaq' ma' naa ta taq kaat ruk'atam i xaq q'aaq'.

Re' taqe re' ik'inaq chik, maank'ulik taq chik panuk'ux inub'anam cho najtir, maakapaaj taq chik i k'uluuj chaloq.

Eh yu'naak je' wili ruq'or i QaJaaw Dios ixtz'uhkrisanik qeh i hoj, hoj aj Israel, i hoj riih rumaam i Jacob: Matyo'jik taq ruum re' hin xineesanik taq cha weh panti' k'axik. Eh hin xinkojwik taq aab'ihnaal chi hat taq nutinamiit.

Re' hin q'e' taq tiwaaj, xiik' taq k'ihaal atz'aaq chi nuwach, q'e' taq ti nuk'ax. Ruum aj re' i nuko'leej taq rij ak'achariik, tokoom tinamit chik i nuq'asaj taq chajilow.

Ruum re' hin taq aaWaJaaw aaDios, awaj ko'loom, hin taq aSantolaj Dios i hat taq aj Israel. Re' xat wesaj taq cho panti' k'axik Egipto. Re' chik i tinamit Etiopía, i tinamit Seba xnuyeew taq chajilow.

Maayohb'isaj taq awiib', re' hin naa nuwihiik taq awuuk'. Eh naa numolom cho kiwach taq aatinamiit pareelb'aal q'iij, parookb'aal q'iij.

Xa re' la' ruum chi re' hin taq aaDios naa nujuxum taq ayiib' wach na'ojb'al taq i na a'n. Eh ma' naa ta chik ruk'uliik panuk'ux taq amahk a'nam.

Eh je' wili i xuq'or: Re' taq i hat nee ti q'orik i korik chi wiij. Re' hin xin sik'wik taq awach chi waj kamanoom, reh chi naa taq anab'eem nuwach chi re' hin i Dios. Eh ma' jino'q i dios wihinaq chaloq chi peet chi nuwach i hin, eh ma' naa ta wo' chik ruwihiik jino'q dios chi wiij i hin.

Eh xa re' wo' hin i jinaj chi Dios, ma' awach ta chik jino'q inko'linik chi wiij i hin.

Korik wo' hoq noq xa hin wo' cho Dios pampeet. Ma' jino'q i neeruko'leej riib' panuq'ab', eh ma' awach ta chik neenyojwik wach i nuyejaam wach i hin, inki.

Re' taqe i josq'laj chikop naakiye'em nuloq'il, taqe i xojb', taqe i nimaq chikop wilik kixiik', ruum naa nutz'uhkrisam ha' pan i chiq yuuq'. Eh je' wo' chupaam i ye'aab' ma' xta nelik chuwach, reh chi naa ruwihiik kihaa' i nutinamiit nusik'im cho kiwach. Re' taqe i tinamiit wili xnuyejaa', reh chi naa kiye'em nuloq'il chikiwach i tinamit.

Eh chi je' i wilkeeb' pantz'eet, pansak'aaj ree rookb'aal q'iij, naa nuq'orom keh chi kitaq'aaj chaloq taqe i wak'uun wixq'uun, naa nuk'amam taqe chaloq i wilkeeb' chi junsuut i wach ak'al. Chu'nchel i re', re' hin xin tz'uhkrisanik keh, re' hin xikojwik taq aweh chi nutinamiit re' taqe i kiq'orik wib'iral. Eh re' wo' hin inkiyeew nuloq'il, inki QaJaaw Dios.

Re' hin xintehwik chee kib'eeh taq aamaam awati't noq xi ik'ik cho chupaam i palaw, noq xi ik'ik cho chupaam i nim ha'. Re' hin xinsachwik kiwach i ruk'ihaal soldado xtahqinik cho keh. Eh nusach kiwach i kikareta, i kikawayu reh q'aq'inik, ma' xi wuktik ta chik chi jumpech je' rukab' noq inchuhpik i saqum.

Re' hin i Dios wilik nuSantohiil, hin xin tz'uhkrisanik taq aweh i hat, hat taq aj Israel, eh hin taq aaReey.