Popular Bible Verses from Pro 22

Share

Kan tanaq'tisaj k'a pe ri ak'ual k'a pa ruch'utinal-pe, rik'in ri achike rubeyal ruk'aslen ri utz chi nuk'uaj, richin keri' toq xtapon-q'anej pa rurijixinen, kan man xtujech'ej ta kan ri' chire ri rubeyal k'aslen ri'.

Ri rajel-ruk'exel ri nuk'ul jun wineq ri kan nuqasaj-ri', ja ri k'o rukiy ri Dios chuwech, y chuqa' roma ri' kan nuk'ul k'a beyomel, nuk'ul ruq'ij y kan nuk'ul ruk'aslen.

Ri wineq más utz chi nucha' ri k'o utz rutzijol chikikojol ri winaqi', ke chuwech k'o nimalej beyomel rik'in; chuqa' más utz chi etaman ruwech koma ri ruwinaq, ke chuwech ri k'o q'anapueq y saqipueq rik'in.

Man tarayij yatok rachibil jun wineq ri kan chi'anin nipe royowal; kan man k'a tawachibilaj ri wineq ri xa man niq'ax ta chuwech, stape' chi oyowal o chi utzil yach'on rik'in.

Ri wineq ri kan yeruto' ri k'o nik'atzin chike, kan xtuk'ul-wi urtisanik, roma rija' kan man nupoqonaj ta chi kan ja ri ruway rija' ri nuya' chike.

Ri wineq ri kan nowineq kan chi'anin nutzu' toq k'o ruk'ayewal peteneq y nrewaj-ri' chuwech; jak'a ri wineq ri xa maneq ok retamabal, man jun ri nutzu' y roma ri' choj niberuliba-ri' pa ruk'ayewal.

Ja ri wineq beyom k'a ri niq'aton-tzij pa ruwi' ri wineq ri man jun ok k'o rik'in; y ri wineq ri nibanon qajo'n rik'in jun chik wineq, kan xtok k'a samajel richin ri nibanon ri qajo'n chire.

Ek'o winaqi' e beyoma' y ek'o chuqa' ri man jun ok k'o kik'in; jak'a ri ka'i' kiwech winaqi' ri', xa e junan, roma kan ja ri Jehová ri banayon-pe kichin.

Rat, man k'a ke'atz'ila' ri winaqi' ri xa man jun ok k'o kik'in, y chuqa' kan man taqasaj kiq'ij ri chiri' akuchi niban-wi q'atoj-tzij roma rije' xa man tikirel ta chi nikito-ki'. Roma kan ja ri Jehová ri xtich'on pa kiwi' rije', richin chi yeruto', y ri xkejachon pa kamik ri winaqi' ri', rija' kan xtrelesaj chuqa' ri kik'aslen.