Popular Bible Verses from Ruoman 12

Share

No mek di piipl we de iina di worl tel unu ou fi liv. Insted-a dat mek Gad chienj di wie ou unu tingk so dat im kyan chienj di wie ou unu a liv. Da wie de unu wi nuo aal a wa Gad waahn unu fi du — unu wi nuo we rait, unu wi nuo wa mek Gad api an unu wi nuo ou im waahn unu fi liv.

So den breda an sista, sins Gad gud an kain tu unu nof nof, mi a beg unu du, gi op unu laif tu Gad laik wan sakrifais — wan sakrifais we alaiv, we de de fi sorv Gad an we Gad kyan api wid. Dat a ou unu fi worship Gad.

Wail unu wiet fi di sitn dem we Gad pramis fi gi unu, unu mos api kaaz unu nuo se unu a-go get it. Wen chobl tek unu, unu no fi gi op bot unu mos gwaan uol chrang an unu fi prie aal di taim, neva tap.

No mek wikidnis biit yu bot biit wikidnis wid gud.

Lov unu wan aneda laik breda an sista an unu fi aalwiez put unu breda an sista bifuo unuself.

Unu mos lov piipl wid aal a unu aat — unu lov mos riil; iet evriting we wikid an eng aan tait tu eniting wa gud.

Ef it kyan apm, du evriting we unu kyan du fi mek shuor se unu liv iina piis wid evribadi.

Breda an sista ef sumadi du unu rang, no bada tek it pan unuself fi go mek dem pie fi wa dem did du unu, lef dem tu Gad mek im joj dem. A siem so it rait dong iina Gad wod dat di Laad se, “A fi mi jab fi mek piipl pie fi di rang we dem du, mi wi ponish dem.”

Unu fi wok aad an no liezi! Unu mos eva waahn fi sorv di Laad wid aal a unu aat.

Kaaz a di gif we Gad gi mi, mi a tel unu: No bada tingk se unu muor dan wa unu riili bi. Insted-a dat unu fi ombl unuself an joj unuself bies pan di fiet we Gad gi unu.

Ef sumadi du yu sopm rang, no bada du dem bak notn rang; aalwiez chrai fi du wa evribadi tingk rait.

Liv gud wid unu wan aneda. No get ful-a unuself an fiil laik se unu kyaahn du sortn wok ar taak tu sortn an sortn piipl. Insted-a dat ombl unuself.

Bot, “Ef yu enimi onggri, gi im sopm fi iit; ef im waahn sopm fi jringk, gi im sopm fi jringk. Wen yu du dat, a laik yu a pail op at kuol pan im ed.”

Di piipl we a kaaz unu fi sofa, unu mos prie an aks Gad fi bles dem; aalwiez aks Gad fi bles piipl, no prie an aks im fi du notn bad tu dem. Ef piipl api unu fi api wid dem, ef dem a baal unu fi baal wid dem tu.

Ef unu choch breda an sista no av wa dem niid, unu fi shier wa unu av wid dem an unu mos eva redi fi tek iin piipl we a chravl an naa no we fi stie.

Siem laik ou wan badi mek op a nof difrant paat, an di difrant difrant paat dem de de fi du difrant sitn, a siem so, a nof a wi, bot di uol a wi mek op wan badi kaaz wi an Krais Jiizas a wan. Di uol a wi difrant bot wi jain op tugeda an wi bilang tu wi wan aneda.