Popular Bible Verses from Ruoman 11

Share

Kaaz a Gad mek evriting! A im kaaz evriting fi liv an evriting mek fi sorv im. Gad fi get priez fi eva an eva! Iemen!

Gad gud an kain tu aal piipl nof nof! Nobadi no waiz laik im an nobadi no nuo aal we im nuo. Uu kyan se wai im mek op im main fi du di sitn dem we im du? Uu kyan andastan di wie im du tingz?

Kaaz “Uu nuo wa di Laad a tingk? Uu kyan tel im wa im fi du ar wa im no fi du?

A siem so nou, iina dem taim ya, yu av wan sumaal gruup a piipl we Gad pik kaaz im mek op im main fi shuo dem lov iivn wen dem no dizorv it. A no notn we dem du mek im pik dem, im pik dem kaaz im mek op im main fi shuo dem lov iivn wen dem no dizorv it. Ef a neva so it go, ef Gad did a pik piipl bies pan wa dem du, den a no gud an kain im wuda a gud an kain tu piipl.

Bot ef som a di branch dem brok aaf, an dem tek unu, unu we a wan wail piis a aliv shuut, an bod di aliv chrii so dat unu kyan liv aafa di gud sitn dem we kom fram di ruut, unu kyaahn a gwaan laik se unu beta dan di branch dem. Bot ef eni a unu waahn fi brag an buos, jos memba se a no unu a sopuot di ruut bot a di ruut a sopuot unu.