Popular Bible Verses from 'O Roma 8

Share

Ngone panako ma Jo'oungu ma Dutu wa'aturu 'okia sonaa 'iodumu, la 'awi nyawa gee wisiboso-bosono ge'ena la 'o nyawa gee waki'asoko moteke to 'una 'awi mau, yomadamake yaowa-owa.

Sababu ngoi tongaku ma gou-goungu, kiaka naga bato 'o duniaka ne'ena, komoiwa 'idadi yatatoko ma Jo'oungu ma Dutu 'awi dora ngoneno. 'O songene bolo 'o 'ahu, 'o mala'ekati, bolo yopa-pareta bolo 'o sagala moi-moi gee podo-dodato ma 'orasi ne'ena de ma 'orasi ma du'uruoka, bolo 'iregu-reguosi gee 'ipa-pareta, 'okia sonaa 'o diwangoka, bolo 'o tonaoka bolo 'okia naga bato 'iregu-iregu, 'iodumu ge'ena koidadiwa yatatoko ma Jo'oungu ma Dutu wonadora ngone, 'isoka gee wosidumutokau ma Kristus Yesusoka to ngone nanga Jou.

Koge'enali mita 'o Ngomasa 'Itebi-tebini 'iboa 'inariwo 'okia naga gee ngone kopa'aku-'akunuwa. Sababu ngone kopanakowa kokia salingou ngone polahidoa. 'O Ngomasa 'Itebi-tebini ma sirete 'inasiga'asoko ma Jo'oungu ma Dutuka de ma singina nganono koge'ena ma amokoka sigado koya'akunuwa yangose de 'o demo-demo.

Ngone panakokau 'iodumu ge'ena, so ngone 'idadi pongose konee, nako ma Jo'oungu ma Dutu de de ngone komoiwa 'ina'akunu.

Ma 'orasi ne'ena 'ona gee yo'ahu yomarimoi de ma Kristus Yesus, 'ona koyakihukumuawau.

Nako 'ania di-dibangi yaparetano ka to ngini ma sirete 'ania mau 'isowo-sowono, ge'ena ma boiro 'o songene. Ma nako 'ania di-dibangi yaparetano 'o Ngomasa 'Itebi-tebini, ge'ena ma duanguku 'o 'ahu de nia singina 'isanangi.

Ma 'iodumu ge'ena dau ma dodaka, ngone ma gou-goungu koina'akunuwa, sababu ma Kristus gee wonasiboso-bosono wonariwo ngone!

'O sangisara 'iodumu gee ngone pamaokau ma 'orasi ne'ena, moteke to ngoi 'ai di-dibangi, ka ma eta ma koidadiwa positero de 'o sanangi gee dua 'inasidumutu ma 'orasi 'inasitedene.

Komoiwa ya'akunu yatatoko ma Kristus 'awi dora ngoneno! 'O sangisara de 'o singina ma susa, 'o sikisaa, 'o baulaco, 'o saigalere, 'o bahaya de 'o do'oma koya'akunuwa yatatoko ma Kristus 'awi dora ngoneno. (

So ma Jo'oungu ma Dutu gee wosikakanako 'okia naga nanga singina ma dodaka, wasahe 'o Ngomasa ge'ena ma mau, sababu 'o Ngomasa ge'ena 'iga'asoko ma Jo'oungu ma Dutuka ma ngale 'awi 'umati, de moteke to 'una 'awi mau.

'O nyawa gee 'o Ngomasa 'Itebi-tebini yakipareta, 'ona ge'ena ma Jo'oungu ma Dutu 'awi ngowa-ngowaka.

'O nyawa gee yo'ahu moteke ka to 'ona ma sirete manga mau 'isowo-sowono, 'ona yatiba-tibangi ka to 'ona ma sirete manga du-duaka. Ma 'o nyawa gee yo'ahu moteke 'o Ngomasa 'Itebi-tebini, 'ona yatiba-tibangi ka 'okia naga 'o Ngomasa 'Itebi-tebini ma du-duaka.

Ma Jo'oungu ma Dutu kowatu'umunguwa 'awi Ngowaka ma sirete, so 'ena wosarakani ma ngale wonasilaha ngone poodumu. So ma raiokau 'una 'asa wonakula mita 'okia sonaa 'iregu-regu.

'O Ngomasa 'Itebi-tebini de mita to ngone nanga singina ma dodaka 'ingose 'ato ngone ne'ena ma Jo'oungu ma Dutu 'awi ngowa-ngowaka. Nako ngone ne'ena to 'una 'awi ngowa-ngowaka, ge'ena ngone mita 'awi warisi ma dutu gee dua padawongo 'o co-catu ma Jo'oungu ma Dutu wadua-duangou ma ngale 'awi ngowa-ngowaka. Ngone 'asa padawongo de ma Kristus 'okia naga gee ma Jo'oungu ma Dutu wadua-duangou. Nako ngone posangisara de ma Kristus, ngone 'asa 'inasitedene mita de ma Kristus.

'O nyawa gee manga di-dibangi ka to 'ona ma sirete manga mau 'isowo-sowono yaparetano, 'ona ge'ena wisaturuu ma Jo'oungu ma Dutu, sababu 'o nyawa go'ona koyosingounuwa ma Jo'oungu ma Dutu 'awi besesongo, de ma goungu 'ona koya'akunuwa yosingounu ma Jo'oungu ma Dutu 'awi besesongo.

'O do-dadi 'iodumu posironga 'iduakoka 'imadadanu ma 'orasi ma Jo'oungu ma Dutu wosidumutu 'awi ngowa-ngowaka.

Ngone panako sigado ma 'orasi ne'ena 'o do-dadi 'iodumu 'itudu-tudunu 'imasigasoko sababu 'isangisara 'isoka 'o ngeweka mimoi mosangisara ma 'orasi momaku'arene.