Popular Bible Verses from 'O Roma 6

Share

Sababu 'o nyawa gee 'o sowono yodiai ge'ena ma duanguku 'o songene. Ma 'o 'ahu 'ika-kakali ma ngekomo ma Yesus Kristus to ngone nanga Jou, ge'ena la 'o co-catu ma Jo'oungu ma Dutuno gee kawokula.

'O sowono 'uwa nipareta nginika, sababu ngini konio'ahuwau 'o besesongoka gee 'o Musa wositota-totara ma 'ena nio'ahu ma Jo'oungu ma Dutu 'awi co-catuoka.

De 'o go-gosiki ge'ena, ngone matero kapomasidosongenokau de ma Kristus de 'inasidobo'osukokau de de 'una. La 'isoka kokia naga ma Kristus wosongenuku de wisiwangokau de nanga Dea 'awi kuasa gee ma batingi koi'iwa, koge'enali mita ngone 'idadi pamake 'o 'ahu ma sungi.

Mita 'ania roese ma kia sonaa 'uwa niodukula 'o sowono ma paretaka ma ngale yapake ma dumutu 'ito-torou. Ma niosisarakani nia roese ma Jo'oungu ma Dutuka 'isoka 'o nyawa gee yosongenokau ma yakisiwangokau. Niokula nia roese 'iodumu ma Jo'oungu ma Dutuka la 'una 'asa winipake ma ngale niadiai to 'una 'awi mau.

Ngone panako to ngone nanga 'ahu ma sira gee 'iisangokau 'imasituono de ma Kristus wosongene 'o salipoka la nanga 'ahu ma sira 'isowo-sowono gee koinaparetanowau. De ma ngekomo ge'ena ngone kopoyongosuawau 'o sowonoka.

Ngini mita salingou niosi-singina, ngini koniamotekuawau nia 'ahu ma sira gee 'ito-torou, ma 'ania 'ahu 'imarimoiokau de ma Jo'oungu ma Dutu ma ngekomo ma Kristus Yesus.

Nako koge'ena, de ngone 'okia pongose? Salingou ngone kaposigila? podiai 'o sowono la ma Jo'oungu ma Dutu 'ifoloiosi wonasibosono de kaiamoko monga wonakula 'o co-catu? Ma raiokau ko'uwa! 'O sowono koinaparetawau ngoneka, so koidadiwa ngone kopomaogoruwa podiai 'o sowono nanga 'ahu ma sigoronaka!

Ngini ma rai nianakokau, nako ngini niomasisarakani wimoika la niamoteke 'awi mau, ge'ena ngini niodadi to 'una 'awi yongosi. Nako ngini niosingounu 'o sowono, ngini niodadi 'o sowono ma yongosi, ma duanguku ngini niosongene. Ma nako ngini winisingounu ma Jo'oungu ma Dutu, ngini niodadi ma Jo'oungu ma Dutu 'awi yongosi, ma duanguku ngini niomarimoi de de 'una.

Ma po'amalaha ma Jo'oungu ma Dutuka! Sababu ma sira ngini niodadi 'o sowono ma gilaongo, ma ne'ena ngini de nia singina ma gou-goungu niamoteke 'o Habari ma Owa gee nikulakau nginika. Ngini nisipidilokau 'o sowonoka, de ma 'orasi ne'ena niogilaongokau ma Jo'oungu ma Dutu 'awi mauoka.