Popular Bible Verses from 'O Roma 5

Share

Ma ma Jo'oungu ma Dutu 'awi dora wosidumutu ngoneno gee ma 'orasi ma Kristus wosongene ma ngale wonasilaha ngone, ma 'orasi ngone kaposowonosi.

'O singina nganono koge'ena dua 'asa nanga singina koya'oguwa, sababu ngone panakokau ma Jo'oungu ma Dutu wonadora ma sala ma ngekomo 'o Ngomasa 'Itebi-tebini gee wonakulakau ngoneno.

De kage'enawa duga, ma ngone mita pomorene 'o sangisara ma dodaka, sababu ngone panako 'o sangisara ge'ena 'idadi 'o nyawa manga singina yosikuata, de 'o singina ma guata ge'ena 'asa 'idadi 'o nyawa yotongosono 'o bo-bajaka. Ne'enau yosibaoro 'o singina nganono.

Ne'ena ngone pomarimoiokali de ma Jo'oungu ma Dutu, ngano ngone pongaku 'o Yesusika. De sababu ge'ena ngone po'ahu 'isa-sanangi de ma Jo'oungu ma Dutu ma ngekomo ma Yesus Kristus. Ma sababu ngone powingaku 'o Yesus, so 'una wonasi'akunu ngone panako ma Jo'oungu ma Dutu 'awi dora. De 'o dora ge'enau ma sigoronaka, ngone po'ahu ma 'orasi ne'ena. Sababu ge'ena ngone pomorene ma ngale ngone pongano-nganonou 'asa pamake 'o sanangi ma Jo'oungu ma Dutuno!

Sababu ma 'orasi ngone kopomado-do'oawa pomasimada 'o sowonoka, ma Kristus wosongene ma ngale wonasilaha ngone posowo-sowono, moteke ma 'orasi gee ma Jo'oungu ma Dutu wositatapuokau.

Ne'ena ngone pomarimoiokali de ma Jo'oungu ma Dutu ma ngekomo ma Kristus wosongene. Ge'enau so ma raiokau ngone mita koinadaenuwa ma Jo'oungu ma Dutu 'awi gorosau.

De 'isoka kokia naga 'o nyawa gudai yodadi 'o nyawa 'isowo-sowono sababu womatengo kowosingounuwa, koge'enali mita 'o nyawa gudai 'idadi yomarimoioli de ma Jo'oungu ma Dutu sababu 'o nyawa womatengo wosingounu ma Jo'oungu ma Dutuka.

De 'ifoloi de ge'ena, ngone podomorene mita ma ngale ma Jo'oungu ma Dutu 'awi singina ma sure ma ngekomo nanga Jou Yesus Kristus. Sababu de ma Kristus, ngone pamaokau nanga rimoi gee 'i'ofi-'ofi de ma Jo'oungu ma Dutu.