Popular Bible Verses from Romanos 14

Share

Manigʉ̃cã cʉ̃yarare dotire marĩpʉre nirẽ: ya, sĩni tire maquẽmerã ña. Buripe diamacã maquẽ tiremena nirucũrẽpe, ãpẽrãmena ñurõ nirẽcʉtirepe, ʉsearemena nirẽcʉtire maquẽpe ña. Atie nipetirere Espíritu Santocã titamurẽmenarã timasĩyo. Anorã abirope Cristoyere ñurõ tigʉnorẽ Manigʉ̃ cʉ̃rẽ ñurõ ʉsearemena ĩñawĩ. Ĩñerõcã basocacã cʉ̃rẽ “ñurõ tigʉ ñawĩ” ĩ ĩñawã.

Marĩ catira, marĩye catiremena marĩ Nirũpʉ̃ Jesucristoyere ñurõ tirucũ cʉ̃rẽ wedewõrucũrãdarara cati. Marĩ cõwõãrãcã tairora cʉ̃rẽ wedewõrucũrãdarara cõwõãrõãcu. Tairo tira marĩ marĩcã anorẽ catiremena nirĩwatoacãrẽ o marĩcã cõwõãriasiropʉcãrẽ marĩ Nirũpʉ̃ Jesucristoyarara nirã ya.

Tairo tira ĩcãrõmena ñurõ came wejepeorere, ñurõ came nirẽcʉtirere amarãda. Ĩñerõcã marĩcã Cristomena mama nirẽcʉtiriwãmerẽ õpemena marĩbasurupe came titamuwʉmʉãrãda.

Tairo tira marĩ marĩbasurupera came wedepasʉtiherimocãrãda. Buripe tora abiro tirono tira apeyenomena Jesúre wedewõrãrẽ ñañarẽ tiñerõcã tibuiyeherimocãrãda cʉ̃jãcã Jesúre wedewõrẽ cʉorere posori ĩrã.

Merẽ Manigʉ̃ye wederucũrẽrẽ ojayoriapũpʉre abiro ĩ: «Yʉ mʉjã Nirũpʉ̃ catirucũgʉ̃rã nigʉ̃ ya. Yʉcã wederucũrẽ diamacã maquẽrã nirõ ya. Tairo tigʉ nipetira basocare yʉ diamacã cʉ̃jãya ãsʉ̃rʉ̃poperimena eacumuwa “mʉrã ʉ̃sã Nirũpʉ̃ ñugʉ̃, tutuagʉ ña” ĩ basapeoroagawa» ĩ ĩ ojayore ña. Tairo tiro marĩ basoca nipetirare cʉ̃ Manigʉ̃ cʉtiropʉra earo nirõãcu nipetire marĩcã tiriguecãrõrẽ cʉ̃rẽ wederadara.

Jesucristore õjoro wedewõtutuaherare ñurõ ĩcãrõpe ĩñaña. Cʉ̃jãmenarẽ apeyenorẽ queoro wãcũhera icãta cʉ̃jãmena came ñañarõ ĩ wederucũpãmaherimocãña.

Marĩ ãpĩrẽ padedecoteribasocʉpʉre “mʉ ñañarõ ya” ĩmasĩheriga. Cʉ̃ nirũpʉ̃ wadora cʉ̃rẽ “mʉ ñañarõ ya o ñurõ ya” ĩmasĩwĩ. Marĩrẽ Jesucristore wedewõrãcãrẽ atiera abirora bi. Tairo tira marĩ ãpẽrã Jesucristore wedewõrãrẽ “mʉjã ñañarõ ya” ĩmasĩheriga. Merẽ Manigʉ̃rã cʉ̃jã nirũpʉ̃ ñawĩ. Cʉ̃ doca cʉ̃jãrẽ “mʉjã ñañarõ ya o ñurõ ya” ĩmasĩwĩ. Cʉ̃ wadora cʉ̃ye tutuaremena cʉ̃jãrẽ cʉ̃cã padededotirere queoro tira eañerõcã timasĩwĩ.