Popular Bible Verses from Kawlawsi 3

Share

Hngat la hngat khrung äng nini man taweiyei chu. Nang lukhrunga hngat la ha ngulai poh hi, ani a ahläh pekal. Hnadaga la nangnih a ähläh anang pekal saw huih, nangnih ha hngat la hngat ähläh nini pekeyalaih lah saw tawn.

Hawn pre a käh vawn khäl äng dä nini lung khraw ei khäl, ni luhdül äng käh vawn khäl äng nini lung khraw eiyei chu.

Nangnih nini bi kawi saw khäl kheni nini lung khraw ei chula che bi khäl. Khrawng koong nini bisaw ting khin chula hiyah, äini Hnadaga koong dä ting khin chula che bi khäl.

Äi koong, nangnih che Hnadaga käh khrawng. Ani la nangnih a anang khetnawk awlaw Ani käh khrawng ting anang heh lei. Äi koong nangnih jenei lung, jenei khrang, näuvei khrang, nüm chawng khrang, chunei khrang, awlaw nini pum ini songei khrang tawei khäl.

Krito käh chok hawu nini lung äng luih bala che mäiseh. Hnadaga la anang peksaw ngen äng hngat la hngata chokei khäl. Awlaw äkiyä äng Hnadaga koong Sam awi, phiyaw awi la awkhraw lawm äng käh awi awi khäl. Nini kheu äng awlaw bi äng nini poh saw kheni Boi Yĕsu ming äng dä po khäl. Awlaw Ani äng dä Paw Hnadaga a ha äkiyä tawngei khäl.

Ni khäl che nini poh eyeih lah saw, äini äi khäl thawka alang gong che ekhet. Ni ekhet la dä äi khäl kheni tänaka pongal chaksaw.

Krito ängtu nangnih dütih khäl duk känäng nini hengal. Äi koong hawn pre a käh vawn khäl koong nini lung khraw ei khäl. Äiya Hnadaga käh set pawta Krito om bala mäi.

Krito käh jelkhiyamsa la nangnih lunga khiyup bala taw seh. Nangnih ni ejelkhiyamsa koong dä kantha ak nini thänei saw awlaw nangnih a panei hmuei saw. Äi koong äkiyä tawngei khäl.

Äi koong luhdül äng käh pawyah saw hlü khäl kheni henal chak khäl. Äi khäl che ni huih, ni mik sawuvei saw, sanh ti saw, naw chawgraw ei saw, pawyah saw lung hlü awlaw nawlawphah saw. Nawlawphah saw che ulupchaw nupujaw saw huih dä.

Iyaäm nangnih che nini düdäk saw huih dä. Awlaw nangnih käh sawk che Krito äng Hnadaga duka thupei bala mäi.

Äini nangnih ni khäl nini hläh alaih saw tawn. Äi khäl che ni, naman, naman nung lonawk saw, awlaw khrawng ming nawhlawngh saw, khrawng ming äng ese näkräu saw, ehlei nejeng saw khäl kheni hlätal khäl.

Hngat la hngata hlei naw aichu. Iyaäm nangnih ephem mäichoh khrang khäl nini hiyänal däk. Nangnih khrawng tha nini thäneyal däk. Hnadaga la nangnih a sawk tha anang pekal däk. Nangnih tua Ani a unung nini hmawtai.

Pawtaw khälo, nangnih nini phiya a khet naw khäl, anih a kuluh naw ai chu.

Sämäichaw khälo, üküt krong äng ni nangnih nini nupaw kheu ngei khäl. Iyaäm äi äng Boi awpiyaw.

Phiya khälo, nangnih nini pawtaw sitha äng mäi khäl. Iyaäm Boi käh khrawng khäl koong ni bi dä awtawn saw bi.