Popular Bible Verses from 1 Juan 5

Share

Aw walaꞌ da ya kakallekan tadun magpalapit adti Tyumanem. Kun magsekat kitadun magi sa kanan pagbayaꞌ, pakanyegan nan kitadun.

Aw asuntu na kya-ede-an tadun na pigpakanyegan nan ya pangkay unu na pigsekat tadun kanan, kya-ede-an tadun uman na pigtubag da nan ya kanaten pigsekat.

Kay ya pagginawa tadun sa Tyumanem, yan ya pagdalug tadun sa manga suguꞌ nan. Aw diliꞌ to-o malug dalugun ya kanan manga suguꞌ. Kay mabatug da tadun degen ya malatay asini tas na lupaꞌ asuntu na iseꞌ da kitadun na Tyumanem. Aw ya pagdeg tadun sa kadég na malatay, magi saba oloꞌ sa pagpangintu-u tadun kan Jisu-Kristu.

Ya utaw na dyumawat sa Iseꞌ na Tyumanem, nyatagtun da nan ya ginawa na walaꞌ ya katigkasan. Manang ya utaw na walaꞌ dawat sa Iseꞌ na Tyumanem, walaꞌ nan katagtun ya ginawa na walaꞌ ya katigkasan.

Pigsulat ku ya kadég yeiy adti kamayu na nyangintu-u sa ngalan na Iseꞌ na Tyumanem pada maka-edeꞌ kamu na nyatagtun da mayu ya ginawa na walaꞌ ya katigkasan.

Kya-ede-an tadun na ya utaw na nya-imoꞌ da iseꞌ na Tyumanem, diliꞌ da sakanan magpadeleg magpakasalaꞌ. Kay pigtamengan da saba sakanan ni Jisu-Kristu na Iseꞌ na Tyumanem, aw diliꞌ da kitadun ni Satanas mabatug dumala͡an.