Popular Bible Verses from Roma 6

Share

Roonamo ponambona dosa sumai o mate, maka o rahumatina Aulataʼala sumai o dhadhi mobakaa mominaakana i Isa Al Masi Oputa Momalanga.

Ingkomiu indamo bheamembali akuasaikomiu dosa, roonamo indamo udhadhi uose Hukumuna Taurati, maka udhadhi i tambena rahumatina Aulataʼala.

Maʼanana o kapapebhahoka sumai amembali tanda ande ingkita tamatemo tee tatokoburumo tapoose tee Al Masi. Tee wakutuuna Aulataʼala apake kuasana momulia to apadhadhiaka Isa pendua, ingkita uka tatopadhadhimo pendua i nuncana dhadhi mobhaau.

Bholi upasaraakaaka manga parewana badamiu i kuasana dosa tee upakea to haejati madhaki. Maka upasaraakaakamea o karomiu to Aulataʼala mboomo manga mia mopadhana ipadhadhina pendua minaaka i mate, tee upasaraakaakamea manga parewana badamiu to Aulataʼala mamudhaakana upakea to manga giu mobanara.

Ingkita tamataua ande o karota momangengena padhamo atoloe i kau salib apobhawa tee Al Masi, mamudhaakana o kuasana dosa modhaangiana i nuncana karota atopahancuru, sabutuna inda mangapabhatua dosata.

Ingkomiu uka tabeana uabhi karomiu umate to dosa, maka udhadhi to Aulataʼala alaloi Isa Al Masi.

Jadi opea bheipewauta sapadhana tapotibhaaka rahumatina Aulataʼala? Buaka ingkita tabeana tatorotorosu tapewau dosa mamudhaakana o Aulataʼala ahanda mangadhawuaka rahumatina? Atantumo inda! Roonamo ande tamate tapoose tee Isa, maʼanana o kuasana dosa padhamo apanaindaia to ingkita. Atantumo ingkita bholi tatorotorosu tadhadhi i nuncana dosa mboomo wakutuuna ingkita indapo taose Al Masi!

Ingkomiu dhaanamo umataua, ande bheupasaraakaaka karomiu to umembali bhatuana mia mosagaanana, ingkomiu bheumembali bhatuana mia itaʼatimiu sumai; malape umembali bhatuana dosa to mokapalaikomiu uporopeaka i dhala i mateaka atawa o bhatuana kataʼati to mokapalaikomiu uporopeaka i dhalana kabanara.

Maka usukurumo tee Aulataʼala, roonamo i piamo itu ingkomiu umembali manga bhatuana dosa, maka sii-sii tee kampuu-mpuuna incamiu uose kaadhari mobanara mopadhana iadhariakana to ingkomiu. Ingkomiu padhamo utopabebasi minaaka i dosa, tee sii-sii umembalimo manga bhatuana kabanara.