Popular Bible Verses from Ezayi 40

Share

Asubiza umunyantegenke imbaraga, akomeza unaniwe.

Abasore barananirwa bagacogora, abagabo b'intwari na bo baradohoka. Nyamara abiringira Uhoraho bazasubizwa imbaraga, bazitera hejuru nka za kagoma ziguruka, baziruka be kunanirwa, bazagenda be kudohoka.

Mbese ntimwari mubizi? Ese ntabwo mwigeze mubyumva? Uhoraho ni Imana iteka ryose, ni we wahanze impera z'isi, ntiyigera acika intege cyangwa ngo ananirwe, ubuhanga bwe nta waburondora.

Nimwumve ijwi ry'urangururira mu butayu ati: “Nimutunganye inzira y'Uhoraho, nimuringanirize Imana yacu inzira mu kidaturwa.

Koko rero abantu ni nk'ibyatsi, ibyatsi biruma indabyo zikarabirana, nyamara Ijambo ry'Imana yacu rihoraho.’ ”

Ikuzo ry'Uhoraho rizahishurwa, abantu bose bazaribona.” Uko ni ko Uhoraho avuze.

Imibande yose izigizwa hejuru, imisozi yose n'udusozi bizitswa, inzira zigoramye zizagororwa, izasibye zizasiburwa.

Azaragira umukumbi we nk'umushumba, azakoranya abantu be, azababumbatira nk'abana b'intama, azabayobora neza nk'intama zonsa.

Nimwubure amaso murebe ku ijuru, ni nde waremye ziriya nyenyeri? Ni uwazishyize mu byiciro byazo akazita amazina. Afite imbaraga nyinshi n'ububasha bukaze, bityo nta nyenyeri n'imwe ishobora kuzimira.

Uwo ni we uganje hejuru y'isi, abona abayituye bameze nk'inzige. Yabambye ijuru nk'umwenda munini, yaribambye nk'ihema kugira ngo arituremo.

Nimubwirane ubugwaneza abantu b'i Yeruzalemu, nimubamenyeshe ko agahato barimo karangiye, ibicumuro byabo birababariwe, Uhoraho yabahannye bihagije kubera ibyaha byabo.

Ndumva ijwi ry'uvuga ati: “Ngaho tangaza ubutumwa.” Ndamubaza nti: “Ni ubuhe butumwa ntangaza.” Aransubiza ati: “Tangaza ibi: ‘Abantu bose bameze nk'ibyatsi, ntibarama ni nk'indabyo zo ku gasozi. Ibyatsi biruma, indabyo zikarabirana, iyo Uhoraho abihushyeho birarabirana.

Koko Nyagasani Uhoraho Nyir'imbaraga araje, aje afite ububasha bwo gutegeka, dore azanye n'abantu yacunguye.

Nimuhumurize ubwoko bwanjye, nimubuhumurize ni ko Imana yanyu ivuze.

Ni nde wapima inyanja akoresheje ikiganza? Ni nde wapimisha ijuru ukuboko kwe? Ni nde wapimisha icyibo ubutaka bwo ku isi? Ni nde wapima imisozi n'udusozi ku minzani? Ni nde wabasha gusobanukirwa Mwuka w'Uhoraho? Ni nde wamugira inama akamwigisha? Ni nde Uhoraho yagishije inama ngo asobanukirwe? Ni nde wamwigishije imigenzereze itunganye? Ni nde wamwigishije ubumenyi n'ubuhanga?