Popular Bible Verses from Hébreux 11

Share

Gôéétsa môtéma wetso gébé na paga ékegea mbe ôkina buétsé gô éne éténdéda éwe. Gôéétsa môtéma wetso gébé na paga ékegea mbe ôdigaa ti eembe ômani éena éne éténdédewe, buéyé mbe éwe madeo ôsiena éangô. Va mbeego omee amaséngu na Nzambé ôséngu, te ane amamôétsa mitéma miaô mietso gémôtsumé paga.

Tambô gôsaba môma oongôa étubéda Nzambé gényônga ôkô angô andé na paga. Endé te nane. One awesea na gôndé Nzambé te ône eetsa môtémee wetso gébé na paga mbe Nzambé andéké, na mbe Nzambé amenya étsutsuga gôndé ane amôbutani.

Wa n’anyô gôétsa Nzambé mitémamie gébé na paga vanigôgéô we mbe Nzambé amakana tsina n’oba te na ôgi ôtévo. Ene éenanôni émakanô gô ngudi yene éseenanôni.

Abraham ameetsa Nzambé môtémedi wetso na asitsumé môtôma aNzambé paga. Amamôgobeda gôékea na gô nyene tsenge éméétsô angô na Nzambé ga mikuanya. Abraham amatôta go tsenge éedi gémenye gô tsengene ékeangô. Amadigaa ga môgenda gô tsengene émavangéô angô na Nzambé, ivô amaténdéda ôgi aNzambé gébé na paga. Angô amadigaa na Isaac na Jacob gô yeba yebandé. Ahngô muetso amaténdéda ôvangee aNzambé.

Noé ameetsa Nzambé môtémedi wetso na asitsumé meevédéô maNzambé paga. Buéyé mbe gamabakangô madeo asiena éne émavovo Nzambé mbe éngabuéa, Noé amasaa mbôngône. Angô na gévia sedi amoobou. Gôsibé Noé na paga, mitayimie mimeetsô angô na Nzambé mimeeséda oma muetso. Gôsitsumé angô Nzambé paga, Noé ameetsô n’edi ôséngu.

Hénoch ameetsa Nzambé môtémedi wetso gétsumé ôgi edi paga na angô asiwé ivô amatsuaô na gôndé Nzambé. Otô aHénoch ôsidenganô gôébégô Nzambé amabongo angô na gôndé amuene. Matendeo MaNzambé matônigôa mbe Hénoch madeo asitômbu na g’ôba amatubéda Nzambé gényônga.

Abel ameetsa Nzambé môtémee wetso gétsumé mitôma miedi paga na amadeekeda Nzambé ôgondoku ômootéa ényepa n’one aCaïn. Gôsibé Abel na paga, Nzambé amabono angô ti eembe asibé na ébéva. Na amasinga ôgondoku aAbel. Gô éné émayanza Abel na môtémedi wetso gôndé Nzambé atôongô ndongi deo noo buéyé mbe amamana éwa.

Sara asitsumé ôvangee aNzambé paga mbe angadiia ngudi gôébôta muana buéyé gamadômbéa ôtôe wedi. Na ameetsa môtémedi wetso mbe éngaba te gamavovo Nzambé.

Abraham amaténdéda gôéengéa gô môsenge ôvôni ômasaaô g’ôbôga amôsôba. Amuene Nzambé amatasa gamanyôngéô angô môsenge ône. Na môsééne te amuene Nzambé.

Na Moïse te mônongovo. Vamoongôgangô asitsumé ôgi aNzambé paga, na amamôétsa môtémedi wetso. Te gamakinangô gôétetu mbe, muana aPharaon. Moïse amasevoa nzéane éagékuanô émakea asi mbumu éaNzambé. Amakina nzéa éamabégô mabévani matsengene na gényônga sedi sagébéndéké. Moïse amamenya mbe gôésipa gô gékuanô sainee éaChrist, te éne éndé na tsoongo. Géé gôédigaa n’okitie wetso atsengene éaEgypte, éne ésibé na tsoongo. Gôébégô Moïse amaténdéda na amabono miso medi te gô môsenda agô mbene éanzéa. Moïse ameetsa Nzambé môtémedi wetso na asitsumé ngudi yedi paga gôénôtôga gô Egypte. G’ôpisa amôtômine atsenge asiene gomo. Amasipa ti eembe ameena Nzambé, ône aseenanôni, na miso medi na kiaa.

Gômeetsa Abraham môtémedi wetso na gôndé Nzambé gétsumé mitôma miedi paga amamôgobeda gôédeekeda muanedi Isaac ôgondoku vamakanégu angô na Nzambé. Muanee ône te muanee ovanga aNzambé n’Abraham. Eébéyée nane, Abraham asikékôé ôgi aNzambé gôéyôha muanedi ékika gôémôdeekeda ôgondoku.

Rahab môgeto agésasô te mônongovo. Ameetsa Nzambé môtémee na asitsumé ngudi yedi paga. Amawedéa na môtéma ômasumani amôgôôe asi Israël amaseta môsenge ndodi. Na Rahab asiwa gamawa akedi muetso ahmakékôa ôgi aNzambé.

Oma aIsraël ameetsa Nzambé mitéma miaô gébé na paga. Na ahmaabôga mubue ôéndô mbe Rouge, ga môma ayeta gô tsenye abobo, gémenye mbe gômabaka meba. Géé asi Egypte, ahmaanda ahngô gô ngima asiôngôé éabôga, ahmatôndôméa

Oma aIsraël ameetsa Nzambé mitémamie gébé na paga na amaseta môsenge aJéricho pitsi tsambué. Gôsibé ahngô na buétsé, migômbamie mivôni miamôsenge aJéricho mimapanzéga.

Moïse asitsumé môtôma aNzambé paga gôébandôa Paquene éamapanga. Amatôma omedi gôésôga nzina gô diômbaye yaô gôémenyeda môsi g’ôba andé n’otômu owa mbe: oota gô yeba yaô te ootaga, géengéé gô yangô gôéyôha anee akuua aIsraël.

Joseph ameetsa Nzambé môtémedi wetso na asitsumé ôgi na ngudi yaNzambé paga gôékusédahngô g’ôvéga ômadigahngô gô Egypte. G’ôpayi edi amatsikéa anedi ôgi mbe: Vangakusanye g’ôvéga nôkea n’epee éotô ami. Nombiatsika éangô gô tsengene.

Jacob ameetsa Nzambé môtémedi wetso gébé na paga. Amakuméda Nzambé na ameetsa mate gôndé anamôgôô amuanedi Joseph. Te vamabaka Jacob aka gôéwa na amasipa gô môtungee wedi.

Isaac ameetsa môtémedi wetso na asitsumé Nzambé paga gô éne émavovo angô mbe, éngabuéa. Na ameetsa anedi Jacob na Esaü mate gô mane mangeena ahngô gô mbene.