Popular Bible Verses from Filipi 2

Share

Á yé mage á nyɔɔna naa á lage kamunim á pa á tete. Nam gwooni-na á tete á pa daane, se á ta‑á nege á dwonna maama lanyerane. Nɔɔno maama jege se o boŋe o nii o na wó woli o dwoŋi tei to, ko dae we se o woli o tete yerane.

Á boboŋa yam jege se ya taa ye nenɛɛne Yezu Krista na boŋe tei to mo.

Ko ná ye wonto, o maŋe o jege Wɛ nyenyego mo. O dedaane Baŋa Wɛ ye bedwe, ye o wo ke o boboŋa ne se o fe o tete se ba taa mae daane. O nam na ke tei to, o tiŋi tento maama dáa ne mo, ye o pa o tete ji ne kabaa tei. O déem ma ba o nye de nabiina. O na tu o jege nabiina nyenyego konto to, o déem tu o tete ye o sɛ Wɛ ni o ba o te. Ko nam dae toone de toone, ko ye ba page‑o dagara yuu ne mo pa se o te.

Kolo ŋwaane Wɛ mo yeini o ke dam á bochara ne, pa se á lage kikia yalo na wó su o yi ye á wane-ya á ke.

Konto ŋwaane Wɛ laam ma zeiŋi Yezu yuu wɛ-wɛ de zula, ye o daare o pa‑o yere delo na dwoi yera maama to. Mo kokuri maŋa wó ba se nɔɔna maama kuni dwoona ba zuli Yezu o yere-zɔŋɔ kom ŋwaane. Balo na wo telaao ne, naa tega baŋa ne, naa tega kuri ne to maama jege se ba kuni nadwoona mo ba zuli‑o. Ba maama ni taane wó ta jaja we, Yezu Krista ye ba Teiru. Konto wó pa dé Kwo Wɛ na zula lanyerane.

Woŋo kolo maama á na kea, se á yé ta‑á poona, naa á mage ni-kantɔgɔ ko baŋa ne. Konto mo á wó ta‑á jege chega Wɛ tei ne, ye lwarem bá taa wo á bochara ne. Á wó ta‑á ye Wɛ bia balo na ba jege tusim ye á zoore nɔn-balwaaro balo boboŋa na ba tɔge chwoŋa to tetare ne. Á wó ta‑á jege pwooni á pa logo baŋa, ne chalechwe tei

Konto ŋwaane, a badwoŋ-swonnu bam, ko maŋe se á maane á nii maŋa kalo amo ya na wo á tei ne ye á sɛ amo ni to. Amo nam na tera leile to, á jege se á tiini á ta‑á sɛ amo ni se ko ja gaale. Ta‑á kɔre-na Wɛ lanyerane ye á yera sae, se á kwaane á pa o na jwoŋi abam o yage tei to ja kuri lanyerane.