Popular Bible Verses from Jemsi 1

Share

A nu-bia bam, maŋa kalo maama cham ná tu abam baŋa, se á ta‑á jege wopwolo lanyerane, kolo ŋwaane á yei we yaara dwi dwi ná tui abam tei, ko ye se ya maŋe abam mo ya nii á na ke á wo-dedoa de Wɛ tei to. Ko kwaga ne ko laam wó pa se á ta‑á jege pu-dɛa lanyerane á woli da.

Abam wolo maama nam ná yeiri kolo na lana se o ke to, konto tu jege se o lwoori swa mo Wɛ tei ne. Wɛ yeini o woli nɔɔna maama lanyerane mo, ye o ba ŋwaana. Nmo ná lwoori swa o tei ne, o wó ke konto mo o pa‑m.

A nu-bi-swonnu bam, ta‑á yei-na we, nɔɔno maama jege se o zuri o yera mo o taa cheigi o dwoŋi taane, se o yé gare o ŋɔɔne. O jege se o ja o bane mo.

Kwaane-na se á ta‑á zege lanyerane de pu-dɛa se á yé jwoori kwaga. Keim dem konto wó fɔge abam fase, pa se á boboŋa kweere de Wɛ chwoŋa tɔgem, se á yé wane á ga kolokolo.

Nam ta‑á yei-na se á ta‑á tɔge Wɛ kwora kam, se ko dae we á ta‑á cheigi o taane dem yerane.

Nɔɔno wolo ná wo cham wone ye o ná zege lanyerane de pu-dɛa, konto tu jege yu-ywoŋo mo. O yaara yam ná faŋe‑o ya ti, ye o ta ná zege lanyerane, o laam wó na Wɛ pɛɛre delo na ye ŋwea chekke to. Wɛ pwooli se o pa ŋwea kam konto mo balo maama na swoi‑o to.

Pɛɛre delo maama na lana ye de jege chega to mo dé yeini dé jwoŋi Wɛ tei ne. Wonto mo ke wonnu telo maama na wo wɛyuu ne ye te pae pwooni to. Wonnu tem konto mo yeini te wae te pipira wea de tete. Wɛ nam ba leira ne tento wonnu tem tei.

Nɔɔno wolo ná cheigi Wɛ taane ye o ba tɔge de na bere tei to, kotu gane o tete mo. O nye nenɛɛne nɔɔno mo kwei niu se o ma o nii o tete. O ma nii o na o yibia na ye tei to, ye o laam pipiri o kɛ o daare niu kom. Ko wo dáane de o na swei o yibia kam na ye tei to.

Dé Kwo Wɛ nam na lage se dé sɛ‑o tei to mo ye se dé taa zeini botara de kadeina balo na yaare to, ye dé kwaane dé che dé tete de logo baŋa wo-zɔɔna yam. Wɛ kɔrɔ konto dwoŋi mo su Wɛ yi, ye tusim tere ko wone.

Nɔɔno ná nɛ maŋem, o yé zaŋe o kwei o ma gwori Wɛ. O yé zaŋe o ta nenɛɛne, ko ye Wɛ mo soge‑o se o ke wo-lɔŋɔ. Kolokolo tera ko na wó wane ko soge Wɛ se o tusi, ye Wɛ tete bá sɛ se o soge nɔɔno se o tusi. Woŋo kolo nam na yeini ko soge‑m to ye n tete boboŋa mo. Ya maa pae n fera zoore wo-zɔɔna, ye ya gane‑m se n vo n to gwoŋo ne.

Nmo wolo na tɔge Yezu ye yiniga jege‑m to, se n ta‑n jege wopwolo de Wɛ na pɛ n jege yere o tei ne to ŋwaane.