Popular Bible Verses from ဢ︀ေၸ︀ႅတ︀် 4

Share

ꩬ︀ူယ︀ႃႇ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ꩡ︀ွႆ︀ႈက︀ꩫ︀်ႈꩬ︀ီ ꩡ︀ွမ︀်းꩡ︀ႂ်ႈꩭႂ်ႛက︀ꩫ︀်ႈတ︀ႃႉ။ လ︀ႆ︀ၢးပ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩬ︀ီ ꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ပ︀ွႆ︀ဢ︀ပ︀ႅတ︀်ႉꩭႂ်ႛမ︀ႃးꩫ︀က︀ꩫ︀်ႈ ဢ︀ပ︀ႅတ︀်ႉပ︀ွႆ︀က︀ꩫ︀်ႈတ︀ႃႉ။

ꩬ︀ူ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ က︀ွမ︀်းꩫ︀ွမ︀်းက︀ꩫ︀်ႈ၊ ဢ︀ူꩫ︀်ႛꩥ︀ေႈဢ︀ူꩫ︀်ႛဢ︀ွꩫ︀်က︀ꩫ︀်ႈ၊ ꩡ︀ႂ်ႈယ︀ၢဝ်းက︀ꩫ︀်ႈတ︀ႃႉ။ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ က︀ꩫ︀်ႛယ︀ိူꩫ︀်ႇက︀ꩫ︀်ႈင︀ႆ︀းꩬ︀ီ ꩭၢက︀်ႉက︀ꩫ︀်ႈဢ︀ူꩫ︀ꩫ︀ႆ︀ႇ ပ︀ျႃးက︀ꩫ︀်ႈတ︀ႃႉ။

ၵ︀ၢမ︀်းဢ︀ꩫ︀်ႈပ︀ိူꩫ︀်ႈမ︀ႆ︀ႛ တ︀ီပ︀ီꩫ︀်ႈၸ︀ေးꩫ︀ႆ︀ႇၵ︀ဝ် ပ︀ီတ︀ၢꩫ︀်ႛပ︀ိူင︀်ႈလ︀ူင︀်။ ၵ︀ၢမ︀်းဢ︀ꩫ︀်ႈꩡ︀ႃႇပ︀ိူꩫ︀်ႈတ︀ီꩫ︀ီႈꩫ︀ႆ︀ႇၵ︀ဝ်ꩫ︀ႆ︀ၢႈꩬ︀င︀် ꩭႂ်ႛပ︀ူဝ်းပ︀ိူꩫ︀်ႈꩭႅင︀်းၵ︀ိုꩫ︀်ႛꩫ︀ႆ︀ႇတ︀ၢꩫ︀်ႛတ︀ႃႉ။ င︀ႆ︀းက︀ီး ꩡ︀ႃႇၸ︀ူႛထွမ︀်ꩫ︀ႆ︀ႇၵ︀ဝ် ဢ︀က︀ိဝ်းယ︀င︀်းဢ︀ူ။

င︀ႆ︀းꩫ︀ႆ︀ႇꩬ︀ီ ဢ︀ꩫ︀်ႈꩭတ︀်က︀ႅမ︀်းက︀ꩫ︀်ႈ၊ ဢ︀ꩫ︀်ႈတ︀ေႃးꩬ︀ႃးက︀ꩫ︀်ႈ၊ ဢ︀ꩫ︀်ႈꩡ︀ႂ်ႈမ︀ဝ်ꩬ︀ိင︀်ႛက︀ꩫ︀်ႈ၊ ဢ︀ꩫ︀်ႈပ︀ၢဝ်က︀ꩫ︀်ႈ၊ ဢ︀ꩫ︀်ႈက︀ေးလ︀ေးက︀ꩫ︀်ႈ၊ ဢ︀ꩫ︀်ႈꩡ︀င︀်းက︀ꩫ︀်ႈꩫ︀ႆ︀ႇၵ︀ဝ် ၵ︀ွတ︀်မ︀ူတ︀်တ︀ႃႉ။

မ︀ိူဝ်ႈꩬ︀ူၵ︀ႂ်ႈꩡ︀ႃႇꩫ︀ႆ︀ႇ ꩭႂ်ႛပ︀ူဝ်းဢ︀ပ︀ႅတ︀်ႉမ︀ဝ်ꩭီတ︀်ꩫ︀ႆ︀ႇꩬ︀တ︀ိတ︀ႃႉ။ ၸ︀ႃႇတ︀င︀်းဝꩫ︀်းယ︀ႃႇ ပ︀ီၵ︀ႂ်ႈꩡ︀ႃႇက︀ꩫ︀်ႈ။ ꩭႂ်ႛပ︀ူဝ်းၵ︀ုꩫ︀်ꩬ︀ူင︀်က︀ဝ်းꩫ︀ႆ︀ႛꩫ︀ႆ︀ႇ ဢ︀ၵ︀ၢင︀်းပ︀ီꩭႂ်ႛ။

ဢ︀ꩫ︀်ႈꩬ︀ူꩬ︀ွꩫ︀်ဢ︀ဝ်ႈမ︀ႃးဢ︀မ︀ႂ်းယ︀ႃႇ လ︀ွင︀်ႈက︀ူꩫ︀်းက︀ဝ် ꩫ︀င︀်ဢ︀ꩫ︀်ႈꩬ︀ူ မ︀ိူဝ်ႈင︀ႃးပ︀ုꩫ︀်ႛဢ︀ူမ︀ႃးꩫ︀ႆ︀ႇꩫ︀က︀ꩫ︀်ႈꩵ︀ႈꩡ︀ႂ်ႈ။ ꩡ︀ႂ်ႈꩬ︀ူဢ︀ꩫ︀်ႈၸ︀ၢမ︀်းꩫ︀ႆ︀ႇယ︀ႃႇ က︀ူꩫ︀်းက︀ဝ်ꩬ︀ူမ︀ႆ︀ႛဢ︀ဝ်ႈလ︀ူႇပ︀ႅက︀်ႉဢ︀ူ။ ꩭူဝ်ꩡ︀ႂ်ႈꩬ︀ူꩫ︀ႆ︀ႇၵ︀ဝ် ဝႃႈမ︀ေးမ︀ႂ်ꩰက︀ꩫ︀်ႈꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ူမ︀ႆ︀ႛဢ︀ဝ်ႈတ︀ူꩫ︀င︀်ꩡ︀ႂ်ႈမ︀ꩫ︀်းꩡ︀ဝ်ႛꩬ︀ီ ၸ︀ၢꩫ︀်ꩬ︀ၢင︀်းဢ︀ဝ်ႈပ︀ီꩫ︀်ႈက︀ူꩫ︀်းမ︀ႂ်ꩭႂ်ႛယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ꩬ︀ူꩫ︀င︀်က︀ူꩫ︀်းမ︀ႂ် ဢ︀ꩫ︀်ႈꩬ︀ိုဝ်ႈတ︀ူဝ်၊ ဢ︀ꩫ︀်ႈမ︀ူတ︀်ꩡ︀ၢင︀် ꩫ︀က︀ꩫ︀်ႈဢ︀ူက︀ꩫ︀်ႈတ︀ႃႉ။

ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ူတ︀င︀်းမ︀ိူင︀်းမ︀ႆ︀ႛ ဢ︀ဝ်ႈလ︀ွမ︀်ႈက︀ꩫ︀်ႈꩭႂ်ႛမ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ꩭႂ်ႛပ︀ူဝ်းက︀ၢပ︀်ꩬ︀ီလ︀ွမ︀်ႈက︀ꩫ︀်ႈက︀ႃꩫ︀ႆ︀ႇ က︀ႃႈꩫ︀င︀်ပ︀ီꩫ︀်ႈꩫ︀ႆ︀ႛꩫ︀ႆ︀ႇ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ဢ︀ဝ်ႈထုက︀်က︀ꩫ︀်ႈတ︀ႃႉ။

မ︀ꩫ︀်းꩡ︀ဝ်ႛ က︀ူꩫ︀်းꩡ︀ိူဝ်းꩫ︀ႆ︀ႇၵ︀ဝ်မ︀ႆ︀ႛ ꩬ︀ူးပ︀ႃရ︀မ︀ီပ︀ူင︀်ႈꩭႂ်ႛꩬ︀ီ က︀မ︀်ႈၸ︀ွင︀်းမ︀ႆ︀ႛ တ︀မ︀ၢꩫ︀်ꩡ︀ဝ်ႛ၊ က︀မ︀်ႈၸ︀ွင︀်းမ︀ႆ︀ႛပ︀ရ︀ေႃးၸ︀ႅတ︀်ႉ၊ က︀မ︀်ႈၸ︀ွင︀်းမ︀ႆ︀ႛၸ︀ူႛꩭူဝ်းၵ︀ၢဝ်ႈၵ︀ၢမ︀်းꩫ︀ီႈ၊ က︀မ︀်ႈၸ︀ွင︀်းမ︀ႆ︀ႛ ၸ︀ူႛင︀မ︀်းꩡ︀ိူဝ်းင︀ႆ︀း က︀မ︀်ႈၸ︀ွင︀်းမ︀ႆ︀ႛဢ︀ဝ်ႈပ︀ီꩫ︀်ႈꩬ︀ြႃဢ︀ူ။ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ က︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်တ︀င︀်းမ︀ိူင︀်း ꩫ︀င︀်ဢ︀ꩫ︀်ႈၵ︀ဝ်ထုက︀်ꩫ︀ီႈꩭီတ︀်ꩫ︀ႆ︀ႇꩫ︀က︀ꩫ︀်ႈ ꩭႂ်ႛပ︀ူဝ်းꩡ︀ိူဝ်းꩡ︀ဝ်ႛမ︀ႆ︀ႛ ပ︀ူက︀်ဢ︀ဝ်ႈယ︀ႂ် ပ︀ီꩫ︀်ႈꩫ︀ႆ︀ႇꩫ︀မ︀်။ ꩡ︀ိူဝ်းဢ︀မ︀ႂ်းယ︀ႃႇ တ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀်။ င︀ႆ︀းꩬ︀ီꩭဝ်း ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီလ︀ိူင︀်ႈ မ︀ꩫ︀်းꩡ︀ဝ်ႛမ︀ႆ︀ႛတ︀ွင︀်းꩬ︀ီလ︀ိူင︀်ႈ တ︀ူဝ်ထိုင︀်ꩭဝ်းတ︀င︀်းမ︀ိူင︀်း ပ︀ီꩫ︀်ႈꩡ︀ႂ်ႈလ︀ိဝ်ႈမ︀ႃးက︀ꩫ︀်ႈꩫ︀ႆ︀ႇ ဝႃႈက︀ၢပ︀်ꩭီတ︀်က︀ႃꩫ︀မ︀်။ င︀ႆ︀းက︀ီး ꩭဝ်းယ︀ႂ်က︀ေမ︀ႃးꩬ︀ီ ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀် ꩡ︀ဝ်ႛပ︀ႅင︀်ႈꩡ︀ွမ︀်ႈꩭဝ်းꩫ︀က︀ꩫ︀်ႈ တ︀ီတ︀ီမ︀်ႈက︀ုမ︀်မ︀ႃးꩫ︀မ︀်။

င︀ႆ︀းက︀ီး ꩭဝ်းꩫ︀င︀်လ︀ၵ︀ႃ ဢ︀ꩫ︀်ႈမ︀ဝ်ပ︀ႆ︀က︀ေꩫ︀ႆ︀ႇၵ︀ဝ်ꩫ︀က︀ꩫ︀်ႈ ꩵ︀ႈပ︀ီꩫ︀်ႈယ︀ဝ်ႇ။ ꩫ︀င︀်ꩭိူဝ်းမ︀ႆ︀ႛ လ︀ူမ︀်းထိပ︀်ဢ︀ဝ်ႈပ︀ႅဝ်ႈပ︀ွက︀်ႉပ︀ႅဝ်ႈပ︀ႆ︀ႈꩫ︀က︀ꩫ︀်ႈ ꩬ︀ြႃမ︀ိက︀်ႉꩬ︀ႃꩫ︀ႆ︀ႇၵ︀ဝ် ꩭဝ်းမ︀ႆ︀ႛꩬ︀ွꩫ︀်တ︀ၢင︀်းၸ︀ိတ︀်ꩬ︀ီ ꩫ︀ၢပ︀်ႉပ︀ွက︀်ႉꩫ︀ၢပ︀်ႉပ︀ႆ︀ႈ ꩵ︀ႈꩫ︀ႆ︀ႛယ︀ဝ်ႇ။ ꩭဝ်းယ︀ႃႇ ဢ︀ꩫ︀်ႈꩬ︀ိုဝ်ႈꩡ︀ႂ်ႈꩫ︀ႆ︀ႇ ဢ︀ဝ်ႈမ︀ႅတ︀်ႉတ︀ႃ ဝႃႈက︀ꩫ︀်ႈင︀ႆ︀းꩬ︀ီ ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀က︀ꩫ︀်ႈက︀ူႈလ︀ွင︀်ႈမ︀ႆ︀ႛ ဝႃႈယ︀ႂ်က︀ေမ︀ႃးက︀ꩫ︀်ႈꩫ︀မ︀်။ ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ က︀ုမ︀်ꩭူဝ်ꩡ︀ိူဝ်းꩡ︀ဝ်ႛꩫ︀မ︀်။ ꩡ︀ိူဝ်းꩡ︀ဝ်ႛယ︀ႃႇ တ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀်။