Popular Bible Verses from Isaias 40

Share

I ta da forsa pa kil ku sta kansadu, i ta fortifika kil ku sta fraku.

Jovens na kansa, e na pirdi forsa; rapasis nobu e na bin kai, ma kilis ku na pera na SIÑOR e na arnoba se forsa. E na subi ku asas suma agia, e na kuri sin kansa, e na yanda sin pirdi forsa.

Bu ka sibi? Bu ka obi kuma ki Deus ku ka ten kumsada nin kabantada, ku sedu SIÑOR, kil ku kumpu tudu parti di mundu, i ka ta kansa, nin si forsa ka ta kaba? Ningin ka pudi sibi ke ki na pensa.

Algin na grita: “Bo purpara kamiñu pa SIÑOR na lala; bo filanta un strada la pa no Deus.

Paja ta seku, si floris ta konkoñi, ma palabra di no Deus ta manti pa sempri.”

Gloria di SIÑOR na bin manifesta; jinti di tudu mundu na ojal, pabia i SIÑOR ku fala asin ku si boka.”

Tudu kobon na incisidu; tudu monti, garandi ku pikininu, na justandadu; strada ku jingi na filantadu; kamiñu ku ka bali na niveladu.

I na toma konta di si karnelis suma bakiadur; i na lambu karnelsiñus, i leba elis na si mon; kilis ku na mamanta, i ta leba elis ku mansesa.

Bo yalsa uju pa riba, bo jubi kin ku kumpu ki kusas, ku ta tira ki manga di strela un son un son, i coma elis pa se nomis. Pabia di si garandi forsa ku puder, nin un son ka na falta.

Deus sta sintadu na tronu riba di globu di mundu, ku si moraduris ta parsi na si uju suma firmingas. El ku ta distindi seu suma kurtina; i ta disdobral suma tenda pa mora nel.

Bo papia ku bondadi pa Jerusalen, bo kontal klaru kuma kastigu di si maldadi i kaba ja, kuma pres di mal ki fasi i pagadu ja; tambi i risibi di mon di SIÑOR dus bias mas pa tudu si pekadu.”

Vos fala: “Grita!” Algin punta: “Ke ku N na grita?” “Tudu jinti i suma paja; tudu se bonitasku i suma floris di matu. Paja ta seku, si floris ta konkoñi ora ku SIÑOR supra si folgu riba delis. Na bardadi, jinti i suma paja.

Ali SIÑOR Deus na bin ku puder; si mon na domina; i na bin ku si premiu, ku pagamentu pruntu na si mon.

Bo Deus fala: “Bo konsola ña pobu, bo konsola elis.

Kin ku ciga di midi yagu di mar ku si mon, o kin ku ciga di midi seu ku palmu di si mon? Kin ku ciga di midi reia di con ku kaneka, o i pesa monti, garandi o pikininu, na balansu? Kin ku ciga di gia Spiritu di SIÑOR, o kal konsijadur ku ciga di nsinal? Kin ku SIÑOR ciga di pidi konsiju, pa dal ntindimentu, pa mostral kamiñu sertu, pa nsinal jiresa o pa fasil sibi kamiñu di kuñisimentu?