Popular Bible Verses from Hebrifo 11

Share

Na afei gyidi ne ade a yɛn ani da so ho ahotoso ne nneɛma a yenhu ho adansegye. Na eyi mu na tetefo no nyaa adanse pa.

Na sɛ gyidi nnim a, obi ntumi nsɔ ani. Na ɛsɛ nea ɔba Onyankopɔn nkyɛn no sɛ, ogye di sɛ ɔwɔ hɔ, na ɔyɛ wɔn a wɔhwehwɛ n’akyi kwan no katuafo.

Gyidi na yɛde te ase sɛ wiase ahorow, wɔde Onyankopɔn asɛm na asiesie, enti nea ani tuae fi nneɛma a ɛnna adi mu na ɛbae.

Gyidi na wɔfrɛɛ Abraham no, ɔde osetie fi kɔɔ baabi a daakye obenya hɔ sɛ agyapade, na ofii adi a onnim nea ɔrekɔ. Gyidi na ɔde kɔyɛɛ ɔhɔho bɔhyɛ asase no so sɛ ananafo de so, na ɔne bɔhyɛ koro no ara adedifo Isak ne Yakob tenaa ntamadan mu.

Gyidi na nea wonnya nhui ho nsɛm baa Noa nkyɛn no, ɔde daa ne ho so siesiee adaka maa ne fi nkwagye, ɛno so na ɔnam buu wiase fɔ, na ɔyɛɛ gyidi ho trenee ɔdedifo.

Gyidi nti na wɔfaa Henok kɔe na wanhu owu; na wɔanhu no, efisɛ Onyankopɔn bɛfaa no kɔ ntia; na ansa na wɔbɛfa no akɔ no, onyaa adanse sɛ ɔsɔ Onyankopɔn ani.

Gyidi na Habel de bɔɔ afɔre a ɛso kyɛn Kain de maa Onyankopɔn. Ɛno so na ɔnam nyaa adanse sɛ ɔteɛ, efisɛ Onyankopɔn dii n’ayɛyɛde ho adanse, na ɛno so na ɔnam wui a ɔda so kasa.

Gyidi na Sara nso de nyaa ahoɔden nyinsɛnee, ɛbere a watwa ne nyin mu, efisɛ obuu nea ɔhyɛɛ bɔ no nokwafo.

Na ɔtwɛn kurow a ɛwɔ fapem a ne kyekyefo ne yɛfo ne Nyankopɔn.

Gyidi nti na Mose nyinii no, wampɛ sɛ wɔfrɛ no Farao babea ba, na ɔpawee sɛ ɔne Nyankopɔn man behu amane mmom kyɛn sɛ ɔbɛte bɔne mu dɛw nna tiaa bi. Obuu Kristo ahohora sɛ ahonya kɛse sen Misraim ahonyade, efisɛ ɔhwɛɛ akatua no. Gyidi nti na ogyaw Misraim hɔ a wansuro ɔhene abufuw, na omiaa n’ani tenaa mu sɛnea ohu nea wonhu no no.

Gyidi nti na wɔsɔɔ Abraham hwɛe no, ɔde Isak kɔbɔɔ afɔre, na nea ogyee bɔhyɛ no, de ne ba koro no kɔmae.

Gyidi nti na aguaman Rahab a ogyee akwansrafo no asomdwoe so no ansɛe amfra wɔn a wɔannye anni no mu.

Gyidi na wɔde twaa Ɛpo Kɔkɔɔ no sɛ fam a awo. Ɛno na Misraimfo resɔ ahwɛ no, ɛmenee wɔn.

Gyidi nti na Yeriko afasu a wotwaa ho hyiae nnansɔn no dwiriwii.

Gyidi na ɔde dii Twam ne mogyapete no, na mmakan no sɛefo no anka wɔn.

Gyidi na Yosef regyaa ne honhom mu no, ɔde bɔɔ Israel mma fi a wobefi akɔ no din, na ɔhyɛɛ ne nnompe ho samansew.

Gyidi na Yakob rebewu no, ɔde hyiraa Yosef mma baanu no, na omiaa ne pomatiri so sɔree.

Gyidi na Isak de hyiraa Yakob ne Esau, nneɛma a ɛbɛba ho.