Popular Bible Verses from Kolosay 3

Share

Ano iraira ko fangafang i, kasasipa'ayaw, kasasisolol. Masamaan ko pisolol no Tapang i tamowanan i, haenen ko no namo a misolol to tao.

Aka piharateng to no hkalan. Ka o no i kakarayanay ko sasarocoden namo a miharateng.

Ano o maanto a dmakan i, sarocoden ko faloco' namo a matayal. O saki Tapang ko tayal ako, caay ko saki tamdaw, han ko faloco'.

Maolah ko Kawas i tamowanan, pili'en Ningra kamo a malafinawlan Ningra. Saka, ka o adayayay, o sini'adaay, o misapo^neray, o damsayay, o kodaitay ko faloco' namo.

Rariden a miparo i faloco' namo ko sowal ni Kristo a makadofah. Ka o masamaamaanay a taneng ko sakasasipasifana' namo a mikrid, ka o 'olic ato fangcalay a radiw ato no 'adingoan a radiw to naifaloco'ay namo a pangiha' a mikansiya a pahmek to Kawas. O romasato, ano o maanto ko dmak, ano o maanto ko sowal namo i, pakaynien i ngangan no Tapang ci Yis ko sapidmak a ma^min, pakaynien i Cingraan ko nipikansiya to Wama a Kawas.

I tini tonini a dmak a ma^min i, pahapinangen ko olah. Nawhani o olah ko misongila'ay a mipalaccay to faloco' no tamdamdaw.

O nipakapotanto kamo i ci Kristoan a mapalowad a mapa'orip nai patay, saka, pasayraen i kakarayan ko faloco' namo. Nawhani ira itira ci Kristo a maro' i kawanan no Kawas.

Ka o rihaday ni Kristo ko mamikowan to faloco' namo. Nawhani o sakapitahidang no Kawas tamowanan a palaccayto tireng namo i, o sakararihadayaw namo. Saka, kararid a mikansiya kamo.

Orasaka, patayen ko nohkalan a tatiihay a dmak no tireng oya ma'odangay, kaackan a dmak, kasimelangan a dmak, o imah ato masamaamaanay a 'anof. (O 'anof i, o ccay no pita'ong to samiyay.)

Nawhani mapatayayto ko katlangay a faloco' namo. Matiya o nika caho katalahkal no nika tadamaan ni Kristo ko nika caho ka talahkal no so'linay a 'orip ita. Caho ka patalahkalen no Kawas anini konini.

Nikawrira, anini sato i, o lalafolafoten aca namo konini a dmak, aka to piliyaw a mafirang, a makter ato mi'intel. Aka somowal to milokesay ato kasimelangan a sowal.

Aka ka sasisamangah kamo, nawhani mahlongto namo a mifalah ko katlangay a faloco' ato dmak nonini, o mica'dongayto kamo to fa^lohay a faloco'. Onini a fa^lohay a faloco' i, o miringiay to misanga'ay a Kawas, masafa^loh a masafa^loh konini to sakasongila'aw namo a mafana' i Cingraan.

Kamo o fa'inay i, kaolahen ko fafahi namo, aka pisafaya' i cangraan.

Kamo o wawa i, ano o maanto a dmakan i, pitngil to sowal no mama ato ina. Nawhani o kalipahakan no Tapang konini.

Kamo o fafahi i, pihaklong to fa'inay namo, nawhani, o dado^do^doen aca no misaKristoay konini.