Popular Bible Verses from Ghlɔɔmö a ‑nʋa 8

Share

Yɩ 'wuë 'mö a dɔ'wʋ, ‑wa ‑waa Lagɔ, Lagɔ ‑sɛɛ ‑lɛ wa 'kä 'saa ɔ yɩbhää nʋʋ, ‑lii 'wuë ‑yɩ ghluëë, 'zoku oo, ‑nɩ a ‑nɩ oo, Lagɔ gbä 'n yɩ zʋä wa ‑li a ‑li.

Na dlɩ 'tɛɛ 'wʋ nɩɩ, ɛ yi kwiea ma oo, ɛ yi ‑bhölɩbhölɛɛ mɛɛ oo, ɛ yi Lagɔzuzukuu mi oo, ɛ yi ‑mä Lagɔ 'wʋ a 'mötɛɛnɩzuzukuzoku ‑mimii mi oo, ɛ yi ‑lii ‑yɩ ‑bhölɩɛ ‑sɩkaa mi oo, ɛ yi ‑mii lɛ 'kää bhäla yi mi oo, ɛ yi 'mötɛɛnɩlii ‑yɩ ‑wʋä ‑mä ghäyɩ 'wʋ mi oo, ɛ yi ‑yɩ ‑wʋä ‑mä 'kudu 'wʋ mi oo, Lagɔ, ‑ɔ tulanɩnyɩɛ ‑mä ‑Alowli Zezwii Kliisɩ 'mö 'ɔ ‑wawʋʋ 'ylimöö, ‑bhɛbhɛlu ‑mumuu 'nɩɛ bhɛnɩ wʋ ‑kanyɔ yɔwʋ ‑sɛ.

‑Maa ‑a 'yize a dɔ'wʋ, ‑aaa bhɛnɩ zaa, Lagɔ 'a 'Wugɔmʋʋ mɔɔ yiinyɩɛ 'wʋ. ‑A'bhï, ‑a 'kä Lagɔ bhibhe a'bhë a dɔ'wʋ, sɛ ‑a 'kää nʋʋ, ‑aaa ‑sɩbhä ‑yi, a‑a sluä nyɛmʋ. ‑Sɩbhä a za, Lagɔ 'a 'Wugɔmʋʋ a'bhë, mɔɔ bhibhee ‑aa 'wlumö. ‑Maa 'ɔ sɛ ɔ bhïlanɩnyɩɛ dila zɛmöö, ‑mä ‑a'a ngli a wɛlɩɩ 'mö, ‑aaa bhɛnɩ ‑a 'kä ‑sɩbhä 'mö ‑sɛsɛnɩ.

Yɩ 'wuë mö ‑a 'bhööä da'a bhïlaa, zaa Lagɔ a'bhë ‑kanyɩ nimï ‑wʋʋ, ‑ɔ bhɛnɩ bhä ɔ ‑kanyɩ ‑gblɩ 'nɩ?

Zaa, ‑sɩkaa a dɔ'wʋ, nɩkpaa 'wuë ‑wa ‑glɛɛ Zezwii Kliisɩ 'wʋʋ, ‑lu a ‑muu 'kää 'nglɩ ‑kä Lagɔ 'kʋä gbʋ köbhaa, wʋ'ʋa'a ‑bhölɩ 'lɩlɩlɩ.

‑Na'bhë 'saa ‑na'a nɩkpɛglɩnɩsaa yɩbhää, wʋ gbʋʋ mʋʋ ‑kamö plɛnɩɩ, mɩɩ ‑kamöä 'kwie 'mö kwä. ‑Maa Lagɔ 'a 'Wugɔmʋʋ mɔɔ ‑kamö ‑suu, ‑tiamö a ‑bhölɩbhölɛ ‑nyɛ 'tɩɩglɩglɛ 'sɔ mö ‑n 'kää ghlɩ.

Zaa, ‑mi'la 'wuë, yɩ ‑kanyɩ ghlɩɩ, Lagɔ ‑ɔ tulanɩnyɩɛ 'ɔ ‑wawʋ 'ylimöö, mɔɔ kää 'nglɩ a‑a pïliɛ 'wlu 'lɩlɩlɩ.

N ‑yi sɛ nɩɩ, zwɩɩ a kii 'wuë ‑a ‑wʋä dɛ'ɛ zi dɔ'wʋʋ, yɩ'ɩɛ ‑lu glɩnɩ Lagɔ 'a 'ghïlinɔɔ ɔ ‑kanyɩɛ 'ylɩ ‑bhlʋ 'mö 'ylimö tulanɩ a dɔ'wʋ.

‑A yi zwɩɩ a kii 'wuë zi oo, ‑a 'nɩa'a sɛ a'bhë ‑a 'kä 'zʋä ‑yi oo, wa ‑kanyɩ ‑gblɩ oo, ngɔmʋ ‑yinyɩ 'wʋ yi oo, 'pʋa ‑yinyɩ 'lɩbhä oo, ‑a yi 'kwie 'mö ‑wʋ oo, wa ‑yinyɩ 'lɩbhä ‑a yi 'kuä yi a'bhë oo, 'klɩyɩyɛ a kii 'la 'wuë, mɩɩ 'naa 'kä 'nglɩ ‑kä, ‑a 'kä dlɩ 'pä nɩɩ, Zezwii Kliisɩ, ɔ ‑nɩnyɩa'a ‑wa nʋ.

‑Maa Lagɔ ‑ɔ yɩlɩɛ ‑mä ‑aa dila zɛmö 'wʋʋ, mɔɔ ‑yiɛ sɛɛ 'Wugɔmʋʋ yɛ gbää. Ɛ'ɛ ‑bhö nyɩasɛ, ‑maa 'Wugɔmʋʋ ‑kä Lagɔ a ‑nʋa a 'wlumö bhibhee, 'saa nɛnɩɛ Lagɔ dlɩ yɔwʋ 'mö ɔ 'yɩbhänɔɔ.

Sɛ'ɛ n gbää nɩɩ, nɩkpaa 'wuë ‑wa ngluä 'wʋ Lagɔ 'a 'Wugɔmʋʋ 'kʋä ‑suu, mʋa glɩnɩɛ Lagɔ a 'yuë.

Nɩkpaa, 'wa nɩkpɛglɩnɩsaa ‑suää, 'wa 'saa wa yɩbhää, wʋ gbʋʋ mʋʋ plɛnuëë cuu, ‑maa nɩkpɛ a ‑mɔɔ Lagɔ 'a 'Wugɔmʋʋ ‑suä, 'saa Lagɔ 'a 'Wugɔmʋʋ yɩbhää, wʋ gbʋʋ mʋʋ plɛnɔɔ.

Lagɔ ‑ɔɔɔ ɔnyɩ 'a yuu 'wʋ gwɩ, ‑maa ‑ɔ 'wʋlɔɔ 'mö 'n ɔ yiɛ ‑a 'wuë a 'wlu 'mö 'kuu, sɛ ɔ 'naa ‑kanyɩ bhä ‑mä 'ɔ 'yu 'la 'mö ‑lii 'wuë 'nyɛnɩ 'nɩ?

'Ɔ 'Wugɔmʋʋ 'la a'bhë mɔɔ bhïlanɩnyɩɛ dila zɛmö nɩɩ, Lagɔ a yuë ‑a glɩnɩɛ ‑tiamö. ‑A 'wuë, ‑abhʋaa glɩnɩɛ Lagɔ a 'yuëë, 'saa ɔ gbä a‑a ɔ 'kä 'ɔ ngëyii ɔ ‑sɛɛ ‑lɛ 'mö a ‑nʋa 'nyɛɛ, ‑aa ‑li yɩ glɩnɩmöä. ‑A ‑nyɛ Zezwii Kliisɩ 'sɔ, a‑a 'kɩɛ 'wʋ ‑gbɔ. Sɛ ɔ ziɛ mä'ä dʋdʋ 'wʋ 'zwɩ, a‑a ‑kä ‑sɩbhä 'zwɩ zimö, ‑a ‑nyɔɔ 'sɔ, ‑a yi 'nglɩ mö.

Ɛ'ɛ ‑bhö nyɩasɛ, ‑maa nɩkpɛ, 'ɔ nɩkpɛglɩnɩsaa 'wuë 'mö, Lagɔ a ‑gblɩnyɔ ɔ glɩnɩɛ. ‑Sɩbhä a za, ɔ'ɔɔ 'yɩbhä ɔ 'kä Lagɔ 'a Gböö 'klʋkpamö zʋ. 'Ɔ nɩkpɛglɩnɩsaa a za, ɔ'ɔɔ bhɛnɩ a'bhë 'lɩlɩlɩ.

Zlɩ Lagɔ 'kää 'ɔ yuëa a 'ghïlinɔɔ 'mö 'yli 'wälanɩɩ, Lagɔ 'a ‑bhɛbhɛlii 'wuë 'kä zlɩ 'la 'ylɩmö a 'tʋ lɩbhɩ tenyii.

Sɛ ‑bhʋlʋ ‑kpɔ 'la, sɛɛ gbadɩnglɔ ‑kä'ɛ gwälɩɛ yi 'n ɔ ‑gbapö'ɛɛ, ‑a ‑yi sɛ nɩɩ, ‑sɩbhä Lagɔ 'a ‑bhɛbhɛlii 'wuë ‑wʋä ‑bhlɛ ‑sɩkaa klu dɔ'wʋ 'n yɩ yɩɛ 'klɩ.