Popular Bible Verses from EFESUX 4

Share

Pex tix kaux lai tix kaux caux rhawm ti yuh pa mhawm ka paox tix, viex pa awn rhawm awn rhi, pluat ka phimap paox tix, awm hoik pluat Siyiex phimap pex ka daux Cao Khrit heue.

Ka rhawm pa awn pa tiem pa lang gun lang yeung mai yeung ka paox tix ka daux krax moh krax rhawm.

Paw kieh lox pa seeing brai lih khaing daux jheeh pex tix gum kawx, ah ceu pa mhawm, awm pa lo sonsang kieh ting lhaong yam mawx yam an, sonsang koe bwanson son kix pa mhong khankix heue.

Kieh tik ka ceu pa song rhawm, pa hax rhawm, pa chu rhawm, pa lawh maw, pa map, pa koeng riang ciang khoi khaing pex heue.

Viang pex song rhawm kawx, paw ot kieh mawh phimap. Paw kieh singaix klip ka piang ceu pa song rhawm pex. Paw kieh tawx dee ot phicaox koe.

Kieh pex peeik ti tik ceu pa hoik sax yuh pex glang ka, pa mawh pui prim, pa kieh tokaux tix cux sium, kheu hawt alo nex nham pie lhen heue. Kieh pex mawh pa khraox ka daux khuan rhawm rhi pex, mai ceep ka pui pa khraox pa hoik phan hoik yuh ka daux pa rahsee mai pa singax singeh pa dex mai pa mawh meh, awm Siyiex heue.

Nied ti coca sonsang priex pa mawh tix mu khaing pa dex mai Khuan Cao, ka daux pa hoik vien tix tau ka ceu pa nhim heue.

Nawh Cao kieh tix blah mawh kawncau pa ting, kieh tix blah mawh cao jhai, kieh tix blah mawh cao sidiex lox bwan, kieh tix blah mawh sara pa kia ceu cao mai sara cao gau, sonsang kieh pui pa singax singeh khankix grum mhawm, son kaing sidiex gau, sonsang sum, yuh tokaux Cao Khrit ting, tom hoik mawh ex khawmuik tix mu khaing ka daux krax yum rhawm mai krax tawng ka kawn Siyiex, tom mawh ex pui pa uik grum die huan mai awm pa grum pakpeung Cao Khrit.

Son ang ex lai baox mawh kawn nyawm awm pa phlu bhaung ku bhaung, ceu pa gau bhaung phlu vied ve, kheu pa nieb lak keud ti yuh cuyi pie lhen, sonsang lud loe heue. Kheu giex pa mawh meh ka daux pa moh rhawm, ex tak ting huan ka ku ceu khawmuik ka daux Nawh Cao, kaw pa mawh kaing, mawh Cao Khrit heue.