Popular Bible Verses from Efesios 4

Share

Are chi'ana iri: Chi'ana rutzil ik'ux chiwach, xaq chiwila tob'al iwach chiwach, xaq chikuyu ni iwib' chiwach pacha u'anom i Dios chiwe yix, xixukuy ni rumal i Cristo.

Mi'an nim che iwib', xaq chi'ana che iwib' utz ik'ux chiwach; xaq chi'ana chi o unimal ik'ux, chich'ija ru' i k'axnab'al ik'ux wach taq i ki'an chiwach.

Mib'ij tzel laj taq tzij; are chib'ij i chom laj taq tzij man ni'pa i ketawik, keuto ni che kik'aslemal chwach i Dios, xaq kupetsaj i utz pkiwi.

Chiwo'taj kanoq ni'pa i chom taj: Mi'an ile chi to' ix k'an pik'ux; to' kix-oywarik, to' kixsik'in rumal iwoywal, xaq chimayij i kixto'tanik, kixch'aminik, xaq chimayij ronojel taq i utz taj chke i lok'anij.

We kpe iwoywal, miya che chi kixmakun rumal. Juntir chipaka iwoywal tz'aqat k'amaja kqaj i ij, man we to' kix-oywarik, k'ax ti uri rokik Itzel iwu'.

Are i chi'ana, chiwo'taj kan ni'pa i nojb'al re ujer, xaq ik'aslemal chi i'anom loq. I nojb'al le xa ktijin chiyojik, xa kixut'oro, xa kuya i utz ti laj taq rayijb'al chiwe. O uchak chijalwachij ni inojb'al re ujer, xaq i pik'ux; chijalwachij che i k'ak'. Xaq o uchak chijalwachij ik'aslemal re ujer; chi'ana che iwib' pacha ix k'ak' laj taq winaq chik, pacha kraj i Dios. K-aljin ni uri chiwe jun k'aslemal lik ch'am, lik suk'ulik pacha kub'ij i saq laj tzij re i Dios.

I Lo'laj Utewal i Dios ku'an ni chiwe chi xa ix jun. Chib'isoj uri u'anik chi junam iwach; ile kixtiki ni che we chom ix o chiwach.

Lik xuya kipatan; xuya chke jujun je apostolab'; xaq xuya chke jujun profeta; xaq xuya chke jujun je ajpaxsanel i utz laj tzij k'ak' re i Dios; xaq jujun xuya chke chi je ajyu'unel i jutzob'aj re i Dios; xaq xuya chke jujun je ajk'utunel re utzij chke i qachalal. Keje xu'an i Dios ile, yijb'al ke i je re Ire chu'ankil kipatan, tob'al ke i kachalal che kik'aslemal chwach i Dios. Keje kqa'an ile, junamsab'al qib' chqawach. Kraj i Dios chi xaqjun qawach che ukub'ib'al qak'ux che i Ajwal, xaqjun qawach chretamaxik uwach Uk'ojol Ire. Koj-el ni uri oj suk'ulik xaq oj nimaq chik pqak'aslemal chwach i Dios; koj-el ni uri pacha i Cristo chi lik saqil.

Keje ile kqa'an ti chik pacha kki'an ak'alab' chi to' ketz'an kinojb'al che wach taq i kkikojo. Kqa'an ti chik chi koj-e jela, koj-e jewa che taq i qakojonik. Lik kojtzaq ti chik pki'ab' i je ajt'oronel chi lik saqlej kinojb'al, chi xa pa sachsab'al qe kojkik'am wi b'ik. Are i chqa'ana, chqato ni qib' chqawach: Chqab'ij ni saq laj tzij re i Dios, xwiri ru' i k'axnab'al k'uxij chqab'ij na; kojel ni uri pacha i Cristo. Are Ire i qajolom, i yoj oj uch'akul.