Popular Bible Verses from Colosenses 2

Share

Yix ut, ijachom chik iwib' che i Ajwal Jesucristo; chi'ana uri che ik'aslemal pacha Ire. Keje pacha jun che' naj enaq i ra' pa jyub', xaq keje chi'ana yix che i Cristo pik'ux; chib'isoj ujikb'axik iwib' ru' ire pacha i k'uttal chiwe, xaq chik'amwaj chitioxij che i Dios lik ronojel ik'ux.

Chi'ana kwent iwib', mixterej chkij ike chi kkaj to' kixkit'or ru' taq i kinojim ike, ru' taq i kik'utunik chi nti uchak. Are i kkik'ut ike, xa re uwach i jyub' ta'aj, to' kinojim i ujer taq winaq, ru' ti i Cristo petnaq wi.

Yix ujer ix kamnaq te'eq chwach i Dios rumal imak, xwiri wo'or antal chik i circuncisión chiwe, rumali wo'or ik'aslemal lik junam chik ru' i Cristo, man lik are ile yatal chiwe rumal Dios. Ire ukuyum chik ronojel ni'pa i qamak. Yoj ujer, o te'eq i tojb'al mak pqawi, rumal ujer atb'al tzij; xwiri i Dios xresaj i qak'as chqij, lik xuchup uwach are xtz'aw i Cristo chwach i krus.

Man ronojel ni'pa i o che i Dios xaq o che i Cristo, xaq yix o re i Dios chiwe man ix o che i Cristo. Are ire chi o pkiwi konojel i je o tewal chi nim kicho'ab', xaq i nimaq kipatan.

Rumal ile chi u'anom i Dios chqe, mikoj retalil chke i kkitzukuj imak rumal wach taq i kitijo, wach taq i kitu'u. Xaq we je o taq i kixkich'ach'a chi kikoj ti u'ij i nima'ij, u'ij i ij sábado, xaq i rajlab'al ik'; Miya ixikin chutayik ile. Ronojel iri nti chik uchak, man xa are pacha uninox i ktijin uk'unik. Chi are i Cristo are xk'unik, are Ire saqil tzij.