Popular Bible Verses from Jị'cavacdye' 13

Share

Tyi chuc dyijyedyeꞌtumtyiꞌ tupuj chị́yepte in muꞌsiꞌ nómero vajedyedyeꞌ buꞌyitysiꞌ. Yojdyemꞌ muntyis nómero u, mọꞌ cạiꞌsiꞌ tịj muꞌ, meꞌ buꞌyiꞌ shupquiꞌ mọꞌ, ọij nash nómeros cac̣htacdyeꞌ mọꞌ: jäbän quiꞌ cien, jäbän quiꞌtac jäbän jiyiꞌ, meꞌsimꞌ.

Räj jacchety muntyiꞌ in jenꞌtute raꞌ in, muꞌindyety raꞌ jam jenꞌtute in tyi chuc sánactyiꞌ tịj in quircacheꞌ Oveca buꞌyitysiꞌcheꞌ muꞌ, muꞌ ijactyiꞌ jiquej. Tạꞌcas aty sánac tịj muꞌin jambiꞌdyemꞌ jämꞌtacyaꞌ ọij jac jiquej.

Chimeꞌdye muꞌ jäquity vajedyedyeꞌ buꞌyity jéyacsi räj muntyiꞌ in, ishoꞌ in judyeyaꞌ jam ishoꞌ in, jedyeꞌtumtyiꞌ in judyeyaꞌ ñịbety in, úñity in judyeyaꞌ jam úñity in, räjenꞌdye jéyacsi paj qui cac̣htac in tacvescheꞌ un muꞌin, jam jụijyaꞌ, jáficheꞌ muꞌin. Tyi chuc jam joꞌmestumtyiꞌ in cac̣htacdyeꞌtumtyiꞌ in, muꞌin raꞌ jam junꞌtyeꞌ jedyeꞌ yaꞌij in, mijam raꞌ junꞌtyeꞌ chimeꞌ in jiꞌmincaiꞌ jedyeꞌ in. Muꞌsiꞌ cac̣htacdyeꞌ muꞌ vajedyedyeꞌ buꞌyitysiꞌ, muꞌsiꞌdye tịj muꞌ, jam jụijyaꞌ, nómerocheꞌ tịj muꞌ, meꞌ buꞌyiꞌ shupquiꞌ cac̣htacdyeꞌ mus.

"Tyi chuc yụꞌtac jụijyaꞌ in paj qui muꞌin ĉärꞌtac in, ĉärꞌtac raꞌ mọmoꞌ in. Tyi chuc yụꞌtac jụijyaꞌ in paj qui muꞌin coc̣hinoyaꞌ ijac in, ijac raꞌ mọmoꞌ in." Mọꞌdyes muꞌin anicjetety Jenꞌ in jemoñeꞌ yejĉoij tyumꞌchutidyeꞌtum bäꞌyi in judyeyaꞌ yejĉoij anicjete Jenꞌ in.

Cạvete yụ yirity vajedyedyeꞌ buꞌyity marĉantyiꞌ shupqui, yävätidyeꞌ joꞌnoꞌ muꞌ judyeyaꞌ yiriꞌtac dáshu muꞌ. Dáshu muꞌ cäts ĉästacdyedyeꞌtum jịjcaiꞌ. Chimeꞌdye cäts jịjcaiꞌ sánacdyeꞌ joꞌnoꞌcheꞌ muꞌ. Meꞌ muꞌin in joꞌnoꞌ buꞌyity in Jenꞌsiꞌ tịj muꞌ ĉụiꞌsitupte in, mọꞌ ñinacdyeꞌ shupquiꞌ Jenꞌsiꞌyaꞌ vej muꞌ.

Chimeꞌdye muꞌ vajedyedyeꞌ buꞌyity soꞌmac paj qui chuti muꞌintum in anicjetetytum Jenꞌ in paj qui jiꞌpenacsi. Chimeꞌdye soꞌmac muꞌ paj qui räjdyes ayoꞌbuꞌyi muntyidyes in, yịjyidyes in, yoc yoc p̂eyaquity in, paiꞌ bäꞌyity in, räjdyes ayoꞌbuꞌyi muꞌ.

Meꞌ buꞌyi muꞌ soꞌmac ferdyeꞌ paj qui jịꞌcaveyacsi ferdyeꞌ muꞌ muꞌsiꞌyaꞌ vej muꞌ, muꞌ tashchetysiꞌyaꞌ vajedyedyeꞌ buꞌyity. Mọꞌyaꞌ seꞌ jaꞌyacsi jacchety muntyiꞌ in paj qui anicjepteve väñädyeꞌ in. Jéyacsi paj qui jämꞌtyeꞌ in jämꞌtacdyeꞌ, paj joꞌmeiꞌ yódyeijdyemꞌ muꞌ u tashchety vajedyedyeꞌ buꞌyity u, muꞌ coc̣hinoyaꞌ areꞌjitity jiquej, jam qui namꞌ säñi muꞌ, paj joꞌmeiꞌ jämꞌtyeꞌ jämꞌtacdyeꞌ in. Muꞌ qui jäquity vajedyedyeꞌ buꞌyity, soꞌmac muꞌ chimeꞌ ferdyeꞌ, muꞌ qui soꞌmeꞌ jụ́tyedyes mọꞌ jämꞌtacdyeꞌ, yojdyeijdyemꞌ muꞌ tashchety vajedyedyeꞌ buꞌyity u. Rụijdye meꞌ, mọꞌ p̂eyaquiꞌ jämꞌtacdyeꞌ, mọꞌ qui jiꞌijacsiꞌ tyi chuc jam timaꞌquety in mọꞌ jämꞌtacdyeꞌ, mọꞌ joꞌmes yódyeijdyemꞌ tashchety vajedyedyeꞌ buꞌyity u.

Muꞌ vajedyedyeꞌ buꞌyity cạvetety yụ jeñej buꞌyi ị́tsiquij, mọꞌ na yuj muꞌ jeꞌñeiꞌ tsanꞌ juyuꞌtyeñes, chụꞌ na muꞌ jeꞌñeiꞌ pupujris, joꞌmeij muꞌ. Chat qui muꞌ c̣hovaj buꞌyity ĉụiꞌsiꞌ yụꞌtacdyeꞌ muꞌ jayuꞌti muꞌ vajedyedyeꞌ buꞌyity, muꞌ qui nọ́taqui ayoꞌbuꞌyi, därsiꞌtum ferdyeꞌ soꞌmac.

Chimeꞌdye muꞌ vajedyedyeꞌ buꞌyity jam jiꞌdyäcac vaꞌbunyedyes p̂eyacdyemꞌ, ĉụiꞌ jeñej buꞌyi Jenꞌ, meꞌ buꞌyi yuꞌti, mọꞌ ñinacdyeꞌ shupquiꞌ Jenꞌsiꞌyaꞌ vej muꞌ. Muꞌ qui ayoꞌbuꞌyi vạjpedyeꞌ quiꞌtac päräꞌ jiyiꞌ ịvaj, meꞌquiꞌyamꞌ yụꞌtac ayoꞌbuꞌyi muꞌ.

Yiris joꞌnomꞌ vajedyedyes muꞌ mọꞌ areꞌjajitiꞌ mọmoꞌ jiquej, jeñej raꞌ säñiꞌ tsanꞌ mọꞌ joꞌnomꞌ, meꞌ buꞌyiꞌ areꞌredyeꞌ shupquiꞌ mọꞌ, chäĉänꞌ qui namꞌ. Jacchety muntyiꞌ räj äjjete in muꞌ vajedyedyes buꞌyity, muꞌ cäc̣häꞌchute in.

Yoctyiꞌ qui cạvete yụ vajedyedyeꞌ buꞌyity jacĉan shupqui. Päräꞌtyity muꞌ dáshu miquiꞌmunsimꞌ, jeꞌñeiꞌ oveca banꞌsis, p̂eyacdyeꞌ na muꞌ jeñej yiꞌ c̣hovaj buꞌyitysiꞌ p̂eyacdyeꞌ muꞌ, meꞌdye muꞌ p̂eyaqui. Fer ayoꞌbuꞌyi muꞌ muꞌsiꞌyaꞌ vej muꞌ tashchetysiꞌyaꞌ vajedyedyeꞌ buꞌyity, ĉaĉaij na muꞌ jäquity soꞌmac muꞌsiꞌ yụꞌtacdyeꞌ, meꞌ buꞌyidyemꞌ chimeꞌ muꞌ jäquity vajedyedyeꞌ buꞌyity. Muꞌ fercheꞌ jéyacsi paj qui räj jaccheꞌ bäꞌyity in timaꞌquete in muꞌ tashchety vajedyedyeꞌ buꞌyity, muꞌdye chäĉäntyiꞌ fersiꞌyaꞌ areꞌjitidyeꞌ jiquej.