Popular Bible Verses from इपिसियों 4

Share

एक दूजाँ का वाते करपा वाळा अन दयाळू बणो अन एक दूजाँ का गुना ने वस्यानीस माप करो जस्यान परमेसर थाँने मसीऊँ माप किदा।

ईंको मतलब दीनता अन नरमाई का हाते सेण करबा की तागत राकन परेमऊँ एक दूजाँ ने सेण करो।

थाँका मुण्डाऊँ कई नकसाण करबावाळी बाताँ ने निकळणी छावे, पण लोगाँ के धिज्यो बंदाबा का वाते ज्याँने जरूत हे, अस्यी हव बाताँइस निकळणी छावे, ताँके ज्यो हुणे वाँको भलो वे।

हारी कड़वाहट, गुस्सो अन रीस, लड़ई, गाळ्याँ देणो, अन हारी बुरई ने छोड़ दो।

रीस में आन पाप मती करो अन दन आत्याँ पेल्याइस आपणी रीस ने खतम कर दो। सेतान ने मोको मती दो के, वो थाँने पाप में नाक दे।

थाँके पाला जीवन को चालचलन ज्यो धोको देबावाळी मरजीऊँ बगड़ग्यो हे, वींने छोड़बा का वाते थाँने हिकायो ग्यो हो। जणीऊँ थाँको मन अन आत्मा बदलन नुवी वेणी छावे। अन थाँ नुवा चालचलन ने पेरलो, ज्यो परमेसर का गुण का जस्यान रच्यो ग्यो हे अन ज्यो हाँची में पुवितर अन परमेसर का हामे सई हे।

पुवितर आत्मा एकता देवे हे, वींने बणी रेवा का वाते गट-जोड़ करबावाळी सान्तीऊँ थाँ जतरो भी कर सको हो वतरो करो।

वाँकाणी किंनेई तो थरप्या तका वेबा का वाते, अन किंनेई परमेसर का आड़ीऊँ बोलबावाळा, किंनेई तो हव हमच्यार हुणाबावाळा, अन किंनेई तो परमेसर का मनकाँ का गवाळ अन किंनेई हिकाबावाळा बणाया। वणा ओ ईं वाते किदो के, वी हाराई पुवितर मनकाँ ने सेवा करबा का वाते त्यार करे ताँके मसी को डील तकड़ो वेतो जावे। ओ तद्याँ तईं वेई जद्याँ तईं आपाँ हाराई विस्वास में अन परमेसर का बेटा का ग्यान में एक कोयने वे जावाँ अन मसी का हारई गुण में पाका कोयने वे जावाँ।

जणीऊँ आपीं आगे बाळक कोयने रेवा, ज्यो ठग मनक की ठग-वद्‍याँ अन चतुराईऊँ, भेंम की बाताँ अन छळ का उपदेस का वइराऊँ ऊछाळ्यो जावे हे अन अटने-वटने भटके हे। पण माँकाणी परेम का हाते हाँचा बोलता तका हारई तरियाऊँ मसी ज्यो मातो हे जिंको मतलब मण्डली को मुक्यो, वींमें वदता जावाँ।