Popular Bible Verses from Ɩzayi 53

Share

Ɛcɛ a tɩ ɩ-faar'a so bɛ cɔ̀r ʋ col, a tɩ yel-bebe zũú n'a bɛ ƴɛ́r ʋ ŋmɛr. A dɔwrʋ ʋl na ɩ kɛ̀ tɩ páw a ƴã-ɓaarʋ a, ʋl zu n'a k'ʋ lo. Ɛ́ a ʋ natɩɛ n'a so kɛ̀ tɩ nyɛ̃ a sanʋ.

Tɩ za tɩ bɔrɛ na gʋɔr mɛ̃ píir a, ŋa tuur ʋ sɔ́r, ŋa tuur ʋ sɔ́r. Ɛcɛ a Sore ɩ na a tɩ za sãwna lo a ʋ zu.

Zɩ̃ k'aa tɩ bàalʋ n'a ʋ tɩ tuo, a tɩ wʋ̀ʋr'a tɩ dĩ ʋ. Ɛ́ tɩɩm tɩ tɩ́ɛrɛ kɛ́ Naaŋmɩn n'ʋ dɔwrɛ ʋ a lɛ, kɛ́ Naaŋmɩn n'ʋ ŋmɩɛr ʋ ɛ́ ƴãwnɛ ʋ vĩ.

A nɩbɛ za tɩ jewr'ʋ na ɛ́ zawr'ʋ bɛr. Nɩr na wone tuo a tɩ n'ʋ, nɩr na mili nɩ a 'wɔbrʋ a. Ʋ tɩ ɩ na mɛ̃ nɩr nɩr za na bɛ bɔbr k'ʋʋ jɩ́r kaa a. Tɩ tɩ jewr'ʋ na, tɩ tɩ nyɛ̃ ʋ na ʋ bɛ ɩ bom za ɩ.

Bɛ dɔwr'ʋ na, ʋʋ siwri ʋ tʋɔra, ʋ bɛ háa nʋɔr ɛ. Mɛ̃ péle bɛ na cere nɩ a kʋb zie a, mɛ̃ pɛ́rʋ bɛ na ŋmarɛ a kɔblʋ ʋʋ àr gbili a, ʋ bɛ háa nʋɔr ɛ.

Ɛcɛ a Sore kʋ̀ n yel-mɩŋa a ʋ tõ-tõ-bie a kpɩɛrʋ na dĩ a. Ɛ́ a sob nɛ na lɩɛrɩ nɩbɛ de a ʋ nyɔ-vʋʋrʋ tɩr a, ʋ ɩ na k'ʋ lɛb nyɛ̃ àrʋ zie. A ʋ tõ-tõ-bie na tɛr'ɩ bʋʋrɛ ɛ́ cãà vʋʋrɩ cɛlɩ. Ʋlɛ n'ʋ na ɩ a Sore pʋ-tɩɛrʋ maalɩ.

A Sore niŋé a, a tõ-tõ-bie tɩ bàa na mɛ̃ vale a, mɛ̃ va-kũule na tɛ̀ nyɩgɛ tẽ-kõw pʋɔ a. A sãáfʋ nɩ a vɩɛlʋ al bʋʋrɛ a nɩbɛ na mɩ́ jɩ́rɛ a, ʋ bɛ tɩ tɛr a ɩ. A ʋ ŋmɛ̃a bɛ tɩ ɩrɛ tɩ nʋ̃ɔ̀ ɛ.

Alɛ n'a so ɩ̃ ƴãwnɛ ʋ a nɩbɛ na ɩ bɛrɛ zuo bɛ za a pʋɔ. Ʋlɛ nɩ a gãdaar nɛbɛ na lãw põ a zɛbr na-bome bɛ na fa a. Bʋ̃ʋ n'ʋ vɛ̃, ʋ nyɛ̃ nɩ ʋ tʋɔra sàw a kũu, ɛ́ bɛ sɔ́r ʋ ƴãw a nɩ-faar pʋɔ, ʋ tuo nɩ nɩ-yaga yaga faalʋ, ɛ́ ɩ a yel-bebe dem tãpɛlʋ sob.»

A Sore yere na: «A tuo a ɩ̃ tõ-tõ-bie na wõ a zũú, ʋ na nyɛ̃ nɩ a cãà, nʋ̃ɔ̀ na paalɩ ʋ na. A ɩ̃ tõ-tõ-bie na ɩ a nɩ-mɩŋa tɔr za a na ɩ na nɩ-yaga yaga lɩɛbɩ nɩ-mɩn, ʋ na de a bɛ yel-bebe tuo a ƴãw.

Bɛ nyɔw ʋ na, bɛ dɩ n ʋ nɩ ƴɛ̀rʋ, bɛ kʋ ʋ na ír bɛr. Ɛcɛ ãa n'ʋ tɩ cɛlɩ a ʋ yele zie? Bɛ ír ʋ na bɛr a nɩ-vʋʋrɩ tẽw zu, a ʋ nɩbɛ sãwna ƴãw n'a bɛ kʋ ʋ.

Bɛ ũù ʋ na lãwnɩ nɩ-faar, a ʋ yàa be n tɛra dem yarʋ pʋɔ, ʋ na saa bɛ maalɩ yel-faa za, ɛ́ ziri bɛ dãw yi a ʋ nʋɔrɩ́ a.