Popular Bible Verses from Tɛ̀ɛnnɛ 13

Share

Sícilimɛ kéele li nyɛ lee naa. Wee wi cìlige lè, ki n yɛlɛ wi yaweegi córomɔ tímana. Níì cán córomi bee i nyɛ syɔɔn córomɔ, pi i nyɛ saala taanri ní togoye taanri ní kɔrɔni.

Bele myɛ be nyɛ lè tári na, gee bee n jo syɔɔn o syɔɔn mɛ́ʔɛ gi nyɛ lè sìnzɛbɛ ni nlaa yaà dulunyanw sélimɛ na sìíw sɛ́bɛ ni wi nyɛ lè Bàpili ma, lee pe da kpóo lè, bele bee a ra yaweegi kpɔ̀ʔɔrɔ́.

A gi i syɛ́ɛnbèle myɛ ŋàʔaná, woyilibèle yoo, wogbolobèle yoo, lɔrɔfɔbèle yoo, foomɔfɔbèle yoo, wɔ́rɔbèle yoo, púlobèle yoo, jàngó be fɛ̀ɛ kpúmɔn pe kàliige kɔ́yi na wàlá pe gbáagèle na. Wàa faala si da pye bi gbǎn yarigaa syɔɔ í, wàlá bi yarigaa pára í, kapye fɛ̀ɛ́w o nyɛ wi na í, wi lè yaweegi mɛ́ʔɛ, wàlá ki mɛ́ɛgi córomɔ.

Wee ga yɛlɛ ní púlori ní lè, pe a wi cò bi tórigo di na. Wee si wi pèle kúu ní ŋɔsée ní lè, pe a wɔ́ɔ wee bee kpóo ní ŋɔsée ní. Gee bee na Kolocɔlɔɔ syɛɛncanbèle yɛlɛ paa kpàracogo kpéʔele si tágali cò.

A mii yaweʔe nyaa, a gi i yirigi sólomi lɔ̀ʔɔ ni, nyɛngéle kɛɛ ní nyùnyo kɔrɔsiin maa pye gi na, á gi fànʔafɔ-nyùndɔngéle kɛɛ tɔ́n gi nyɛ́ngèle na, Kolocɔlɔɔ mɛ́ɛkalagiri mɛ́ɛyɛ maa sɛ́bɛ gi nyúnyi na.

Fànʔa maa kaan gi ma kaa kapɛɛnni kpúmɔn ní Kolocɔlɔɔ syɛɛncanbèle ní, sáā be jáagi, a séew kaan gi ma kaa syɛɛnfeleyi yòdaʔaya myɛ, ní dulunyanw syɛ̀ɛnnɛ myɛ kàragí, n fàra syɛɛnfeleri joofɔɔlɔ myɛ, ní syɛɛnfeleyi myɛ na.

Ki maa ni tári syɛ̀ɛnnɛ fáana fɛ̀ɛ́bèle bee báriga ni, fɛ̀ɛ́bèle bele fànʔa yaweeseligi da kaan gi ma lè jàngó kaa be kpéʔele koro yɛ́ʔɛ ma. A gi tári syɛ̀ɛnnɛ pye, yaweegee pe da kpúmɔn n kpàli ní ŋɔsée ní á gi lúru n wéege lè, pe gee bee niwirige sámaga paa gi kpɔ̀ʔɔrɔ́. A gi wɔ́ɔ̀ fànʔa taa n sìíw ŋɔ́ngara le yaweeseligi niwirige ni, koro ga pye kaa nyuu, bele be lè pe ga fɔ̀lɔ bàā gi kpɔ̀ʔɔrɔ́ í, káā bele bee myɛ kúu.

Yaweegi mii da nyaa lè, ki maa sèjɔɔn wíri, kàjáa ki tɔ́lɔyi maa ursi wóyo wíri á gi nyɔ́ɔgi si càaraɔ wóʔo wíri. A yacobeegi gi fǎngi, ní gi fàngoli, ní gi séekpɔɔw kaan yaweegi bee ma.

A fànʔa kaan yaweegi ma kaa nɛ̀ɛnyɛnɛgi syɛ́ɛnrɛ nyuu n fàra Kolocɔlɔɔ mɛ́ɛkalagiri na. Séew maa kaan gi ma kaa kérigèle bee kpéʔele bi taa yeye togoye siin ní siin.

A mii gi nyùngaa nibin nyaa, a be gi kpúmɔn n kpàli, a gi pye mɔ a jo ki n kùu n kwɔ́ɔ, kpàligi bee maa yɛlɛ bi dée gi kpóo, koro ní ki myɛ ní a gi fala n pɔʔɔ. A tári syɛ̀ɛnnɛ myɛ i káama gi na, níì taʔa gi na.

A mii níì yaweegaa nikwɔɔ nyaa, a gi i yirigi tári ni. Nyɛngéle siin maa pye gi na àmɛɛ bàpile wòʔolo nyɛ lè, á gi si i nyuu yacobeʔe jooganma na. A gi i báara ní yaweeseligi sée myɛ ní gi yɛʔɛ̀ ma, ní i tári ní di syɛ́ɛnbèle kɔ́ri jàngó paa yaweeseligi kpɔ̀ʔɔrɔ́, gee pe da kpúmɔn n kpàli lè kùumɔ, á gi pɔʔɔ lè.