Popular Bible Verses from Tɛ̀ɛnnɛ 12

Share

Pe n fànʔa taa wi na Bàpili sìsyaan wolo báriga ni n fàra be séeraw syɛ́ɛnrɛ na, pe ga be sìíw kéele córo í, fwɔɔ n baa nan kùu na.

A mii yákpogbɔɔlɔ lóʔo nyɛ̀ʔɛni ni, a li i gi nyuu níì jo: «Tɔ́ɔliw ni syɔɔli, ní séew, ní wolo Kolocɔlɔw fànʔa n nan n kwɔ́ɔ n fàra wi Kirisiw sée na. Níì cán wee wi da ni sɔ́ɔn wolo senyɛnbèle na lè, pe n wi yirige n wáa kàfugi na, woro wee wi da ni yèré Kolocɔlɔɔ yɛ́ʔɛ ma lè ní i sɔ́ɔn be na canʔa ní yébilige.

A be yacobeekpɔɔgi cò n wáa kàfugi na, gi lè wàbilɛɛgi, be yiri lè Dàzɔɔnw, ní Sutanaw, woro wee wi dulunyanw syɛ̀ɛnnɛ myɛ fáana ni pùuní lè. A be wi yirige n wáa tári na ní wi tundunbèle ní.

Gee bee na gi yɛlɛ, nyɛ̀ʔɛgèle, yaa fundaanra kpéʔele n fàra yele bele na ye nyɛ lè ge ni! Wɔʔɔli si a pye tári na n fàra sólomi lɔ̀ʔɔ na! Níì cán Dazɔɔnw n tìgi yaà yele ma ní fundanʔagbɔɔrɔ ní àmɛɛ wi gi cán lè ncan làla saʔa ga níì kòro woro ma í.»

A kapɛɛnnɛ fala n yìri nyɛ̀ʔɛni ni. Misyɛli ní nyɛ̀ʔɛni tundunbéle be nyɛ ní wi ní lè, poro pe da ni kapɛɛnni kpúmɔn ní Yacobeegi ní. A yacobeegi ní gi tundunbèle wɔ́ɔ i li kpúmɔn ní be ní

A yacobeegi fúngo tɔ̀nɔ n tanʔa céw kurugo, a gi kári bi sa kapɛɛnni kpúmɔn ní céw pìisanbèlē ní, poro bele be Kolocɔlɔɔ tundunri kɔn lè ní i di kpéʔele, ní i Zyezu séeraw có lè.

A mii fɛ̀ɛkpɔɔɔ nyaa nyɛ̀ʔɛni ni, wi maa pye cɔlɔɔ, a wi cángi le wiyɛɛ na burogo, yégi si i nyɛ wi tɔ́lɔyi láara ni, á wi ŋɔripiigèlē kɛɛ ní siin tɔ́n fànʔafɔ-nyùndɔnnɔ. Wi maa pye fícɛnnɛfɔlɔ, á li wi yìrige, a wi i yákpoli wáa àmɛɛ wi làrizeeli nan lè.

A céw fala n pìíw see, nàɔn, wee wi a kɔ́ ba ra syɛɛnfeleyi myɛ nàʔá lè ní tunmɔrɔ kàgbeele ní. Kàjáa a be wi pìíw cò n lúrugo ǹjogi ni Kolocɔlɔɔ ní wi fàngoli tɛ́ʔɛ ma. A céw fàn n fala fìími tára ni, beè Kolocɔlɔɔ da tɛɛgaa sámaga wi ma lè jàngó pe sa ra wi nyɔ́ɔgi caa nɛɛ bee, bi taa sa nan canya saala kɔrɔni ní togoye taanri na.

A mii níì fɛ̀ɛwaa nikwɔɔ nyaa nyɛ̀ʔɛni ni, wi maa pye yacobeʔe, ki maa kpɔ́ʔɔ gbanʔama ní i nyɛ́nɛgi, ní i nyɛ ní nyùnyo kɔrɔsiin, ní nyɛ́ngéle kɛɛ ní, níì fànʔafɔ-nyùndɔngéle kɔrɔsiin tɔ́n ki nyúnyi ni. A ki gi nángi tɛ́ʔɛ n nyɛ̀ʔɛni ŋɔripiigèlē tílaya taanri wóʔo kíle n cáan tári na, níì yére fícɛnni fɔ́lɔ yɛ́ʔɛ ma jàngó wi ga see, koro í pìíw cò bi káa.

A Kolocɔlɔɔ nyɔɔ̀ dàdaga fókaanya siin kaan céw ma koro ga pye wi yìri bàā syée wi tɛɛkòrogi ma fìími tára ni, jàngó wi léeli wàbigi na, pe a sa ra wi nyɔ́ɔgi caa nɛɛ bee bi ba taa yɛ̀ʔɛlɛ taanri ní tíla. A wàbigi fala n lɔ̀ʔɔ yirige ki nyɔ́ɔgi ni àmɛɛ cábiga nyɛ lè n wáa céw kurugo, jàngó ki wi wáa. A tári tɔ̀nɔ n céw dɛ̀ɛmɛ ncan ti n di nyɔ́ɔgi múgu n cábigi lɔ́ʔɔ gbaa, gee yacobeegi yirige gi nyɔ́ɔgi ni n wáa wi kurugo lè.