Popular Bible Verses from Aisea 43

Share

Nengeni, üpwe förätä eu mettoch mi fö. Iei a fisitä. Ifa usun, ousap küna? Üpwe föri efoch al lon fanüapö, üpwe pwal föri chanpupu lon fanüpwas.

Are kopwe fetal lon koluk, üpwe etuk. Are kopwe fetal lon chanpupu, öütan esap amolumuk. Nge are kopwe fetal lon ekkei, kosap kar, nge pulopulan esap kuruk.

Nge ewe Samol mi Lapalap a apasa, “Ousap chüen achemato ekewe mettoch mi fis me lomlom. Ousap pwal ekieki usun mine a fis lon ekewe fansoun ra la.

Iei alon ewe Samol mi Lapalap mi föruk, Israel, “Kosap niuokus, pun ngang üa angasok. Üa köri ngonuk itom, en nei.

Pokiten om aüchea me om itetekia me rei, pwal pokiten ai echenuk, üpwe fangala aramas pwe siwilum, pwal ekewe mwü pwe akasiwilin manauaom.

Pun ngang ewe Samol mi Lapalap om Kot, ngang Ewe mi Pin lon Israel om Chon Amanau. Iwe, üpwe eäni Isip penmanau fän itom, üpwe pwal fangala Itiopia me Sepa pwe siwilum, nge en kopwe ngas.

Kosap niuokus, pun ngang üpwe etuk. Üpwe aliwinato mwirimwirum kewe seni ötiu me lotou o achufengenikemi.

Ngang, ngang chök ewe Kot mi amoela om pupungau fän püsin itei, nge üsap chüen chechemeni om tipis kana.

Iwe, ewe Samol mi Lapalap a apasa, “Ämi chon Israel, ämi nei chon pwärätä pwal nei chon angang. Üa afilikemi pwe oupwe sileei o lüküei, oupwe pwal weweiti pwe ngang chök Kot. Esap wor eman Kot mi fis mwei, esap pwal wor eman epwe fis me müri.

Ngang, ngang chök ewe Samol mi Lapalap, nge lüki esap wor eman chon amanau.

Ngang chök Kot tori feilfeilachök. Esap wor eman a tongeni amanaua eman seni lepei. Üa akangang, nge iö epwe pineei?”

Iwe, ekewe manmwacho repwe asamoluei, ekewe wolif me kawakaw repwe mwareitiei, lupwen üa apupuolong koluk lon fanüapö, pwal chanpupu lon fanüpwas, pwe nei kewe aramas üa filiir repwe ün. Ir ekewe aramas üa afisiir fän itei, pwe repwe pwärätä ai ling.

Iwe, üpwe apasa ngeni efeng, ‘Kopwe aliwinireto,’ üpwe pwal apasa ngeni ör, ‘Kosap amwöchüür.’ Oupwe aliwinato nei kewe alüal seni ekewe fanü mi toau, pwal nei kewe föpwül seni lesopun fanüfan. Oupwe aliwinireto meinisin mi iteni itei, chokewe üa föriir pwe repwe alingaei, chokewe üa alapalapeer o afisiir.”

Me lom ewe Samol mi Lapalap a föri efoch al lematau, efoch al lukalapen nonoon lematau. A pwal emwenala woken me oris me mwicheichen sounfiu mi pwora ngeni feiengau. Iwe, ra turula, nge resap tongeni pwätäsefäl. Ra muuk o kunula usun efoch wik.

Ngang ewe Samol mi Lapalap, Ewe mi Pin leimi, pwal ewe Chon Afisi ämi chon Israel, ngang ämi we king.”