Popular Bible Verses from Aisea 41

Share

Iwe, kosap niuokus, pun ngang üa etuk, kosap pwal apilüküngau, pun ngang om Kot. Üpwe apöchökülok, üpwe pwal alisuk. Üpwe fokun tümwünuk o amanauok.

Pun ngang om Kot ewe Samol mi Lapalap üa amwöchü pöüifichum, pwal ngang ätewe mi ürenuk, ‘Kosap niuokus, ngang üpwe alisuk.’”

Chokewe ra songeituk repwe itengau me säw, nge chokewe mi fiu ngonuk repwe mäfeiengau o rosola.

üa uweeketo seni leamüchün fanüfan, üa pwal köruk seni lesopun fanüfan o ürenuk, ‘En nei chon angang, üa filuketä, nge üsap pöütukela.’

Iwe, kopwe kütta chokewe mi oputok, nge kosap chüen küneer, pwal chokewe mi maun ngonuk repwe moela.

Ewe Samol mi Lapalap a apasa, “Kosap niuokus, en Israel mi kükün o apwangapwang usun chök eman moso, pun ngang üpwe alisuk. Ngang Ewe mi Pin lon Israel om Chon Amanau.

Nge en Israel nei chon angang, en mwirimwirin Apraham, chiechiei we üa filuketä

Iwe, üpwe apupuetä chanpupu won ekewe chuk mi amassawa o emichätä puächen koluk lon ekewe lemol. Üpwe awili fanüapö ngeni nomun koluk, nge fanüpwas ngeni puächen koluk.

Iwe, lupwen chon wöüngau me osupwang ra kütta koluk, nge resap küna, lupwen ra kaka pwe chönawer a pwasapwas, ngang ewe Samol mi Lapalap üpwe pälüeni ar iotek o alisiir. Ngang ewe Koten Israel üsap likitirela.

Iö a föri ei föför? Iö a köri ekewe pilon aramas seni lepopun? Ngang, ewe Samol mi Lapalap, üa nom me lepoputan, üpwe pwal nom ren ekewe pilon lesopolan, ngang chök.

Üpwe ämärätä lon fanüapö ekewe irä setar me akasia, pwal ekewe mwoosor me irä olif. Üpwe pwal fotukätiu lon fanüpwas ekewe irä saipires me akürang me irä pain. Iwe, aramas repwe küna ei o silei pwe ngang ewe Samol mi Lapalap üa föri ekei föför, repwe pwal ekieki usun o weweiti pwe ngang Ewe mi Pin lon Israel üa afisätä ei.”